2 Kɔlintyanə 11 - Əka yi Fîə

Pɔlə pópə Məntú mə́ Yeso Mimə Məfɨgə

¹ Maŋ póʼmbô ńgə́ təmbɔʼ nə́ nyáʼ ńgwam məntɨ́ mɨ́ nə́ maŋ ńté akəkógə́ mə. Maŋ jî ńgə́ nə́ pɛ́dtə ńtə́ ńgwaamə̂ məntɨ́ mɨ́ ńté mə!

² Akwaŋə mə lánə ńtɨ́ nə́ pɨ tsɔʼə ndzaŋ yə Əsê á kə́ nə́ ńtɨ́ nə́ pəənə́. Nə́ chî lə́ chigə ándó mɔ̂ məngyě páʼ a kě nə́ anuə ŋwu mbyâŋnə kə́ jîə pô, yə ándó páʼ maŋ laʼnə̂ á mə́ fɛ̂ á ndzɔʼə́ á mbô táʼ ŋwu mbyâŋnə páʼ á pə́ nə́ Yeso.

³ Maŋ tə́ ḿbɔ́gə ńgə́ pɨ pə́ yǐ tsəŋ məntɨ́ mɨ́ tsɔʼə ndzaŋ nó nə́ ńdɔg nə́ ayáŋə ají yə təpɔŋ zə́ ə́fɨgə̂ Ifə ə́wə́ lə́, nə́ tíʼ mɛdtə̂ mə zoŋ nə́ Klisto ə́ kə́ faʼə̂ á mbô yí nə́ ntɨ́ əwɨ́ ətsəmə.

⁴ Apɔ́gə mə á chî lə́ ńté ńgə́ pɨ zaŋkə̂ ḿbímə a ŋwu ntsəm páʼ a yǐ nə́ á mbô pɨ ə́sóŋə anu ńté Yeso yí ndaʼ ńkě pə́ yi páʼ pə̈g sóŋ nə́ lə́ pô. Pɨ kə́ ḿbímə ajwiə yə ndaʼ páʼ á kě nə́ lə́ Ajwi pɨ kə kwá nə́ lə́ pô, ńkə́ ḿbí nkɨ yi əshîʼnə páʼ ə́ kě nə́ pə́ yi pɨ kə kwá nə́ lə́ pô.

⁵ Maŋ kě kwaŋ ńgə́, “Pətə́kɔʼ pə́ məntú mə́ Yeso” mimə wɨ́ mə́ gháʼ ńtsɛɛlə̂ mə nə́ anu yətsə́ pô.

⁶ Təmbɔʼ maŋ chî jîə á pə́ mə tsáb nə́ pô tə ḿbə́ maŋ túgə ajíənuə, pəg pɛ́dtə ńgɛd zəənə́ á ŋwaʼə̂ á mbô pɨ nə́ ndɛd ntsəmə á mə́mə anuə atsəmə.

⁷ Lə́ nə ḿbə́ anuə təpɔŋ maŋ nə ńgɛd nə́ á mə́ tsóokə nə́ mbəəmə mə ə́ kɔ́ʼkə áwɨ́, á mə́ náŋkə nə́ Nkɨ yi Əshîʼnə á mbô pɨ tə əpítə áwɨ́ nə́ ajûtsə́?

⁸ Maŋ nə ńkwá əpúmə á mbô mənkyeetə mimə ndaʼ á mə́ tú nə́ afaʼə mə maŋ nə faʼ nə́ á mbô pəənə́.

⁹ Əghâ ándó maŋ nə ńchî nə́ pɛn ńgyǐ ḿbóŋə ajú lə́, maŋ kě áwɨ́ jwaʼ pô ńté ńgə́ pəlim pó nə ńdǒ nə́ á Masedonya lə́, pó nə fɛ̂ ajúmə atsəmə á mbô maŋ páʼ maŋ nə̈ ńdɔ nə́. Ńdaŋ ə́lɨ́d maŋ wam mbəəmə mə, ə́ yǐ kə́ ghɛn nə́ mbi, maŋ yǐ kə́ wam mbəəmə mə ə́ kě əwɨ́ nə́ ndú yitsə̌ jwaʼ pô.

¹⁰ Ndzaŋə ándó ndə̌ŋdəŋ Klisto a chî nə́ á mə́m maŋ lə́, ŋwu tsə̌ a kě chîə á mə́m mboʼ Akaya páʼ təmbɔʼ a zɔŋ ńgə́ kɔ maŋ tə́ təələ̂ pô.

¹¹ Maŋ sóŋə zɨ lə́ ńté ńgə́ maŋ kě áwɨ́ kɔŋ? Əsê a jî ńgə́ maŋ kɔŋə̂ áwə́ənə́!

