2 Kɔlintyanə 10 - Əka yi Fîə

Pɔlə a Twágtə Atûə Pɨ Ńté Afaʼə Ajíə

¹ Maŋ Pɔlə, nə nkɔ̌ʼmbəəmə mə, maŋə ándó páʼ pə̈ sóŋ nə́ ńgə́ mäŋ pwɔ́dnə əghâ ándó maŋ chî nə́ pɛn ḿbɨ ńtsə́g əghâ ándó maŋ kě nə́ pɛn chî lə́, mäŋ póʼ mbô á mbô pɨ nə́ əlɛ́n Yeso páʼ á tsóokə nə́ mbɨ əjǐ ńkə́ mbwɔ́dnə.

² Mäŋ póʼmbô nə́ pɨ ńgə́ əghâ maŋ yǐ nə́ ńchî pɛn kɔ nə́ fyáalə mə maŋ tsə́g nə́ pɨ ndzaŋ mäŋ tsə́g nə́ á mbô pəənə ándó pö sóŋ nə́ ńgə́ pəg faʼə̂ lə́ ándó pɨ pə́ mbîə.

³ Lə́ ndə̌ŋdəŋ ńgə́ pəg chî lə́ á mə́m mbîə ḿbə́ ńkě póʼnə ntso lə́ ándó pɨ pə́ mbî pô.

⁴ Əpú ntso pɛn lɔg nə́ ḿbóʼ nə́ ntso əwɨ́, lə́ kě əpú ntso ndu mbî pô, lə́ ətyǎntə əpú ntso Əsê páʼ pɛn lɔg nə́ ə́shaʼtə̂ əliʼ pi tyantə̂ nə́ ə́wə́. Pɛn shaʼtə̂ əkwaŋ mənuə ándó pɨ́d kě nə́ koʼnə̂ pô.

⁵ Pɛ̈n shaʼtə̂ mbô kətɨd ntsəm ńkwɛlə̂, páʼ wə́ələ́ á tɨ́ nə́ ándó kɨ́ʼ ńgə́ kɔ pɨ pə́ túgə ajíənuə Əsê, Pɛ́n lɔg əkwaŋ pɨ ətsəm ńnéŋə á nkáʼə atsáŋ ńjî ńgə́ mbɔʼ pɨ pəwɨ́ pó zóʼnə a Klisto.

⁶ Əghâ ándó pɨ yi nə́ pyádnə ə́fɛ̂ mbɨ əzɨ nə́ Əsê tə ḿbə́ pəg yǐ chwíʼtə mbɨ əzəgə́ á mə́ néŋ nə́ áwə́ənə́ á atsáŋ páʼ mbɔʼ nə́ chî zóʼnə pô.

⁷ Pɨ̈ náŋə azə́ənə́ á pə́ ndzaŋ əpú chî nə́ á ndzəmə apeŋə́. Təmbɔʼ ŋwu əwɨ yitsə̌ a chígə́ ńjî ńgə́ yí lə́ ŋwu Klisto a kwaŋə̂ atûə ají nga yitsə̌ ńté ńgə́ ndzaŋ a pə́ nə́ ŋwu Klisto lə́ pəg kə́ ḿbə́ pɨ pə́ Klisto.

⁸ Nə́ əghâ nə́ təmbɔʼ maŋ pěʼ ḿbǎtə ńnyáʼ ńtəələ̂ á pə́ tə́shú ńté mətɨ mə́g páʼ Mmaʼmbîə á kə fɛ̂ nə́ pəg tə́ ńdɔgə̂ ńkwíŋkə áwɨ́ ə́wɨ́ kwíŋkə nə́, ə́ ńkě áwɨ́ nə́ mɨ́d shaʼtə̂ nə́ shaʼtə̂ pô, maŋ kě əshɨ́ yitsə̌ kó ńté ə́lɨ́d pô.

⁹ Maŋ kě kɔŋə̂ á mə́ chî nə́ á pə́ ándó maŋ ghɔdkə̂ áwɨ́ ghɔdkə̂ nə́ aŋwaʼlə páʼ maŋ ŋwaʼlə̂ nə́ ə́fɛ̂ á mbô pɨ lə́ pô.

