2 Kɔlintyanə 2 - Əka yi Fîə

¹ Ńdaŋ ə́lɨ́d maŋ ghɛd ntə́əmə mə ńgə́ maŋ kě á mbô pɨ yǐ pɨ yǐəə á mə́ ghɛd nə́ ntɨ́ ə́wɨ́ ə́ tə́ fɨnə̂ pô.

² Ńté ńgə́ təmbɔʼ maŋ ghɛd nə́ tə́ fɨnə̂, əwə a pɨ ńchî ə́wɨ́ páʼ a yǐ nə́ ghɛd maŋ tə́ ńkɔŋtə̂? Lə́ kě tsɔʼə pɨ páʼ maŋ ghɛd nə́ pɨ fɨnə̂ nə́ yǐ nə́ ghɛd maŋ kɔŋtə̂ pó?

³ Lə́ anu páʼ a nə ńgɛd nə́ maŋ ŋwaʼlə̂ aŋwaʼlə zəənə́ á mbô pɨ lə́ ńté ńgə́; maŋ nə ńkě kɔŋə̂ á mə́ yǐ nə́ á mbô pɨ páʼ nə́ pěʼ nə́ ńchîə á mə́ ghɛd nə́ maŋ tə́ ńkɔŋtə̂ nə́ ghɛd maŋ chîə á pə́ á mə́mə afɨnə pô. Ńté ńgə́ maŋ chígə́ ńjî ńgə́ təmbɔʼ maŋ tə́ ńkɔŋtə̂ pɨ pətsəm kə́ ńtə́ ńkɔŋtə̂.

⁴ Ńté ńgə́ maŋ nə ŋwaʼlə̂ á mbô pɨ lə́ á mə́m mɛ́ ngə́ʼə, ntə́əmə mə ə́ ńtə́ ńjwaʼə̂ mə ńdzoŋ ḿbegə̂ nəkyéŋ ə́wə́ a əmə́g maŋə. Maŋ nə ńkě ŋwaʼlə̂ lə́ mə́ ghɛd nə́ pɨ tə́ fɨnə̂ pô, maŋ nə́ ŋwaʼlə̂ lə́ mə́ nɨd nə́ akɔŋnə yə nɨ́ nə́ páʼ maŋ túg nə́ ńté áwə́ənə́.

Pɛn Ləgnə̂ Əfankəmə́nu Ngaŋə́ghɛlə Təpɔŋə

⁵ Lə́ mbɔʼ ŋwu tsə̌ a ghɛd ndim əyǐə a fɨnə̂, a kě lə́ a mbɨ maŋ ghɛd pô, lə́, a ghɛd lə́ á mbô pɨ pətsəm tə ńkoʼ nə́ ndú yitsə̌. (Maŋ sóŋə ə́lɨ́d lə́ ńté ńgə́ maŋ kě kɔŋə̂ á mə́ tsə́g nə yí tə́shú pô)

⁶ Atsáŋ jɨ páʼ ŋwu yi nɨ́ nə́ a fɛ̂ nə́ lə́, á koʼnə̂ á mbô ńté ŋwu zə̂.

⁷ Nə́ pə əghâ nə́ pɨ tíʼ ńchî lə́ á mə́ ləgnə̂ təpɔŋ əyǐ ə́ tû pwɔ́dkə ntɨ́ əyə́, ńjî ńgə́ kɔ a tə́ fɨnə̂ tə́shúnə́.

⁸ Lə́ á pə́ ńgə́ maŋ póʼ mbô nə́ pɨ ńgə́ nə́ ghɛlə̂ a jî ńgə́ pɨ chígə́ ńkɔŋə̂ yə́.

⁹ Maŋ ŋwaʼlə̂ aŋwaʼlə zɨ ńté lə́ ńgə́ maŋ kə̈ loonə̂ á mə́ jî nə́ ndzaŋ pɨ nə ńtɨ́ nə́ əshîʼnə á mə́mə akwaʼlə, ə́ pɨ kə́ jî ńgə́ kɨ pɨ ə́lɛ́ ńchî təmbɔʼ nə́ zóʼnə məntəgə́ mə əghâ ətsəmə?

¹⁰ Ŋwu ntsəm páʼ pə́ ləgnə̂ nə́ pətəpɔŋ pí, maŋ yǐ kə́ ləgnə̂ azéemə. Anuə atsəm maŋ ləgnə̂, təmbɔʼ maŋ pěʼ ḿbeg ńdəgnə̂ anu yətsə́, mäŋ ləgnə̂ ńté lə́ áwə́ənə́ á mbi Klisto,

¹¹ Pɛn faʼə̂ ə́lɛ̌ lə́ ńté ńgə́ kɔ Satanə a tsɛɛlə̂ áwɛ̂n, ńté ńgə́ pɛn jî məsê mə́ ndú míə.

Pɔlə a Túgə Apɔ́g Ńté Aláʼə Təlowasə

¹² Əghâ ándó maŋ nə ńgyǐ nə́ ńkwúnə Təlowasə á mə́ náŋkə nə́ Nkɨ yi Əshîʼnə ńté Klisto lə́, ńjɨ́ ńgə́ Mmaʼmbîə a kə ŋáʼ ndúmə á mbô maŋ ə́wə́.

¹³ Lə́ maŋ nə ḿbyádnə ńtúgə apɔ́g ńté ńgə́ maŋ nə ńkě mɔ́mɛ́ əwɛ̂n Taatusə zɨ́ pô. Ńdaŋ ə́lɨ́d maŋ tíʼ ə́fɛ̂ mbǒ á mbô pó, ńtíʼ ńgɛnə̂ Masedonya.

Pəg Tsɛɛlə̂ Ajúmə Atsəm nə́ Mətɨ mə́ Klisto

¹⁴ Lə́ maŋ fɛ̂ ndǎ á mbô Əsê! Ńté ńgə́ a nəələ̂ áwɛ̂n nə́ ndú əghâ ətsəm ńgə́ pɛn tə́ ńyinə̂ pɛ̌npə Klisto páʼ a tsɛ nə́ ajúmə atsəmə á ntsoolə. Əsê a lɔgə̂ áwɛ̂n ńgɛlə̂ ńgə́ atsáb ńté Klisto a nyinə̂ aliʼə́ atsəm ándó azagə́ yə ləmkə̂ nə́.

¹⁵ Ńté ńgə́ pɛn chî lə́ ándó azagə́ aleŋ yə ləmkə̂ nə́ páʼ Klisto ä fɛ̂ nə́ á mbô Əsê, páʼ a shamnə̂ nə́ á mə́m pɨ pə́ chwád nə́ ńkə́ shamnə̂ á mə́m pɨ pə̈ péŋ nə́.

¹⁶ Á mbô pɨ pətsɨ́ lə́ azagə́ páʼ ä yǐ nə́ nə́ nəwûə, nə́ pətsɨ́ á pə́ azagə́ páʼ ä fɛ̂ nə́ nchîmbîə. Lə́ əwə a koʼnə̂ nə́ mbɔʼ a faʼ ndɛn mənu ghɛn ətsəmə?

¹⁷ Pɛn kě chî lə́ ándó pətsə́ pɨ tə nə́ənə ándó pó lɔg nə́ atséebə Əsê ə́sɛd əpú məta pə́ fi nə́ pô, ńté ńgə́ Əsê a túmə áwɛ̂n, pɛn tséebə a ndə̌ŋdəŋ əwɛ̂nə á mbi yə́ ándó ngaŋə́faʼ Klisto.