2 Kɔlintyanə 9 - Əka yi Fîə

Akwáalə á Mbô Pəlim Pɛn Pɔ́ pə́ Yeso

¹ Anu yətsə́ á kě ə́wɨ́ chî təmbɔʼ maŋ pɨ ŋ́ŋwaʼlə̂ á mbô pɨ ńté akwáalə ándó pə́ tə́ nə́ ńtúmə á mbô pɨ pə́ Əsê á Judya pô.

² Maŋ jî ńgə́ nə́ lánə ńkɔŋə̂ á mə́ kwá nə́ pəənə, maŋ pəənə̂ ńkə́ ńtəələ̂ ńté áwə́ənə́ á mbô pɨ pə́ Masedonya. “Maŋ kə sóŋ ńgə́ pəlimə́ á mə́m mboʼ Akaya pó nə ḿbɛ́dtə ńtyáŋtə mbɨ əzoobə́ á mə́ fɛ̂ nə́ akwá ə́fɛ́lə á ngoʼ ə́ kə laŋ nə́ lə́.” Ndzaŋ pɨ nə ńchígə́ nə́ ńtə́gə atû lə́, ńnéŋ ntɨ́ pɨ pipə nɨ́ nə́ á mə́m pó, pó tíʼə ńkɔŋə̂ á mə́ kwá nə́.

³ Nə́ əghâ nə́ maŋ tú pəlim pəənə́ á mbô pɨ ńjî ńgə́ kətɨd əwəgə́ á mə́mə anu zɨ kɔ á chîə á pə́ ándó atséebə kətaŋ. Tsɔʼə ndzaŋə ándó maŋ kə sóŋ nə́ lə́, nə́ tə́ ńtyáŋtə mbɨ əzəənə́ á mə́ kwá nə́ ághóobə́.

⁴ Lə́ təmbɔʼ pə̂gpə pɨ pə́ Masedonya tə́ ńgyǐəə ńdzɨ́ ńgə́ pɨ kě mbɨ əzɨ kə́ tyáŋtə pô, tə ḿbə́ əsɨ́ ə́ yǐ chîə atû pəg, ńté ńgə́ pəg kə tə́ ńkɔn ndzɔʼ ńté áwə́ənə́. Tə́kɔʼ əsə́ənə a kə́ ńchîə á atû pəənə́

⁵ Lə́ á pə́ ńgə́ maŋ nə ńkwaŋ ńgə́ a pɔŋə̂ á mə́ póʼ nə́ mbô á mbô pəlim pɨ ńgə́ pó kwá mbi ńgyǐəə á mbô pəənə́, ḿbeg ńtyáŋtə əpú pɨ kə laʼnə̂ nə́ ńgə́ pɨ yǐ fɛ̂ lə́. Ńdaŋ ə́lɨ́d əpú pə̂ yǐ koʼnə̂ nə́ ndɛlə ándó maŋ yǐ nə́ yǐəə, zəənə́ á tíʼ nɨd ńgə́ pɨ fɛ̂ lə́ ńté ńgə́ pɨ kɔŋə̂ ńkě té á pə́ ńgə́ pə́ fyáalə áwɨ́ pô.

⁶ Kwúmtə nə́ ńgə́ ŋwu páʼ a pǐ nə́ əpú ə́ kə́g a yǐ kə́ foʼ lə́ mɔ́ əliʼə́, ŋwu páʼ a pǐ nə́ əpú ə́ nə́ənə a kə́ foʼ lə́ pi nɨ́ nə́.

⁷ Ŋwu ntsəmə a fɛ̂ ndzaŋ páʼ ntɨ́ əyí nɨd nə́, kɔ a fɛ̂ á pə́ ńgə́ pə́ fyáalə yí kɨ ńtə́ ə́fɛ̂ ńtə́ ŋ́ŋwuntə̂ ńté ńgə́, Əsê a kɔŋ lə́ ŋwu páʼ a fɛ̂ nə́ nə́ akɔŋtə.

⁸ Əsê a chî təmbɔʼ a fɛ̂ afoʼə atsəmə á mbô pɨ tə nə́ənə, ńjî ńgə́ nə́ túgə ajúmə atsəm ndɛd ətsəm mbɔʼ pɨ lɔg ə́faʼ mbô mənu mimə əshîʼnə mətsəm ə́wə́.

⁹ Ndzaŋ páʼ aŋwaʼlə Əsê sóŋ nə́ ńgə́, “Apô a yə́ á ŋáʼnə á mbô pəpóŋə, a tɨ́ ndə̌ŋdəŋ ḿmɛdnə̂.”

¹⁰ Əsê páʼ ä fɛ̂ nə́ mbǐpúmə á mbô ŋwu páʼ a pǐ nə́ əpú pó apéenə məkálə́ ńgə́ pə́ kɔ́d, lə́ yí páʼ a yǐ nə́ fɛ̂ mbǐpú ətsəmə á mbô pɨ páʼ pɨ lɔ nə́ ə́ kə́ ghɛd zɨ́d kwíŋ ńkə́ ńdzə́m məjî mə́ nɨ́ nə́ ndɛlə́ afoʼəmə́jíə, ńté ńgə́ mbô mí mə́ ŋáʼnə.

¹¹ A yǐ zá əfɛ̂ afoʼə á mbô pɨ əghâ ətsəmə á nɨ́ nə́ ndúmə ándó mbɔʼ mbô mɨ́ mə́ kə̂ ŋ́ŋáʼnə əghâ ətsəmə. Ńdaŋ ə́lɨ́d pɨ pipə nɨ́ nə́ pó yǐ fɛ̂ ndǎ á mbô Əsê ńté əpúmə ándó pɨ fɛ̂ nə́ nə́ pó ńdaŋə̂ á mbô pəgə́.

¹² Ńté afaʼ zəənə́ ándó pɨ faʼ nə́ lɛ̌, á kě lə́ tsɔʼə pɨ pə́ Əsê kwáalə pô, á kə́ ńgɛlə̂ pɨ pipə nɨ́ nə́ pö láʼkə Əsê.

¹³ Ḿbɨ ńkə́ ńté ńgə́ pɨ pə́ yǒ zɨ́ ńgə́ afaʼə azə́ənə́ á pɔŋ, ə́ tíʼ fɛ̂ nəgháʼə á mbô Əsê ə́ zoŋ ndzaŋ nə́ néŋ nə́ ntɨ́ əwɨ́ ńkə́ ńdzóʼnə nkɨ Klisto yi əshîʼnə páʼ pɨ̈ náŋkə nə́ lə́, pó yǒ kə́ pɨ fɛ̂ nəgháʼə á mbô Əsê ə́ té ndzaŋə ándó mbô mɨ́ mə́ ŋáʼnə nə́ á mə́ ghab nə́ apô pɨ po ńkə́ ńdzoŋ ḿbéenə ŋwu ntsəmə.

¹⁴ Ńdaŋ ə́lɨ́d pó yǐ tə chaʼtə́sê nə́ pɨ nə́ akɔŋnə ńté tə́kɔʼ apɔŋə́ntə́əmə Əsê páʼ a nɨd nə́ á mbô pəənə́.

¹⁵ Pɛn láʼkə Əsê ńté məfɛ̂nə mí mimə́ tə ndɛn páʼ a fɛ̂ nə́ á mbô pɛnə̂.