2 Kɔlintyanə 1 - Əka yi Fîə

¹ Aŋwaʼlə zəənə́ á lǒo lə́ á mbô Pɔlə páʼ Əsê a tsɔ́ʼ nə́ ándó ntú Klisto Yeso ndzaŋə a lɔ nə́, ńkə́ ḿbɨ ńdǒo á mbô mɔ́mɛ́ əwɛ̂n Timotiə. Zə́ələ́ á ghɛnə̂ lə́ á mbô nkyeetə pɔ́ pə́ Əsê páʼ ə́ chî nə́ aláʼə Kɔlinə, ḿbɨ ḿbá pɔ́ pə́ əsê pətsəm pó chî nə́ aliʼə́ atsəmə á mə́m Akaya.

² Tǎ əwɛ̂n Əsê pó Mmaʼmbî Yeso Klisto yǐ fɛ̂ apɔŋə́ntɨ́ pó mbwɔ́dnə á mbô pəənə́.

Pɔlə a Fɛ̂ Ndǎ á Mbô Əsê

³ Pɛn fɛ̂ ndǎ á mbô Əsê páʼ a pə́ nə́ Tǎ pə́ Mmaʼmbî əwɛ̂n Yeso Klisto, Tǎ páʼ a túg nə́ akóolə́mə́lə́ŋ, ḿbə́ Əsê páʼ akwáalə atsəmə á lǒo nə́ á mbô yə́.

⁴ A kwáalə áwɛ̂nə á mə́m məngə́ʼ mɛ́n mətsəm ńjî ńgə́ pɛn chî təmbɔʼ pɛn kə́ ńkwá pətsə́ pəənə́ ándó pó túg nə́ ntê məngə́ʼ ntsəmə. Pɛn yǐ lɔg lə́ tsɔʼə akwá páʼ Əsê a fɛ̂ nə́ á mbô pɛn lə́ ə́ lɔg kwáalə ághɔ́b ə́wə́.

⁵ Tsɔʼə ndzaŋə ándó pɛn kə chî nə́ á mə́m məngə́ʼ mə́ Yeso Klisto mətsəm, lə́ ndzaŋə ándó pɛn yǐ nə́ laŋə̂ á mə́m Klisto ə́ kə́ chîə á mə́m tə́kɔʼə akwáalə Əsê atsəmə.

⁶ Təmbɔʼ pəg zɨ́ ngə́ʼ pəg zɨ́ ngə́ʼ lə́ á mə́ kwá nə́ áwə́ənə́ ə́ kə́ chwádkə áwə́ənə́. Təmbɔʼ pə́ kwáalə áwə́g pə́ kə́ ńkwá lə́ áwɨ́ ə́fɛ̂ mətəənə á mbô pəənə́, á mə́ səg nə́ ndzɔʼə́ á mə́mə awaamə́ntə́əmə, á mə́m məngə́ʼ pəg kə́ nə́ ńgwam ntə́əmə á mə́m wɨ́ lə́

⁷ Akwaŋə azə́g pəg túg nə́ ḿbyáabə ńté áwə́ənə́ á tɨ́ ńtyantə̂. Pəg jî ńgə́ tsɔʼə ndzaŋ nə́ zɨ́ nə́ ngə́ʼə ándó pəg lə́ nə́ yǒ kə́ chîə á mə́mə akwá pə́ yǒ nə́ fɛ̂ nə́ pəg lə́.

⁸ Pəlim, pəg loonə̂ lə́ á mə́ kwumtə̂ nə́ áwɨ́ nə́ məngə́ʼ pəg nə́ ńjɨ́ nə́ á mboʼ Esya. Apeʼə ándó pə́ kə́ noŋkə̂ nə́ á ndu pəg, á kə nə́ənə, ńdɛd nə́ ndú páʼ pəg kə kě nə́ akwaŋ yətsə́ pɨ ńtúg ńtə́ ḿbyáabə á mə́ chî nə́ á mbî pô.

