1 Pita 3 - Əka yi Fîə

Pəngyě pópə Pəlúmə

¹ Tsɔʼə nə́ ndú wɨ́d wə́ pɨ pəngyě nə́ chîə á mə́ shib nə́ zóʼnə pəlú pə́ənə́, ńjî ńgə́ təmbɔʼ pó pətsə́ ə́ chî ntɨ́ nə́ atséebə Əsê néŋ pô, pó yǐ ńdzə́ənə mbɔ́ əwɨ ńtíʼ ńkwúblə ńnéŋ ntɨ́ nə́ Əsê, tə ghə́ nə́ sóŋə anu yitsə́ á mbô pó,

² ńté ńgə́ pó yǐ zɨ́ ndzaŋ mbɔ́ əwəənə́ á ŋwaʼ nə́ (ńkě ndɔtí túg pô) ə́ kə́ ə́ túgə apɔ́gə Əsê.

³ Kɔ nə́ lɔg məshu mə́ ndzəmə apeŋə́ a mə́ tsoŋkə̂ nə́ məmbɨ mɨ́ əwɨ́ mə́ pɔŋə̂, ándó ndú páʼ nə́ tsoŋkə̂ nə́ ətû pɨ əwɨ́ kɨ məféŋ pópə məndeʼ mə́ gôlə nə́ ətsəʼ nə́ wê nə́,

⁴ Lə́ məshu mɨ́ mə́ chîə á mə́ fɛ́d nə́ lə́ á mə́m məntɨ́ pəənə́, ntê məshu zɨ kě lɛnə̂ pô, ńgɛlə̂ mənu ndǎ ndǎ, ńkě afyaʼə́ loonə̂ pô, lə́ ajú páʼ á pyádnə ə́səglə̂ á mbi Əsê.

⁵ Ńté ńgə́ pəngyě pó nə ŋwaʼ nə́ ntsɛɛmbi, páʼ pó nə túg nə́ akwaŋ ńtə́ ḿbyáabə nə́ Əsê, pó nə ńchî ńgɛlə̂ məshu lə́ nə́ ndú ghɛn ńgə́; pó zóʼnə pəlú póobə́.

⁶ Sala a nə ńchî lə́ tsɔʼə ə́lə́ələ́, a nə ńdzóʼnə Ablaam tə ńtíʼə ə́fóŋə yí nə́, “mmaʼmbî əyǐə.” Pɨ tíʼ əghâ nə́ ḿbə́ lə́ pɔ́ pí páʼ təmbɔʼ nə́ faʼ əshîʼnə ńkə́ ńchîə anu yətsə̌ tə́ pɔ́gə pô.

⁷ Pɨ mbyâŋnə, á mə́ kə́ nə́ chî pɨ̌pə pəngyě pɨ́, nə́ chîə á mə́ jî nə́ ńgə́ pəngyě pó pwɔ́dkə ńtsɛɛlə̂ áwə́ənə́. Nə́ chîə á mə́ túg nə́ ághɔ́b nə́ ngóʼkə ńté ńgə́ pó yǒ kə́ kwáalə azɔ́b məfɛ̂nə mə́ nchîmbîə mə́ Əsê a yǒ nə́ fɛ̂ nə́ pɨ lə́. Faʼ nə́ ə́leenə́, ńjî ńgə́ ajûtsə́ á yǐ ńkě achaʼtə́sê azɨ́ jwaʼ pô.

Mə Zɨ́ nə́ Ngə́ʼ Ńté Ńgə́ Ŋwunə á Faʼə̂ Anu Páʼ á Koʼnə̂ nə́

⁸ Á mə́ lwigtə̂ nə́, pɨ pətsəm chîə á mə́ túg nə́ á táʼ mbóomə, pó táʼə akwaŋə; ə́ kɔŋ məmbɨ mə́ənə́ ándó pəlimə́, ə́ túg ntɨ́ yi əshîʼnə á mə́m pɨ, ə́ kə́ ńtúgə atsóokə́mbəəmə á tətɨ pəənə́.

⁹ Kɔ gho kwígə təpɔŋ nə́ təpɔŋə, kɨ ə́sóŋ nə́ ŋwunə a sóŋ nə́ nə́ gho ńgə́ anuə təpɔŋə yǐ zoŋə̂ gho ńgə́, anuə təpɔŋə á yǐ kə́ zoŋə̂ yə́. Á tíʼə ə́lɨ́d gho sóŋə pə́ ńgə́ afoʼə á yǐ zoŋə̂ ngaŋ ńté ńgə́ afoʼ lə́ ajú páʼ Əsê a kə laʼnə̂ nə́ áwɨ́ ə́wɨ́ əghâ páʼ a kə fóŋ nə́ áwə́ənə́.

