2 Kɔlintyanə 7 - Əka yi Fîə

¹ Pəshunə́ mə, Əsê a nə ńgɛd ndɛn məndaʼnə ghɛn ətsəm lə́ á mbô pɛnə̂. Ńdaŋ ə́lɨ́d pɛn chîə á mə́ sog nə́ məmbɨ mɛn ńjî ńgə́ ajúmə atsəm páʼ ä dɔtə̂ nə́ na mbɨ pó ajwi á fɛ́lə, ńjî ńgə́ pɛn ŋwaʼ ńgɛn fyag ńdaŋə̂ á mə́mə apɔ́gə Əsê.

Ndzaŋ Pɔlə a nə Ńkɔŋtə̂ nə́ Ńté Nkyeetə Pɔ́ pə́ Əsê á Kɔlintyanə

² Ŋáʼ nə́ məntɨ́ mə́ənə́ á mbô pəg ńté ńgə́ pəg kě anu yətsə́ á mbô ŋwu tsə̌ fankə̂ pô, ńkë ŋwu tsə̌ fɨg pô, ḿbɨ ńkě ŋwu tsə̌ kə́ fɨg ńkwáalə ajúmə ají pô.

³ Maŋ kě zɨ sóŋə lə́ á mə́ néŋ nə́ filə apa pɨ pô, ńté ńgə́ maŋ nə́ ḿbeg sóŋə á ntsɛɛmbi ńgə́ pəg túgə áwə́ənə́ a məntɨ́ pəg əshîʼnə. Á mə́ kwû nə́ lə́ pɛnə̂, á mə́ chî nə á mbî lə́ pɛnə̂.

⁴ Maŋ zá ńtəələ̂ ńté áwə́ənə́, ńtúgə a tə́kɔʼ kətɨd ńté áwə́ənə́. Ntə́əmə mə lwɛ́nkə nə́ mbwɔ́dnə. Pɛn pǎtə ńchîə á mə́m məngə́ʼ lə́ ntə́əmə mə pɛ́d ńchî nə́ akɔŋtə.

⁵ Á nə ḿbə́ pə́ ndɛd pəg nə́ ńgyǐ nə́ ńkwúnə á Masedonya lə́ akéenə á chîə á mbɨ pəgə́, lə́ məngə́ʼ mimə nɨ́ nə́ mə́ yǐəə á mbɨ pəgə́ á məndúmə məndúmə, pəg sáʼnə pəg pə́ pəənə apeŋə́ ḿbɨ ńtúgə apɔ́gə á mə́m məntɨ́ pəgə́.

⁶ Lə́ Əsê páʼ a legtə̂ nə́ məntɨ́ mə́ pɨ pó fɨnə̂ nə́, a kə legtə̂ məntɨ́ mə́g ńdaŋ nə́ Taatus páʼ a kə tú nə́.

⁷ Lə́ kə kě tsɔʼə mə yǐ nə́ mí páʼ mə́ nə ńgɛd nə́ mbɨ əzəg pɔŋ pô, lə́ kə kə́ ḿbə́ ándó a kə fiʼtə̂ nə́ áwə́g ndzaŋ pɨ nə néŋ nə́ ntɨ́ əyíə. A kə fiʼtə̂ áwə́g ndzaŋə ándó pɨ nə ḿbyádnə nə́ ńdoonə̂ á mə́ zɨ́ nə́ mə, ndzaŋə ándó pɨ fɨnə̂, ḿbɨ ḿbə́ ndzaŋə ándó pɨ tɨ́ nə́ ńkoʼnə̂ mə́ tɔ́mtə nə́ mə. Zɨ́d zəənə́ á ghɛd maŋ pɨ ḿbyádnə ńchígə́ ńkɔŋtə̂.

⁸ Maŋ nə ḿbǎtə ńgɛd pɨ fɨnə̂ ńté aŋwaʼlə maŋ nə ŋwaʼlə̂ nə́ á mbô pɨ lə́, maŋ kě sɔbnə̂ ńgə́ maŋ nə́ ŋwaʼlə̂ pô. (Maŋ kə sɔbnə̂ ńté lə́ ńgə́ aŋwaʼlə yə wɨ́ á nə ńgɛd nə́ fɨnə̂, nə́ kə pǎ nə́ tə ə́fɨnə̂ tsɔʼə nə́ akəmə ndɛd lə́.)

⁹ Nə́ pə́ əghâ nə́ maŋ kɔŋtə̂ ńkě té á pə́ ńgə́ maŋ nə ńgɛd pɨ fɨnə̂ pô, lə́ ntê á pə́ ńgə́ afɨnə azə́ənə́ a nə ńgɛd pɨ kwúblə ə́fɛ́lə á mə́m təpɔŋ əwəənə́. Əsê kə lɔg nə́ afɨnə azɨ́ ə́faʼ nə́ zə́ələ́, lə́ á pə́ ńgə́ pəg nə ńkě lə́ anuə təpɔŋə á mbɨ pɨ ghɛd pô.

