2 Kɔlintyanə 6 - Əka yi Fîə

¹ Ndzaŋə ándó pɛn faʼ nə́ pɛn pə́ Əsê lə́, pəg póʼ mbô nə́ pɨ ńgə́ kɔ apɔŋə́ntə́əmə Əsê páʼ a fɛ̂ nə́ nə́ pɛnə̂ á laŋ kətaŋə.

² Ńté ńgə́ Əsê a sóŋ ńgə́, “Ndzaŋ ndɛd kə koʼnə̂ nə́ á mbô maŋə á mə́ faʼ nə́ anu yə əshîʼnə á mbô pɨ lə́, maŋ nə ńdzóʼə atséebə azə́ənə́. Ndzaŋə alě á kə koʼnə̂ nə́ á mə́ chwádkə nə́ áwɨ́ lə́, maŋ kə́ ńkwáalə áwə́ənə́.” Jwə́ʼtə nə́! ndɛd ə́ koʼnə̂ nə́ á mbô Əsê á mə́ faʼ nə́ əshîʼnə á mbô pəənə́, ə́sɛ̂n lɛ̌ lə́ alě pə́ yǐ nə́ chwádkə pəənə.

³ Pəg kě tə́ ńdoonə̂ ńgə́ ŋwu tsə̌ a fɛ̂ fid ńté afaʼə azə́g pô. Lə́ ghɛd ə́lɨ́d pəg kě loonə̂ mə́ tə́g nə́ kɨ́ʼə́ á alaŋə́ ndú ŋwu tsə̌ pô.

⁴ Lə́ á mə́m anuə atsəm pəg faʼ nə́ zɨ́d, pəg nəələ̂ lə́ ńgə́ pəg lə́ ngaŋə́faʼ Əsê, á mə́ wam nə́ ntə́əmə á mə́m məngə́ʼə, á mə́m mənu mə̈ tsɛ nə́ áwə́gə́, pó pətsə́ ətyǎntə mənu chî nə́ á ndu mbîə.

⁵ Pə́ nə shúmə áwə́gə́, ə́fwɔnə̂ áwə́gə́ á nkáʼə atsáŋə, apoŋə pəənə á chúʼ ntso nə́ pəgə́, pə̈g faʼə̂ tə́shúnə́, ə́sámkə pəlê ḿbəənə̂ ńchîə nə́ njiə.

⁶ Lɛ̌ mənu mə́ nɨd nə́ ńgə́ pəg lə́ ngaŋə́faʼ Əsê: məntɨ́ mə́g mimə ŋwaʼ nə́, ajíənuə, awaamə́ntə́əmə, əshîʼnə əwəg, Ajwǐəsê, ndə̌ŋdəŋə́ akɔŋnə əwəgə́,

⁷ ndə̌ŋdəŋ nkɨ əwəg ḿbɨ ḿbá mətɨ mə́ Əsê. Pɛn túg mə tɨ́ nə́ ndə̌ŋdəŋə́ ándó məkɔŋ mə́ ntso mɛ́nə, á mə́ lɔg nə́ póʼnə ntso ə́wə́ ə́ kə́ lɔg kɨ́ʼ mbɨ əzɛ̂n wə́.

⁸ Pɨ pətsə́ pó ghóʼkə áwə́gə́, pətsə́ pə́ wágə áwə́gə́, pətsə́ pə́ pəənə̂ ńdzɔmtə̂ áwə́gə́, pətsə́ pə́ ŋáŋkə áwə́gə́, Pətsə́ pə́ tséebə mənu mə́ təpɔŋ ńté áwə́gə́, pətsə́ pə́ tséebə mənu mimə əshîʼnə. Pə́ lɔgə̂ áwə́gə́ ándó ngǎŋntsəələ lə́ pəg pə́ ńtséebə lə́ ndə̌ŋdəŋə́.

