1 Timotiə 6 - Əka yi Fîə

¹ Pɨ pətsəm páʼ pó pə́ nə́ əpoʼ pó chîə á mə́ zóʼnə nə́ Pətǎ pə́ afaʼ pɔ́b nə́ ndú ətsəmə, ńjî ńgə́ kɔ ŋwu tsə̌ a yǐ ńtséebə a təpɔŋ ńté əlɛ́n Əsê ńkə́ ńté ndzeʼkə́ əzɛnə̂.

² Əpoʼ páʼ pətǎ pə́ afaʼ pɔ́b pó pə́ nə́ pɨ pó néŋ nə́ ntɨ́ nə́ Əsê, kɔ pó tyantə̂ atû ńté ńgə́ pó tíʼ ḿbə́ lə́ pəlimə́. Pó pɨ ńchîə pə́ mə́ faʼ nə́ əshîʼnə á mbô pətǎ pə́ afaʼ póobə́, ńté ńgə́ pɨ páʼ pö jî nə́ ape afaʼə azɔ́b lə́ pɨ pó néŋ nə́ ntɨ́ nə́ Əsê ńkə́ ḿbə́ pɨ pó pyádnə nə́ ńkɔŋə̂. Gho chîə á mə́ shib nə́ zéʼkə ə́ kə́ ghɛd pó zoŋ mənu məənə́.

Ndzeʼkə́ Məfɨgə pó Ndə̌ŋdəŋə́ Afoʼə

³ Ŋwu ntsəm páʼ a zéʼkə nə́ ntəgə́ yi ndaʼ, páʼ ə́ kě nə́ pímnə nə́ ndə̌ŋdəŋə́ atsáb Mmaʼmbî əwɛ̂n Yeso Klisto pó, ndzeʼkə́ páʼ ə́ túg nə́ apɔ́gə Əsê,

⁴ ŋwu wɨ́d ghɛnə́ a chî lə́ ándó ŋwunə a kɔ́ʼkə nə́ mbɨ əjǐ ḿbə́ ńkě anu yətsə́ jî pô. A túg ntɨ́ təpɔŋə, ə́fyaʼnə̂ ńté atséebə, ńdaŋ ə́lɨ́d mənuə ándó mɨ mə́ zoŋə̂ yə́: ŋwéetə́, azɔŋə, ndzɔmnə, əkwaŋ təpɔŋ ńté pəənə,

⁵ ḿbɨ ḿbə́ nə́ afyaʼə́ əghâ ətsəmə á mə́m pɨ páʼ pó túg nə́ ntɨ́ yi pəg nə́, ndə̌ŋdəŋə́ á kě tətɨ pó kə́ ḿbɛ́d pô. Pó kwaŋ ńgə́ mə túg nə́ apɔ́gə Əsê lə́ ndúmə á mə́ laŋ nə́ əwɨ́ túgə afoʼə.

⁶ Lə́ təmbɔʼ anǔəsê a pɛ́d ńgɛd ŋwunə a túgə afoʼ ńdaŋ ə́lɨ́d, páʼ təmbɔʼ ngaŋə lɔg ńgə́ ajú páʼ a túg nə́ a koʼnə̂ nə́ yə́.

⁷ Pɛn nə ńkě nə́ ajûtsə́ á ndu ndəsê ghɛn yǐ pô, ə́ yǒ kě kə́ lɔgə̂ ajûtsə́ ghɛn nə́ zɨ́d əghâ pɛn kwû nə́ pô.

⁸ Lə́ pə́ ńgə́ təmbɔʼ pɛn túg tsɔʼə məjî pópə ətsəʼ, á koʼnə̂ á mbô pɛnə̂.

⁹ Lə́ pɨ páʼ pó lɔ nə́ á mə́ pə́ nə́ pəfoʼ pó wǔəə á mə́mə akwaʼlə, ńgwǔəə á mə́m ətéemə, ńdoonə̂ á mə́ faʼ nə́ əkəkóg mənu pipə nɨ́ nə́ páʼ pɨ̈d néŋ nə́ ngə́ʼə á mbɨ pó, ə́shaʼtə̂ nchîmbî əzɔb ńkə́ ńtsəŋkə̂ ághóobə́.

¹⁰ Ńté ńgə́ mə kɔŋ nə́ nkáb lə́ ndú páʼ mbô təpɔŋ ətsəm ə́ fɛ́d nə́ ə́wə́. Pɨ pətsə́ pó lɔ nə́ ndú ətsəmə á mə́ túg nə́ zɨ́d pó laŋ ə́lɨ́d ḿmyaʼ mbimə́ əzoobə́, pó jwaʼ məntɨ́ mɔ́b, ńtíʼ ńtúg əfɨnə pipə nɨ́ nə́ a ntɨ́ pó.

