2 Kɔlintyanə 8 - Əka yi Fîə

Ndzaŋ Mbɔʼ Pɔ́ pə́ Əsê pó Fɛ̂

¹ Pəlimə́ mə, pəg loonə̂ ńgə́ nə́ jî ndzaŋ Əsê a kə nɨd nə́ apɔŋə́ntə́əmə ajíə á mə́m mənkyeetə mə́ pɔ́ pə́ Əsê á Masedonya.

² Akwaʼlə a lánə ńchîə á mə́m pó ńdaŋə̂ á mə́m məngə́ʼ pó nə ńchî nə́ á mə́m ə́wə́, lə́ akɔŋtə á nə ńchígə́ ńdwɛ́nkə məntɨ́ móobə́, mbô mɔ́b mə́ pyádnə ŋ́ŋáʼnə á mə́ fɛ̂ nə́ páʼ pó nə ḿbǎ nə́ tə ḿbə́ pə́ pəpóŋ lə́.

³ Maŋ fiʼtə̂ áwɨ́ ńgə́, pó nə fɛ̂ tə ńkoʼ ndzaŋə ándó mbɔʼ pó nə́ fɛ̂, tə ḿbɨ́ ńtsɛ ndzaŋ pó nə ńtúg nə́, təghə́ ŋwu tsə̌ a fyáalə ághóobə́

⁴ pó nə ḿbóʼmbô nə́ pəg tə ńněe ńgə́ pəg fɛ̂ əseenə á mbô pó, pó néŋə azóobə́ apô á mə́ kwá nə́ pɨ pə́ Əsê Judya.

⁵ Pó nə faʼ ńtsɛ ndzaŋ pəg nə ńtə́ nə́ ńkwaŋə̂. Pó kə peg ə́fɛ̂ məmbɨ móobə́ á mbô Mmaʼmbîə, ḿbɨ ńkə́ fɛ̂ məmbɨ móobə́ á mbô pəg tsɔʼə ndzaŋ Əsê a kə lɔ nə́.

⁶ Pəg tíʼə ḿbóʼmbô nə́ Taatus páʼ a nə chwáakə nə́ afaʼ zɨ́d zɨ ńgə́ a ghɛn nə́ mbi á mə́ kwá nə́ áwɨ́ nə́ məgtə̂ afaʼə apɔŋə́ntɨ́ zɨ́d zəənə́ á tətɨ pəənə́.

⁷ Pɨ pyádnə foʼ nə́ ajúmə atsəm nə́ túg nə́, á mə́m mbimə́, á mə́m ndú nə́ fɛ̂ nə́ atséebə Əsê ə́wɨ́ ńdzoŋ ḿbéenə ajíənuə azɨ́ ə́wɨ́ ḿbɨ ńkə́ ḿbə́ ndzaŋ nə́ kɔŋ nə́ á mə́ kwáatə nə́ pəənə, ḿbɨ ḿbə́ nə́ akɔŋnə nə́ túg nə́ ńté áwə́gə́. Ńdaŋ ə́lɨ́d pəg lɔ ńgə́ mbô mɨ́ mə́ kə́ ŋáʼnə á mə́m afaʼə apɔŋə́ntɨ́ zɨ nə́ fɛ̂ nə́ məfɛ̂nə á mə́ kwáatə nə́ pɨ pə́ Əsê wɨ́ lə́.

⁸ Maŋ kě ə́sóŋə ə́lɛ̌ ə́fyáalə áwɨ́ lə́ fyád nə́ pô; Ndzaŋ páʼ maŋ nɨd nə́ ndzaŋə ándó pɨ pətsə́ pó kɔŋtə̂ nə́ á mə́ kwá nə́ lə́, maŋ loonə̂ lə́ á mə́ jɨ́ nə́ ndzaŋ páʼ akɔŋnə azə́ənə́ á pə́ nə́ ndə̌ŋdəŋə́.

⁹ Ńté ńgə́ nə́ jîə apɔŋə́ntə́əmə Mmaʼmbî əwɛ̂n Yeso Klisto, a nə ḿbǎtə ə́foʼ lə́ ḿbə́ ńgɛd mbɨ əjǐ a mə́ pə́ nə́ mbóŋ ńté áwə́ənə́, ńjî ńgə́ nə́ tíʼ ḿbə́ pəfoʼ ńté apóŋə ajíə.

¹⁰ Akwaŋə anu mə lə́ ńgə́, á pɔŋ ńgə́ pɨ məgtə̂ anu páʼ pɨ nə ńchwáakə nə́ á ngoʼ páʼ ə́ nə ńdaŋ nə́, pɨ nə ńkě mbi kwá lə́ tsɔʼə á mə́ faʼ nə́ pô, pɨ nə ńkə́ ńkwá mbi lə́ nə́ ndzaŋ pɨ kɔŋ nə́ á mə́ faʼ nə́.

¹¹ Ghɛn nə́ nə́ mbi ḿməgtə̂ afaʼə azə́ənə́! Tə́g nə́ atûə á mə́ məgtə̂ nə́ afaʼə azɨ́ ndzaŋ páʼ pɨ nə́ ńtyáŋtə nə́, ńkə́ ə́faʼə̂ ázɨ́d nə́ azə́ənə́ ajúmə atsəm nə́ túg nə́.