¹² Anu páʼ maŋ faʼ nə́, maŋ yǐ ghɛn nə́ mbiə á mə́ faʼ nə́ zə́ələ́ á mə́ ghɛd nə́ ńgə́ kɔ mətsə́ “məntú mə́ Yeso” mə́ mə́ túgə anu yətsɨ́ təmbɔʼ pó lɔg ńtɨd ə́wɨ́ ńtíʼə ə́sóŋə ńgə́ pó tə́ faʼə̂ tsɔʼə nə́ ndú pəg faʼ nə́ ə́wə́.

¹³ Pɨ pə́ lə́ kě chigə məntú mə Yeso pô, pó lə́ məntú mə́ Yeso mimə məfɨgə; Pö tsɨd ntsɨd ńté afaʼə azóobə́, ḿbəənə̂ sɛd ngwub əzɔb á mə́ chî nə́ ándó chigə məntú mə́ Klisto.

¹⁴ Kɔ á kɨʼnə̂ áwə́ənə́, ńté ńgə́ tsɔʼə Satanə təmbɔʼ á sɛd ngwub əjǐ ńtíʼ ńchîə ándó ntseŋndɛ̂sê páʼ a túg nə́ nkyaʼə!

¹⁵ Lə́ á pə́ ńgə́ lə́ kě tə́kɔʼə anu yitsə́ páʼ təmbɔʼ ngaŋə́faʼ əjí ə́ sɛd ngwub əzɔb á mə́ chî nə́ ándó ngaŋə́faʼ ndə̌ŋdəŋ pô. Á yǐ pə́ a ndwigtə pó kə́ foʼ lə́ chigə ajú məfaʼ mɔ́b mə́ nɨd nə́.

Ndzaŋ Pɔlə a nə Ńdzɨ́ nə́ Ngə́ʼə Ándó Ntú Yeso

¹⁶ Maŋ loonə̂ á mə́ pɨ nə́ sóŋ ńgə́ kɔ ŋwu tsə̌ a kwaŋ ńgə́ maŋ lə́ akəkógə́. Lə́ təmbɔʼ nə́ kwaŋ ə́lɨ́d nə́ lɔgə̂ á mə́ ándó akəkóg ńjî ńgə́ mbɔʼ maŋ kə́ nyáʼ ńtəələ̂ azá mɔ́ əliʼə́.

¹⁷ Anu páʼ maŋ sóŋ nə́ əghâ nə́ lə́, lə́ kě anu mbɔʼ Mmaʼmbîə a kɔŋ ńgə́ maŋ tə́ sóŋə pô; ńgɛn nə́ anu ńté kətɨd ghɛn, maŋ lánə ńtséebə lə́ ándó akəkógə́.

¹⁸ Lə́ ndzaŋə ándó páʼ pɨ pipə nɨ́ nə́ pö tɨd nə́ lə́, lə́ ndaʼ mənu mə́ mbî mə́ ghɛd nə́ pó təələ̂. Maŋ yǐ kə́ təələ̂ azéemə.

¹⁹ Pɨ nə́ nkɔ̌ʼmbɨ ə́wɨ́ pɨ pyádnə ńgyáŋə, ńté ńgə́ pɨ kɔŋtə̂ á mə́ mɛdtə̂ nə́ əkəkóg ə́ kə́ ńchîə azɔ́b ə́wə́!

²⁰ Nə́ mɛdtə̂ ŋwu ntsəmə ándó a sáʼ nə́ áwə́ənə́ kɨ ńgwágə áwɨ́ nə́ ajúmə azə́ənə́ kɨ ńtéemə atəənə́ azə́ənə́ kɨ ńgwágə áwə́ənə́ kɨ ńdɔgə̂ áwə́ənə́ ándó ənukə́taŋə kɨ ńdəb əmə́g mə́ənə́.

²¹ Maŋ túg əsə́ənə á mə́ pí nə́ ńgə́ pɛn kə tə́ ńgɔdlə̂ lə́ tə́shú ńtíʼ ə́faʼ ndɛn mənu wɨ́d wə́. Lə́ anuə atsəmə ándó mbɔʼ ŋwu ntsəmə a tɨd ńté zə́ələ́, maŋ kə́ ńtúg ntɨ́ təmbɔʼ maŋ tɨd ńté zə́ələ́ (maŋ tséebə lə́ ándó akəkógə́.)

²² Pó lə́ Pəyiblus? tə ḿbə́ maŋ lə́ kə́ ḿbə́ ŋwu Iblu. Pó lə́ pɔ́ pə́ Islɛl? Tə́ ḿbə́ maŋ kə́ ḿbə́ lə́ mɔ́ Islɛlə. Pó lə́ ngwud Ablaam? Tə́ ḿbə́ maŋ kə́ ḿbə́ lə́ ngwud Ablaamə.

