1 Pita 5 - Əka yi Fîə

Ndzaŋ Təmbɔʼ Mətû mə́ Chî pópə Nkaŋŋwunə

¹ Lə́ á pə́ ńgə́, maŋ póʼmbô nə́ mətûə á mə́m pəənə́, ńté ńgə́ maŋ kə́ ḿbə́ lə́ nətûə. Maŋ tséebə ándó ŋwu páʼ a nə ńdzɨ́ nə́ ńkə́ ḿbí ndzaŋ Yeso a nə ńdzɨ́ nə́ ngə́ʼə, maŋ yǐ kə́ chîə á mə́m nəgháʼ nə́ ndɛd páʼ wə́ələ́ á yǐ nə́ yǐəə. Maŋ póʼmbô á mbô pɨ ńgə́,

² nə́ tə́ ńtseŋnə̂ məmbéŋ mə́ Əsê mə́ páʼ a fɛ̂ nə́ á mbô pɨ lə́, kɔ nə́ tə́ faʼə̂ pə́ ándó pə́ fyáalə wɨ́ ə́fyád nə́, ə́faʼə̂ pə́ ndzaŋə ándó Əsê a lɔ nə́ ńgə́ nə́ faʼə̂. Faʼ nə́ afaʼə azə́ənə́, kɔ nə́ tə́ ńnáŋə tsɔʼə pə́pə̌ ntsɔ́ʼəfaʼə, faʼ nə́ ándó pɨ pó pyádnə nə́ ńtúg ntə́əmə á mə́ faʼ nə́.

³ Kɔ nə́ tə́ ńjíʼə pɨ páʼ pɨ̈ náŋ nə́ ághóobə́, lə́ chî nə́ ándó fiʼə á mə́m məmbéŋə.

⁴ Lə́, əghâ ándó əfo pətseŋnə a yǒ nə́ ńgyǐəə, nə́ yǒ kwáalə lɛ nəfɔ nəgháʼ páʼ wə́ələ́ á yǒ nə́ kë shwəgtə̂ pô.

⁵ Tsɔʼə nə́ ndú yi wɨ́, pɨ nkaŋŋwu nə́ chîə á mə́ zóʼnə nə́ pətəkaŋə́. Atsóokə́mbəəmə a shib ńchîə á mə́m pɨ pətsəmə ándó atsəʼə́ afaʼ nə́ wê nə́ á mə́ faʼ nə́ á mbô məmbɨ mɨ́ ndzaŋ páʼ aŋwaʼlə Əsê á sóŋ nə́ ńgə́, “Əsê a kǐ pɨ páʼ pó ŋáŋkə nə́ mbɨ əzoobə́, lə́ ḿbə́ fɛ̂ apɔŋə́ntə́əmə á mbô pɨ pó tsóokə nə́ mbɨ əzoobə́.”

⁶ Tsóokə nə́ mbɨ əzəənə́ á mbi Əsê páʼ a túg nə́ mətəənə, ńjî ńgə́ a yǐ ŋ́ŋáŋkə áwɨ́ nə́ əjǐ ndɛd páʼ a kɔŋ nə́.

⁷ Fɛ̂ nə́ mənu mətsəm mə̈ tsɛ nə́ áwə́ənə́ á mbô yí ńté ńgə́ lə́ yi páʼ a lɔg nə́ ndɛd nə́ pəənə́.

⁸ Kɔ nə́ tə́ ńdê, tə́ nə́ ḿbyáb əliʼə́, ngaŋ kəpa ə́wɨ́ Dɛbəələ á tə́ ńgéelə ə́fuʼ əliʼə́ ándó sáambaŋ nji tə́ nə́ ńdzáŋə yə́ á tə́ ńnáŋə ŋwunə á mə́ kɔ́d nə́.

⁹ Tɨ́ nə́ ńtyantə̂ á mə́m mbimə́ əzəənə́, ńkǐə yə́, ńté ńgə́ nə́ jî ńgə́ pəlim pə́ənə́ á mə́m mbî ntsəm pó kə́ ńtə́ ńdaŋə̂ tsɔʼə á mə́m ntê məngə́ʼ zəənə́.

¹⁰ Lə́ ndzaŋ páʼ pɨ yǐ nə́ zɨ́ ngə́ʼ nə́ mɔ́ akəmə ndɛd lə́, Əsê páʼ a túg nə́ apɔŋə́ntə́əmə atsəm, yí páʼ ä fóŋ nə́ áwɨ́ ńgə́ nə́ yǐ ńkwúnə á mə́m nəgháʼ əyǐ páʼ á mɛdnə̂ nə́ ńdaŋə̂ á mə́m Klisto, a yǐ ghɛd nə́ koʼnə̂ ńgɛn ə́fyagə̂, ə́ kə́ ghɛd nə́ tɨ́ ńtyantə̂, ə́ pɨ ə́fɛ̂ mətəənə a mbô pəənə́, ə́ kə́ ghɛd məŋaŋ mɨ́ mə́ tɨ́ ńtyantə̂;

¹¹ Á mbô yí mətɨ mətsəm mə́ chî ə́wɨ́ tə ḿmɛdnə̂! Amɛn.

Ndwigtə Achaʼtə

¹² Silasə ndim əwɛ̂n páʼ a faʼ nə́ á mbô Klisto nə́ ntɨ́ yí ətsəm lə́, lə́ kwá yí ńkwáalə mə pəg yi ŋwaʼlə̂ mɔ́ akəmə aŋwaʼlə ghɛnə́ á mbô pəənə́. Maŋ loonə̂ lə́ á mə́ néŋ nə́ məntɨ́ mɨ́ ə́ kə́ fiʼtə̂ áwɨ́ ńgə́ lɛ̌ ndə̌ŋdəŋə́ apɔŋə́ntə́əmə Əsê. Tɨ́ nə́ ńtyantə̂ á mə́m ə́wə́.

¹³ Nkyeetə pɔ́ pə́ Klisto páʼ ə́ chî nə́ Babilɔn páʼ Əsê a nə ńtsɔ́ʼ nə́ ághóobə́ ándó a nə ńtsɔ́ʼ nə́ áwɨ́ lə́, pó túmə achaʼtə á mbô pəənə́, móonə mə Magə á mə́m mbimə́ a kə́ ńtúmə achaʼtə á mbô pəənə́.

¹⁴ Ŋwu ntsəmə á mə́m pəənə́ a chaʼtə̂ mɔ́mɛ́ əyǐ ńchwegə̂ yí nə́ akɔŋnə. Ńgə́ mbwɔ́dnə ə́ chîə tətɨ pɨ pətsəm páʼ nə́ chî nə́ á mə́m Klisto.