¹² Təmbɔʼ nə́ kɔŋə̂ á mə́ fɛ̂ nə́ tə ḿbə́ Əsê a yǐ peg məfɛ̂nə mɨ́ ńdaŋə̂ á ndzəmə ajú nə́ túg nə́ á mə́ fɛ̂ nə, ńkě laŋə̂ á pə́ á ndzəmə ajú nə́ kě nə́ túg pô.

¹³ Maŋ kě sóŋ lə́ ńgə́ pɨ pətsə́ pó chîə ághɔ́b tə faʼ, afaʼə a tíʼə ńjíʼə áwɨ́ pô,

¹⁴ á mə́ ghɛd nə́ ńgə́ mənu mə́ nyi ndə̌ŋdəŋ, ndzaŋ páʼ apeʼə azə́ənə́ á nɨ́ nə́ əghâ nə́ lə́, nə́ kə́ fɛ̂ nə́ ndú páʼ á yǐ nə́ koʼ nə́ mənu móobə́, ńjî ńgə́ əghâ nə́ kě nə́ túg pô apeʼə azɔ́b yə nɨ́ nə́ á tíʼ ńkoʼ nə́ məmɨ́ mənu ńdaŋ ə́lɨ́d mənu mətsəm mə́ tíʼ ḿbə́ ndə̌ŋdəŋə́.

¹⁵ Tsɔʼə ndzaŋ páʼ aŋwaʼlə Əsê á sóŋ nə́ ńgə́, “Ŋwunə a nə́ ńkyeetə̂ nə́ á nɨ́ a nə ńkě túgə á nɨ́ tə́shú pô, ŋwunə a kə kə́ nə́ ńkyeetə̂ á kə́g, a nə kě túgə á kə́g tə́shú pô.”

Taatusə pópə Ngaŋmə́ko Əjíə

¹⁶ Pəg láʼkə Əsê ndzaŋə ándó a ghɛd nə́ Taatusə a túg ntɨ́ yi əshîʼnə ḿbyádnə ńdoonə̂ á mə́ kwá nə́ áwɨ́ tsɔʼə ndzaŋ pəg nə́ ńtúg nə́ lə́.

¹⁷ A nə ńkě pí lə́ tsɔʼə anu pəg nə́ sóŋ nə́ ńgə́ a faʼ pô, ndzaŋə a nə ńdánə nə́ ńtə́gə atûə á mə́ kwá nə́ lə́, ńtíʼ ńgyǐəə á mbô pəənə́ á nkɔŋ yə́.

¹⁸ Pəg túmə yí pó táʼ ndim yitsə̌ páʼ pə́ lánə nə́ ńgóʼkə yí á mə́m mənkyeetə mə́ pɔ́ pə́ Yeso mətsəm ńdaŋə̂ á mə́m afaʼə ají páʼ a náŋkə nə́ nkɨ yi əshîʼnə.

¹⁹ Lə́ kě tsɔʼə ə́lɨ́d pô, mənkyeetə mə́ pɔ́ pə́ Əsê mə́ nə ńtsɔ́ʼə yí ńgə́ a nyinə̂ á ndzɔʼ pəg ndzaŋ pəg faʼ nə́ afaʼə akɔŋtə zɨ ńté nəgháʼ Mmaʼmbî ə́ ńkə́ ńtû ńnɨd ńgə́ pəg kɔŋə̂ á mə́ kwáatə nə́ pəənə.

²⁰ Pəg lɔg ndɛd ńgə́ kɔ pɨ pə́ ŋwuntə̂ ńté ndzaŋə ándó pəg kwá nə́ əpú pɨ páʼ pɨ pó fɛ̂ nə́ nə́ ntɨ́ əghɔ́b ətsəm lɛ ə́faʼə̂ nə́ pə́ələ́.

²¹ Ńté ńgə́ pəg tsɔ́ʼə á mə́ faʼ nə́ anu páʼ a koʼnə̂ nə́ á mbi Mmaʼmbî ńkə́ koʼnə̂ á mbi pɨ pə́ mbîə.

²² Ńdaŋ ə́lɨ́d pəg túmə a ndim əwəg pó po, páʼ pəg zéʼ nə́ yí ńkə́ ńdzɨ́ ńgə́ a tə́gə atûə ají nə́ mənu mimə nɨ́ nə́. Nə́ pə́ əghâ nə́ a pyádnə ńtə́gə atûə ají ńtsɛ ndzaŋə a nə ńchî nə́ á ntsɛɛmbi ńté ńgə́ a pyádnə néŋ ntɨ́ əyí nə́ pəənə́.

²³ Ńgɛn nə́ Taatus lə́ ŋwu pəg yí faʼ nə́, ḿbəənə̂ noolə̂ faʼə̂ á mbô pəənə́. Ńgɛn nə́ pəlim pə́g, pó lə́ məntúmə á mbô mənkyeetə mə́ pɔ́ pə́ Yeso, á mə́ fɛ̂ nə́ nəgháʼə á mbô Klisto.

²⁴ Lə́ pə́ ńgə́ pɨ nəələ̂ akɔŋnə azə́ənə́ á mbô pó ńjî ńgə́ mənkyeetə mə́ pɔ́ pə́ Yeso mətsəm mə́ pyádnə ńdzɨ́ ńkə́ ńjî ńgə́ pəg kə təələ̂ ńté áwɨ́ lə́ á pə́ ńkoʼnə̂.