²³ Pó lə́ ngaŋə́faʼ Klisto? (Maŋ tséebə zɨ lə́ ándó apɛ̌lə) tə ḿbə́ maŋ lə́ chigə wɨ́d ńté ńgə́ azéemə afaʼə á tsɛɛlə̂ azóobə́. Maŋ faʼ mənu mimə nɨ́ nə́, ńtsɛɛlə̂ ághóobə̈, ńkwúnə atsáŋ ńtsɛɛlə̂ ághóobə́, pə́ ə́shúmə mə tə á chaanə̂, əghâ pipə nɨ́ nə́ chî ə́wɨ́ páʼ maŋ tɨ́ nə́ á ntso nəwûə.

²⁴ Nə́ ngǎ tâ Pəjus pó shúmə mə nə́ ngwan məghə́m mɛ́n mə́ teelə́ nə́ ngwan nəpuʼə́.

²⁵ Pəloman pó nə shúmə mə nə́ ngwanə atəənə́ ngǎ teelə́ ḿbɨ́ ńtə́mə mə nə́ məngɔʼ táʼ ngǎ. Maŋ kə́ ńkwúnə á mə́mə aŋkənúʼə́ ngǎ teelə́ á nyi ə́shaʼkə̂ á mə́m nkǐə, táʼ ngǎ a pɨ chî ə́wɨ́ páʼ maŋ nə ńchî nə́ á mə́m nkǐ táʼ nətúʼ pó táʼə alě mbîə, nkǐ twáamə mə ńkɔ́ʼə ḿbəənə̂ ńtsóolə.

²⁶ Á mə́m pə nənyinə mə maŋ nə ńdzá nə́ ńnyinə̂ pɨ́d pipə nɨ́ nə́ lə́, maŋ nə́ ńchîə á ntso nəwûə á mbô mənkǐ mimə kɔ́ʼ nə́ ńdzoŋ ḿbá pəzə̌lə, ńchîə á ntso nəwûə á mbô pəlimə́ mə ḿbɨ ḿbá Pətəjǐsê; maŋ kə kə̈ ńchîə á ntso nəwûə á mə́m pəmɛ́ pə́ pətɔ̂ŋ pó pəkɔŋ pə́ məŋkwâʼlə̌, ńchîə á ntso nəwûə á mə́m nə́ənə pópə pəlim pə́ məfɨgə.

²⁷ Ńchîə á mə́mə afaʼ pópə ngə́ʼə, tsɔʼə tə lê á mə́m mətúʼ mimə nɨ́ nə́, tsɔʼə təghə́ maŋ jîə ajú kɨ ńnô yətsə́, əghâ pipə nɨ́ nə́ maŋ chî tə məjî, əfə́g pəənə̂ ńkóolə mə maŋ kě atsəʼ kə́ ńdzɨ́ maŋ wê pô.

²⁸ Maŋ kě chî təmbɔʼ maŋ sóŋə anu atsəm ńté ńgə́ əlě ətsəm maŋ sɔbnə̂ ńté mənkyeetə mə́ pɔ́ pə́ Yeso mətsəm páʼ maŋ túg nə́ mə́ələ́ a ntɨ́ maŋə.

²⁹ Əghâ ándó ŋwu tsə̌ a pwɔ́d nə́, mbəəmə mə kə́ ḿbóolə; əghâ ándó ŋwu tsə̌ a wǔ nə́ á mə́m təpɔŋ, maŋ chîə á mə́m tə́kɔʼə afɨnə.

³⁰ Təmbɔʼ maŋ tə́ ńtəələ̂ maŋ tɨd lə́ á mə́m mənu mə́ nɨd nə́ ńgə́ maŋ póolə.

³¹ Əsê páʼ a pə́ nə́ Tǎ pə́ Mmaʼmbî Yeso Klisto (Afoʼə a chîə á mbô yí tə mbî láʼ ḿměe!) a jî ńgə́ maŋ kě ntsɨd tsəələ̂ pô.

³² Əghâ maŋ nə ńchî nə́ á Damaskɔsə lə́, nətû páʼ nə́ faʼ nə́ á mbô Əfo Aletas nə́ tə́g ngaŋə́pyáabə əliʼ á ntso tə́kɔʼ tɔ̂ŋ wə́ ńgə́ pó waamə̂ mə.

³³ Lə́ pə́ pə́ ńnéŋə mə á mə́m nka ə́sóokə nə́ ngɔ́d páʼ ə́ chî nə́ a mbɨ nkáʼ yi pɔ́ nə́ ńtsóokə á əsê maŋ tíʼ ńdə́ʼə yə́.