¹⁰ Ńté ńgə́ afɨnə Əsê ä faʼ nə́ nə́ zɨ́d, a ghɛlə̂ pɨ pö kwúblə məntɨ́ mɔ́b ə́fɛ́lə á mə́m təpɔŋ əghoobə́, akwúblə ntə́əmə ä tíʼə ńgɛlə̂ pɨ pó chwáalə, mbô akwúblə ntɨ́ zɨ kě nə́ afɨnə yǐəə pô, lə́ afɨnə páʼ á pə́ nə́ yə mbî, a yǐəə nə́ nəwûə.

¹¹ Zɨ́ nə́ anu páʼ Əsê a ghɛd nə́ nə́ afɨnə zɨ́ zə̂. Zə́ələ́ a ghɛlə̂ nə́ tséebə məntɨ́ mə́ənə́, ḿbəənə̂ fǔəlóʼə á mə́ nɨd nə́ ńgə́ pɨ lə́ pəpóʼ pə́ ngaŋə, zɨ́ nə́ azáŋə́ndé pópə apɔ́g pɨ túg nə́, Zɨ́ nə́ ndzaŋ pɨ kə pyádnə nə́ ńdoonə̂ mə́ jɨ́ nə́ áwə́gə́, zɨ́ nə́ ndzaŋ pɨ nə ḿbóʼnə nə́ ńté áwə́gə́, zɨ́ nə́ ndzaŋ pɨ nə́ ńtúg nə́ ntə́əmə á mə́ fɛ̂ nə́ atsáŋə á mbô pɨ pó nə ńgɛd nə́ təpɔŋə. Pɨ nəələ̂ á mbô ŋwu ntsəm ńgə́ pɨ kě áwə́ənə́ anu yətsə́ fankə̂ á mə́mə anu yə wɨ́ pô.

¹² Lə́ á pə́ ńgə́ maŋ nə́ ḿbǎtə ŋwaʼlə̂ aŋwaʼlə yə́ ə́wɨ́ á mbô pɨ lə́, maŋ nə ńkě ŋwaʼlə̂ ńté lə́ a ŋwu páʼ a fankə̂ nə́ anu zɨ pô ńkě kə́ ŋwaʼlə̂ ńté lə́ ŋwu pə́ a fankə̂ nə́ anu zəənə́ á mbô yí pô, maŋ kə ŋ́ŋwaʼlə̂ lə́ ńgə́ á ŋwaʼə̂ atû pəənə á mbi Əsê ndzaŋ pɨ lánə nə́ ə́fɛ̂ məmbɨ mə́ənə́ á mbô pəgə́.

¹³ Lə́ ghɛd ə́lɨ́d afɨnə azə́gə́ á měe. Lə́ nə ńkě tsɔʼə ńgə́ afɨnə azə́gə́ a měe pô, pəg nə ḿbɨ ḿbyádnə ńchîə á mə́mə akɔŋtə ndzaŋ pəg nə ńdzɨ́ nə́ Taatusə a chîə á mə́mə akɔŋtə ńdaŋ nə́ ndú páʼ pɨ pətsəm nə́ ńkwáatə nə́ á mə́ ghɛd nə́ ntɨ́ yí pwɔ́dnə.

¹⁴ Maŋ nə ńtə́ ńtəələ̂ ńté áwə́ənə́ á mbô yə́, pɨ pɛn ńkě nətɛ́nə mə á ndəsê soŋ pô. Pəg kə́ zá ńtséebə ndə̌ŋdəŋə́ á mbô pəənə́, á pɛn ńkə́ ḿbə́ tsɔʼə ndzaŋə ándó pəg kə túg nə́ kətɨd ńté áwə́ənə́ á mbô Taatusə a fɛ́d ḿbə́ ndə̌ŋdəŋə́ lə́.

¹⁵ Ńdaŋ ə́lɨ́d akɔŋnə ají ńté áwə́ənə́ ä kwíŋə ńtyantə̂ əghâ atsəmə ándó a kwumtə̂ ndzaŋə ándó pɨ pətsəm kə lɛ́ɛlə nə́ á mə́ zóʼnə nə́ məntəgə́ míə, akɔŋnə ají ńté áwə́ənə́ á kə ḿbɨ ńkwíŋ ndzaŋə ándó pɨ nə ńdɔg nə́ yí əshîʼnə á mə́m pɨ nə́ apɔ́g ńdzoŋə̂ ḿbɛ́nkə.

¹⁶ Maŋ kwéʼnə ńkɔŋtə̂ lɛ titi, ńté ńgə́ mbɔʼ maŋ zə́ʼnə nə́ pɨ nə́ ntə́əmə mə ətsəmə.