⁹ Pəg chîə ándó pɨ pə́ kě nə́ áwə́g jí pô, lə́ ŋwu ntsəmə a pə́ ńjîə áwə́gə́, ándó pəg tə́ ńkwûə, tsɔʼə ndzaŋ nə́ zɨ́ nə́ lɛ̌, pəg chîə á mbîə. Pə́ pǎtə néŋə atsáŋə á mbɨ pəg lə́, pəg pə́ ńkě kwû pô.

¹⁰ Pəg pǎtə ńchî nə́ afɨnə lə́, ḿbə́ ńkə́ ńkɔŋtə̂ tsɔʼə kɔŋtə̂ nə́, ńchîə ándó pəg póŋ lə́ ḿbə́ ńgɛd pɨ pipə nɨ́ nə́ pó foʼə̂, ḿbɨ ńchîə ándó pəg kě ajûtsə́ túg lə́, ḿbə́ ńdánə ńtúgə ajúmə atsəmə.

¹¹ Pəshunə́ á mə́m kɔlin, pəg tsáb ntɨ́ əwə́gə́ á mbô pəənə́, ḿbɨ́ ńkə́ ŋ́ŋáʼkə məntɨ́ mə́g mətsəmə á mbô pəənə́.

¹² Pəg kě məntɨ́ mə́gə́ á mbô pɨ kə́bkə pô, lə́ kə́bkə pɨ ńkə́bkə məmə́ənə́.

¹³ Mäŋ tsáb əghâ nə́ ándó pɨ pə́ pə́ póonə mə, nɨd nə́ akɔŋnə á mbô pəg tsɔʼə ndzaŋ pəg kə́ nə̈ ńnəələ̂ á mbô pɨ lə́. Chígə́ nə́ ŋáʼ məntɨ́ mə́ənə́.

Lɔg nə́ Ndɛd Ńgə́ Kɔ Pɨ Pó Kě Nə́ Əsê Pí Pô Pó Fɨgə̂ Áwə́ənə́

¹⁴ Kɔ nə́ láʼ ńtsɛntə̂ ə́faʼ pɨ̌pə Pətəpǐsê, ńté ńgə́ mbɔʼ á kě nyi pô. Təmbɔʼ anuə a koʼnə̂ nə́ pó təpɔŋ təbə̂ ako lə́ ə́lɛ́? Təmbɔʼ nkyaʼ pó ndzəmə tíʼ táʼ lə́ ə́lɛ́?

¹⁵ Təmbɔʼ Klisto pó Dɛbəəl ə́ pímnə lə́ ə́lɛ́? lə́ akə̂ anu páʼ ŋwunə a néŋ nə́ ntɨ́ nə́ Yeso a túg nə́ á mə́ faʼ nə́ pó tə néŋ ntɨ́ nə́ yə́?

¹⁶ Təmbɔʼ Ndɛ̂ ə́ pə́ nə́ yi Əsê ə́ pímnə pópə məsê mə́ mbî lə́ ə́lɛ́? Ńté ńgə́ pɛn lə́ ndɛ̂ ə́ pə́ nə́ yi Əsê páʼ ə́ chî nə́ mbîə. Tsɔʼə ndzaŋ Əsê nə́ nkɔ̌ʼmbɨ əyí a sóŋ nə́ ńgə́, “Maŋ yǐ chîə á mə́m pó ə́ kə́ nyinə̂ á ńdzɔʼ pó, ə́ pə́ Əsê əzoobə́ pó kə́ ńtíʼ ḿbə́ pəənə mə.”

¹⁷ Ńdaŋ ə́lɨ́d Mmaʼmbîə a sóŋ ńgə́, “Nə́ yǐ shib mɛdtə̂ ághóobə́ ə́fóg mbɨ əzəənə́ á mə́m pó. Kɔ nə́ túgə anu yətsə́ pɨ̌pə mənu mə́ kě nə́ ŋwaʼ pô, ńjî ńgə́ maŋ pímə áwə́ənə́.

¹⁸ Maŋ yǐ pə́ lə́ Tǎ əwəənə́, Nə́ pə́ póonə mə pi pə́ mbyâŋnə pópə pi pə́ pəngyě lə́ sóŋ Mmaʼmbîə páʼ a tsɛ nə́ ajúmə atsəmə.”