¹⁰ Ŋwu tsə̌ a yǐ sóŋ ńgə́, “Əŋwaʼlə Pɔlə a ŋwaʼlə̂ nə́ á mbô pɛn, pɨ́d tyantə̂ a kə́ ńtsə́gə á mə́m wə́, lə́ təmbɔʼ á pə́ ńchî pɛ̌npo nə́ nkɔ̌ʼmbɨ əyí a kě tsə́g pô, atséebə ajíə a kě nə́ anu yitsə̌ kə́ ńchî pô!”

¹¹ Ntê ŋwu zɨ́d zə́ ə́ chîə á mə́ jî nə́ ńgə́ mənu pəg ŋwaʼlə̂ nə́ á mbô pó əghâ ándó pəg chî nə́ aliʼə́ ndaʼ, lə́ yi pəg yǐ nə́ faʼ əghâ ándó pəg chî nə́ á mə́m pó.

¹² Pəg kě chîə á mə́ tə́ nə́ fiʼnə̂ nkaŋ kɨ fiʼ mbɨ əzəg pə̂gpə pɨ páʼ pó zɨ́ nə́ mbɨ əzɔb tə́shú pô. Pó chígə́ ńgəənə̂ lɛ ə́lɛ́! Pó ghɛd əghɔ́b fiʼ nəghɔd pó lɔg nə́ fiʼ mbɨ əzɔb ə́wə́.

¹³ Ńgɛn nə́ pəg, pəg kě chîə á mə́ zɨ́ nə́ mbɨ əzəg laŋ ndzaŋə ándó pəg pěʼ nə́ ńchîə á mə́ zɨ́ nə́ pô, lə́ pəg yǐ tɨd koʼ lə́ tsɔʼə nə́ afaʼ Əsê a fɛ̂ nə́ ńgə́ pəg faʼə̂. Zəənə́ á yǐ pegə̂ afaʼ páʼ Əsê a fɛ̂ nə́ ńgə́ pəg faʼə̂ á mə́m pəənə́.

¹⁴ Ndzaŋə ándó pəg kə yǐ nə́ nə́ Nkɨ yi əshîʼnə ńté Klisto á mbô pɨ lə́ ńkě ndɛdtə afaʼ əwə́g laŋ pô, pəg kə pɛlə á mə́mə aliʼ pəg chî nə́ mə́ faʼ nə́ ə́wə́.

¹⁵ Ńdaŋ ə́lɨ́d pəg kě kətɨd yitsə̌ túg ńté afaʼə ándó pətsə́ pɨ pó faʼ nə́ ńdaŋ ndɛtə páʼ Əsê á kə fɛ̂ nə́ á mbô pəg pô. Pəg kwaŋə̂ azə́g lə́ kwaŋ nə́ ńtə́ ḿbyáabə ńgə́ ndzaŋ mbimə́ əzɨ̈ ə́ kwíŋ nə́ lə́ pəg kə́ ńchî təmbɔʼ pəg ghɛd pɨ pipə nɨ́ nə́ pó chî nə́ ḿbáatə áwɨ́ pó zóʼ nkɨ yi əshîʼnə yi wə́.

¹⁶ Pəg tíʼ ńchî təmbɔʼ pəg náŋkə Nkɨ yi Əshîʼnə ghɛn nə́ ətú mbî ə́ laŋ nə́ áwɨ́ ńgɛnə̂ á mbiə, pəg kě kə́ ńchîə á mə́ tɨd nə́ ńté afaʼ páʼ pə́ pɛ́d nə́ tə ə́faʼə̂ zə́ələ́ afɔ ŋwu ndaʼ pô.

¹⁷ Ndzaŋə ándó aŋwaʼlə Əsê a sóŋ nə́ ńgə́, “Ŋwu ntsəm páʼ a lɔ nə́ á mə́ tɨd nə́, a tɨd ńté á pə́ anu Mmaʼmbîə a faʼ nə́.”

¹⁸ Lə́ kě ŋwunə a sóŋ nə́ ńgə́ a tɨ́ ńkoʼnə̂ páʼ pə́ pí nə́ yí pô, lə́ ŋwu páʼ Mmaʼmbiə a sóŋ nə́ ńgə́ a tɨ́ ńkoʼnə̂ páʼ pə́ pí nə́ yə́.