⁹ Pəg nə ńkwaŋ ńgə́ pə́ yǐ lə́g əsáʼ əwə́g ə́sóŋ ńgə́ pə́ jwítə áwə́gə́. Lə́ zəənə́ á pə́ ńdɔgə̂ aliʼ ńjî ńgə́ kɔ pɛn zə́ʼnə nə́ mbɨ əzɛ̂nə, ńdzə́ʼnə á pə́ nə́ Əsê páʼ ä júmkə nə́ pəkwûə.

¹⁰ Yí páʼ a nə ńchwádkə nə́ áwɛ̂nə á mə́m tə́kɔʼ ngə́ʼə ándó ghɛnə́, a yǐ ghɛn nə́ mbiə á mə́ chwádkə nə́ áwɛ̂nə. Lə́ nə́ yí páʼ pɛn túg nə́ akwaŋ ńtə́ ḿbyáabə ńgə́ a yǐ chwádkə áwɛ̂n ngǎ yitsə̌.

¹¹ Ndzaŋə ándó pɨ nə ńkə́ nə́ ńtsɛntə̂ á mə́ kwá nə́ áwə́g á mə́m achaʼtə́sê zɨ lə́, lə́ ndzaŋə ándó Əsê a yǐ nə́ zóʼə achaʼtə́sê azə́ənə́ atsəm, ə́fɛ̂ afoʼə á mbô pəgə́, pɨ pipə nɨ́ nə́ pó tíʼ ńkɔ́ʼkə məngye móobə́ á mbô yí ə́fɛ̂ á ndǎ ńté áwə́gə́.

Ndzaŋ Pɔlə a nə Ńkwúblə nə́ Ntɨ́ Əyí nə́ Anuə a kə Chî nə́ mə Faʼ nə́

¹² Lɛ̌ anu pəg tɨd nə́ ńté, məntɨ́ mə́g mə́ nɨd ńgə́ nchîmbî əzəgə́ á ndu mbî, ḿbɨ ḿbə́ nə́ ndzaŋ pɛn chî nə́, lə́ túg əsê ńtúgə áwɛ̂n nə́ ndú páʼ ə́ ŋwáʼ nə́ ḿbɨ ḿbə́ nə́ ndə̌ŋdəŋ páʼ a lǒo nə́ á mbô Əsê ńdaŋ nə́ mətɨ mə́ apɔŋə́ntə́əmə Əsê ńkě laŋə̂ pə́ nə́ ayáŋə ŋwu mbî pô.

¹³ Ńté ńgə́ pəg ŋwaʼlə̂ á mbô pɨ lə́ tsɔʼə ajú mbɔʼ nə́ fóŋ ńkə́ ńdzóʼə, maŋ túgə akwaŋ ńgə́ nə́ yǐ fóŋ ə́ kə́ zóʼə zɨ́d tə koʼə̂ á ndwigtə,

¹⁴ lə́ nə́ əghâ nə́, pɨ zóʼ lə́ tsɔʼə akəmə, alě Mmaʼmbî a yǒ pə́ yǐ lə́ nə́ zóʼə zə́ələ́ atsəmə, ndɛd yi wɨ pɨ tə́ ńtəələ̂ ńté áwə́g ndzaŋ pəg kə́ nə́ ńtə́ ńtəələ̂ ńté áwɨ́ leenə́.

¹⁵ Ndzaŋə ándó ntə́əmə mə nə́ ńkě nə́ koʼlə̂ ńté anu zɨ lə́, maŋ peg ńgyǐəə á mbi pɨ ńjî ńgə́ nə́ yǐ ńtúgə afoʼ nga pɛ̌.

¹⁶ Maŋ kə́ loonə̂ á mə́ ghá nə́ áwɨ́ nə ndɛd maŋ tə́ nə́ ńdaŋə̂ ńgɛnə̂ á Masedonya, ə́ pɨ pəənə̂ Masedonya ə́ ghéenə áwɨ́ ńjî ńgə́ pɨ túmə á mə aláʼə Judya.