Məntəgə́ Páʼ Pɔlə a nə Fɛ̂ nə́ á Mbô Timotiə

¹¹ Lə́ ḿbə́ ńgɛn nə́ gho, gho páʼ gho pə́ nə́ ŋwu Əsê, gho chîə á mə́ kə nə́ ndɛn mənu wɨ́d ghɛn ətsəmə, ə́ tə́gə atûə pə́ nə́ mə faʼ nə́ mənu páʼ mə́ tɨ́ nə́ ndə̌ŋdəŋə́, ḿbɔ́g Əsê, ńtúg mbimə́, ńtúgə akɔŋnə, ńtúgə awaamə́ntə́əmə, ḿbɨ́ ḿbwɔ́dnə.

¹² Póʼnə məlaʼ mɨ mə́ pə́ nə́ mimə́ mbimə́ lə́ əshîʼnə, ńtíʼ ńtúg nchîmbî ə́ mɛdnə̂ nə́ ngǎ mɔʼə́ ándó Əsê kə fóŋ nə́ gho ə́fɛ̂ nə́ gho, əghâ gho kə tɨ́ nə́ á mbi pɨ pipə nɨ́ nə́ ə́sóŋ ńgə́ gho túg mbimə́ nə́ Yeso Klisto, pó kə́ ńdzɨ́ ńkə́ ḿbí ńgə́ lə́ ndə̌ŋdəŋ lə́.

¹³ Á mbi Əsê páʼ a fɛ̂ nə́ nchîmbîə á mbô ajúmə atsəmə, ńkə́ ḿbə́ á mbi Klisto Yeso páʼ a nə ńtɨ́ nə́ ńtyantə̂ á mbi Pɔŋtus Payilɛd ə́fiʼtə̂ yi nə́ mbimə́ əjǐə,

¹⁴ maŋ sóŋə á mbô gho ńgə́ gho lɔʼkə̂ məntəgə́ mi əshîʼnə, kɔ ŋwu tsə̌ tsáb təpɔŋ ńté gho, tə koʼ nə́ ndɛlə́ ándó Mmaʼmbî əwɛ̂n Yeso Klisto a yǒ nə́ yǐəə.

¹⁵ Lə́ Əsê páʼ a yǒ nə́ ghɛd a yǐ nə́ ndɛd páʼ ə́ koʼnə̂ nə́, lə́ yí páʼ a túg nə́ afoʼə, ńkə́ ḿbə́ ndaʼ yí páʼ a sáʼ nə́ mbî, ḿbə́ əfo pəfo ḿbɨ́ ńkə́ ḿbə́ Mmaʼmbî pəmaʼpə́mbîə.

¹⁶ Lə́ tsɔʼə yí páʼ mbɔʼə a kě kwû pô, ńchîə á mə́m nkyaʼ páʼ mbɔʼə ŋwu tsə̌ a kě ńnyi tə ḿbáatə pô; Ŋwu tsə̌ a kě yí kə́ láʼə zə́ənə pô, mbɔʼ ŋwu tsə̌ a kě yí zɨ́ pô. Lə́ yí páʼ a túg nə́ ngóʼkə ńkə́ ńtúg mətɨ páʼ mə́ láʼ nə́ kě měe pô. Amɛn.

¹⁷ Sóŋ nə́ pɨ pó túg nə́ afoʼə á ndu mbî zɨ ńgə́ kɔ pó tə́ ńkɔ́ʼkə mbɨ əzoobə́, kɔ pó túgə akwaŋ ńtə́ ḿbyáabə á pə́ nə́ nkáb páʼ mbɔʼ zɨ́d měe yí ndɛd ətsəmə. Lə́, pɛn túgə akwaŋ ńtə́ ḿbyáabə á pə́ nə́ Əsê páʼ ä fɛ̂ nə́ ajúmə atsəmə á mbô pɛn ńgə́ pɛn tə́ ńkɔŋtə̂ nə́ zə́ələ́.

¹⁸ Sóŋə á mbô pó ńgə́ pó tə́ faʼə̂ məfaʼ mimə əshîʼnə, afoʼə azóobə́ á pə́ mənu mimə əshîʼnə pö faʼ nə́, ńgeebə̂ apô, ńkə̈ ńkwáalə pətsə́ pəənə.

¹⁹ Nə́ ndú wɨ́d ghɛn pó lɔʼkə̂ afoʼə azɔ́b yi páʼ á pə́ nə́ achîəndɛ̂ yə tyantə̂ nə́ ńdɔg ḿbyáb ndɛd páʼ ə́ tə́ nə́ ńgyǐəə wə́. Ńjî ńgə́ pó yǐ ńtúg nchîmbî páʼ ə́ pə́ nə́ ndə̌ŋdəŋ nchîmbîə.

²⁰ Timoti, lɔg ndɛd əshîʼnə nə́ ajú pə́ kə fɛ̂ nə́ á mbô gho lə́. Lə́ʼə gho ətsáb páʼ ə́ kě nə́ apɔ́gə Əsê túg pó, pópə əjwaʼlə ətsáb páʼ pɨ pətsə́ pə́ fɨg nə́ ntsɨd ə́fóŋə nə́ “ajíənuə.”

²¹ Ńté ńgə́ pɨ pətsə́ pó zoŋ nə́ zɨ́d pó laŋ ə́lɨ́d ḿbéŋkə alaŋə́ ndúmə mbimə́. Apɔŋə́ntə́əmə Əsê á chîə á mbɨ pəənə́.