2 Kɔlintyanə 3 - Əka yi Fîə

Ngaŋə́faʼ Əka yi Fîə

¹ Á chîə á pə́ ándó pəg pɨ ńtíʼə fítə pə́ məmbɨ mə́g ndzaŋ pəg koʼnə̂ nə́ lə́ ə́lɛ́? Pəg kě chîə á mə́ ŋwaʼlə̂ nə́ aŋwaʼlə ə́fɛ̂ á mbô pɨ kɨ kwáalə aŋwaʼlə á mbô pɨ á fítə nə́ áwə́g ńgə́ pəg koʼnə̂ pô. Kɨ pəg tə́ ńdɔ mbô ŋwaʼlə̂ yi wə́?

² Pɨ nə́ nkɔ̌ʼmbɨ wɨ lə́ aŋwaʼlə azə́g pəg ŋwaʼlə̂ nə́ á mə́m məntɨ́ pəənə́. Ŋwu ntsəmə a yǐ jîə zə́ələ́, ŋwu ntsəmə a kə́ fóŋə.

³ Pɨ nɨd ńgə́ pɨ lə́ aŋwaʼlə páʼ Klisto a ŋwaʼlə̂ nə́, lə́ aŋwaʼlə yəwə́ á pə́ ńdaŋ lə́ á mbô pəgə́. Pə́ kě lə́ nə́ nkɔŋə́ aŋwaʼlə ŋwaʼlə̂ pô, pə nə ŋwaʼlə̂ lə́ nə́ Ajwi páʼ á pə́ nə́ yə Əsê páʼ ə́ chî nə́ á mbîə, pə nə ńkě lə́ á ndú məngɔʼ ŋwaʼlə̂ pô ḿbə́ ŋwaʼlə̂ lə́ á mə́m məntɨ́ mə́ pəənə.

⁴ Pɛn tséebə ə́lɛ̌ lə́ ńté lə́ Klisto páʼ a ghɛd nə́ pɛn zə́ʼnə nə́ Əsê tsɔʼə tə apɔ́gə.

⁵ Pəg tséebə ə́lɛ̌ ńkě té ńgə́ pəg túg mətəənə á mə́ faʼ nə́ anu yətsə́ pô, mətɨ mətsəm mə́ lǒo lə́ á mbô Əsê pəg faʼə̂ anuə atsəm pəg faʼ nə́,

⁶ Əsê páʼ ə́ ghɛd nə́ pəg túg mətɨ á mə́ pə nə́ ngaŋə́faʼə á mə́m əka yi fîə, yi páʼ ə́ pə́ nə́ yə ajwiə, ńkě á pə́ yə aŋwaʼlə pô, ńté ńgə́ nələ́g nə́ aŋwaʼlə nə̈ jwítə, lə́ Ajwiə á pə́ fɛ̂ nchîmbîə.

⁷ Pə́ kə ŋwaʼlə̂ pənoŋkə lə́ á ndu əpag məngɔʼə, nkyaʼ Əsê ə́fɛ́lə əghâ pə́ nə fɛ̂ nə́ pə́ələ́ á mbô Mosisə. Nkyaʼ Əsê yi wə́ ə́ nə́ ḿbǎtə ńtə́ ḿměe yə́ á əshî Mosisə lə́, ḿbə́ ńtyantə̂ nə́ ndú mbɔʼ pɔ́ pə́ Islɛl pó nə ńkě əmə́g mɔ́b nə́ yí tə́g pô. Təmbɔʼ noŋkə ándó wə́ələ́ á jwítə nə́ á kə́ yǐ nə́ ńté mbô nkyaʼ zɨ,

⁸ á pə́ ńgə́ afaʼə ándó páʼ á pə́ nə́ yə Ajwiə a yǐ túgə a nəgháʼ páʼ á nɨ́ nə́ tə ńtíʼ ńchî ə́lɛ́?

⁹ Təmbɔʼ afaʼə ándó zə́ələ́ ä ghɛd nə́ pɨ pə́ wǔ əsáʼ á túgə nəgháʼ, lə́ á pə́ ńgə́ yə ándó páʼ ä ghɛd nə́ pɨ pə́ tɨ́ ndə̌ŋdəŋ, əyǐ nəgháʼə á yǒ nə́ənə á pə́ ə́léenə́?

¹⁰ Təmbɔʼ pɛn sóŋ ńgə́ ndzaŋə ándó páʼ ghɛn nəgháʼ əghâ nə́ á kə ŋwaʼ nə́ tə́shú lə́, nəgháʼ páʼ wə́ələ́ a nə ŋwaʼ nə́ á ntsɛɛmbi a tíʼ ənukə́taŋə, mbɔʼ pə́ tə́gə ághɔ́b yə́.

¹¹ Ńté ńgə́ mbɔʼə ajú páʼ a shwəgtə̂ nə́ a túg mbô nəgháʼ zɨ, á pə́ ńgə́ ajú páʼ a kě nə́ shwəgtə̂ pô əyǐ nəgháʼə a yǐ tíʼ ŋwaʼ tə pə́ ə́léenə́?

¹² Ndzaŋ pɛn túg nə́ akwaŋ ńtə́ ḿbyáabə lə́, pɛn kě apɔ́g yətsə́ túg pô.

¹³ Pɛn kě chî lə́ ándó Mosisə pô, páʼ a kə́ kə́bkə nə́ əshî yí ńjî ńgə́ kɔ pɨ pə́ Islɛlə zɨ́ nkyaʼ yi ŋwaŋkə̂ nə́ zə́ ndzaŋ zɨ́d shwəgtə̂ nə́ ńgɛnə̂.

¹⁴ Pə́ kə fwɔn ətû póobə́, tə ńkoʼə̂ pə́ ə́sɛ̂n pə́ pɛ́d ńkə́bkə ajîə azɔ́b nə́ apagə atsəʼ əghâ ándó pö fóŋ nə́ á mə́m əka yi lɛn wə́ lə́. Təmbɔʼ pə́ ŋáʼə apagə atsəʼ zɨ́d zɨ ńdaŋ lə́ tsɔʼə ndzəm Klisto.

¹⁵ Kɨ tsɔʼə ə́sɛ̂n, əghâ ətsəmə ándó pó fóŋ nə́ a noŋkə Mosisə apagə atsəʼ zə́ á kə́bkə əjî əghóobə́.

¹⁶ Lə́ təmbɔʼ pə́ ŋáʼə zɨ́d tsɔʼə ndzaŋə ándó aŋwaʼlə Əsê á sóŋ nə́ ńté Mosisə ńgə́, “Pə́ nə ŋáʼə apagə atsəʼ ají lə́ əghâ ándó a nə sɛdnə̂ ḿbímə Mmaʼmbîə.”

¹⁷ Əghâ nə́ lə́ Mmaʼmbî lə́ Ajwiə, aliʼə́ atsəm páʼ Ajwiə a Mmaʼmbîə á chî nə́ ə́wə́, afaʼə apoʼə á kě ə́wɨ́ chî pô.

¹⁸ Pɛn pətsəm ándó pɛn kə tsɔ́ʼ nə́ apagə atsəʼ zə́ pɛn náŋə nəgháʼ Mmaʼmbî wə́ələ́ tíʼə ŋwaʼə̂ á mbɨ pɛnə̂. Wə́ələ̈ tíʼə ńkwúblə áwɛ̂n pɛn tíʼə ńkyaʼə̂ ńgɛnə̂ nə́ mbiə á mə́ chî nə́ tsɔʼə ándó yə́. Zəənə́ á lǒo lə́ á mbô Mmaʼmbî páʼ a pə́ nə́ Ajwiə.