¹⁷ Atûə mə á nə ńtə́ ńkoʼlə̂ əghâ maŋ nə ńtə́ nə́ ńdoonə̂ á mə́ ghɛd nə́ ə́lɛ́? maŋ kə́ ńdɔ́btə mənuə mə lə́ tsɔʼə ándó pə́pə̌ ŋwu mbî? Ńtə́əmə mə ə́ sóŋ ńgə́, “Lə́ ə́lə́ələ́, lə́ ə́lə́ələ́” ḿbɨ ńgə́, “Lə́ kě ə́lɨ́d pô, lə́ kě ə́lɨ́d pô” tsɔʼə əghâ yi ə́wɨ́?

¹⁸ Ndzaŋ, Əsê ä faʼ nə́ tsɔʼə anuə ä sóŋ nə́ ńgə́ a yǐ faʼ lə́, ńdaŋ ə́lɨ́d atséebə azə́gə́ á kə kě pə́ lə́ ńgə́, “ ‘Lə́ lə́ələ́’ ḿbɨ ńgə́ ‘lə́ kě ə́lɨ́d pô’ ”

¹⁹ Ńté ńgə́ Mɔ́ Əsê páʼ a pə́ nə́ Yeso Klisto páʼ pə̂gpə Silas nə́ Timoti kə́ náŋkə nə́ nkɨ əyíə á mə́m pɨ lə́, a kə̌ sóŋə̈ ńgə́ “ ‘Lə́ ə́lə́ələ́’ ḿbɨ ńkə́ ə́sóŋə ńgə́, ‘lə́ kě ə́lɨ́d pô,’ ” Lə́ á mbô əyí Yeso lə́ zá ḿbə́ tsɔʼə “lə́ ə́lə́ələ́.”

²⁰ Ńté ńgə́ á mə́m yí ndaʼnə Əsê ntsəm lə́ tsɔʼə ńgə́, “Lə́ ə́lə́ələ́,” Lɛ̌ anu páʼ á ghɛd nə́ pɛn laŋə̂ á mə́m yí ə́sóŋə ńgə́ “Amɛn” ńdɔg ə́fɛ̂ nəgháʼ wə́ á mbô Əsê.

²¹ Lə́ tsɔʼə Əsê nə́ nkɔ̌ʼmbɨ əyí páʼ a ghɛd nə́ pɛn kě koʼlə yətsə́ túg ńté nchîmbî əzɛ̂nə á mə́m Yeso pô. Lə́ kə́ ḿbə́ tsɔʼə Əsê páʼə a tsɔ́ʼ nə́ áwə́g ńgə́ pəg faʼə̂ afaʼə ajíə,

²² ńnéŋ aleŋkə ají nə́ pəgə́ ándó pɨ pí ńtíʼ ə́fɛ̂ Ajwǐəsê á məntɨ́ pəgə́ ándó ntsɛɛmbiə ajúmə atsəm páʼ a yǐ nə́ fɛ̂ á mbô pəgə́.

²³ Maŋ fóŋ əsê ándó ŋwunə a kə̈ zɨ́ nə́ ńgə́ maŋ tséebə lə́ ndə̌ŋdəŋə́. Anuə a nə ńgɛd nə́ maŋ kě á Kɔlin pɨ ḿbɨ lə́ ńté ńgə́ maŋ nə ńkě kɔŋə̂ mə́ pɨ nə́ néŋ ngə́ʼə á mbɨ pɨ pô.

²⁴ Pəg kě loonə̂ á mə́ fyád nə́ áwɨ́ nə́ anu mbɔʼ nə́ shib néŋ məntɨ́ mɨ́ ə́wɨ́ pô. Pəg jî ńgə́ nə́ tɨ́ ńtyantə̂ á mə́m mbimə́ əzəənə́. Pəg pə́ ńdoonə̂ ńgə́ pɛn nɔd ə́faʼ nə́ ndú páʼ pɨ yǐ nə́ kɔŋtə̂.