¹⁰ Ndzaŋ páʼ aŋwaʼlə Əsê a sóŋ nə́ ńgə́! “Ŋwu ntsəm páʼ a lɔ nə́ á mə́ chî nə́ nchîmbî yi əshîʼnə ńkə́ kɔŋə̂ á mə́ zɨ́ nə́ əlě mbî pi əshîʼnə, a chîə á mə́ shib nə́ myaʼə̂ á mə́ tsáb nə́ ətsáb təpɔŋ ə́ kə́ mɛdtə̂ á mə́ tsɨd nə́ ntsəələ.

¹¹ Pó chîə á mə́ shib nə́ ə́fɛ́lə á mə́m təpɔŋ ə́ tə́ faʼ əshîʼnə; Pó chîə á mə́ chwa nə́ mbwɔ́dnə ə́ kə́ tə́ zoŋə̂ ázə́ələ́.

¹² Ńté ńgə́ Əsê a tə́g əmə́g mí lə́ nə́ pɨ pó tɨ́ nə́ ndə̌ŋdəŋə́, ńkə̈ ńjwə́ʼtə achaʼtə́sê azóobə́. Lə́ ḿbə́ sɛdkə̂ əshî əyí nə́ pɨ pö ghɛd nə́ təpɔŋə.”

¹³ Lə́ əwə mbɔʼ á límkə áwɨ́ páʼ təmbɔʼ nə́ tə́gə atûə á mə́ faʼ nə́ anu yə əshîʼnə?

¹⁴ Lə́ təmbɔʼ nə́ zɨ́ ngə́ʼ ńté pə́ mə faʼ nə́ əshîʼnə, afoʼə á pə́ azə́ənə́. Kɔ nə́ tə́ ḿbɔ́gə ŋwu tsə̌, kɔ anu yətsə́ á tə́ ńjwaʼə̂ áwə́ənə́.

¹⁵ Á mə́m məntɨ́ pɨ kɔŋ nə́ Klisto ńkə́ ńdɔgə̂ yə́ ándó Mmaʼmbîə. Tɨ́ nə́ ńkoʼnə̂ ndɛd ntsəm á mə́ kwěe nə́ ŋwu ntsəm páʼ a pítə nə́ á wɨ́ nə́ anu ńté akwaŋ ńtə́ ḿbyáabə páʼ nə́ túg nə́ zə́ələ́ á mə́m pɨ lə́.

¹⁶ Lə́ nə́ faʼə̂ ázɨ́d nə́ atsóokə́mbɨ ńkɔ kə́ ńtúgə awágə. Nə́ ghɛd məntɨ́ mɨ́ mə́ ŋwaʼə̂, ńjî ńgə́ təmbɔʼ pə́ zɔmtə̂ áwɨ́, pɨ pó tsáb nə́ təpɔŋ ńté mbɔ́ əwɨ yi əshîʼnə ándó ngaŋə́zoŋə́ndzəm Klisto, əsɨ́ ə́ yǐ ńkóolə ághɔ́b nə́ mənu pó sóŋ nə́.

¹⁷ Ńté ńgə́ á pɔŋə̂ á mə́ zɨ́ nə́ ngə́ʼ ńgə́ ŋwunə faʼ əshîʼnə, páʼ təmbɔʼ lə́ pə́ anu Əsê lɔ nə́, ńtsɛɛlə̂ á mə́ jɨ́ nə́ ngə́ʼ ńgə́ ŋwunə a ghɛlə̂ təpɔŋə.

¹⁸ Ńté ńgə́ Klisto nə́ nkɔ̌ʼmbɨ yə́ a nə ńkwû ńté pətəpɔŋ pɨ́ táʼ ngǎ, ə́láʼ kě pɨ kwû pô. Ŋwu yi əshîʼnə ńté pɨ pə́ təpɔŋə, ńjî ńgə́ mbɔʼ á laŋ ə́lɨ́d ńkwáalə áwɨ́ ńgɛd nə́ ghɛnə̂ á mbô Əsê. Pə́ kə jwítə na mbɨ əjǐə, lə́ Əsê á pə́ ńjúmkə ajwiə ajíə, á mə́m nəwûə,

¹⁹ á mə́mə ajwi, a kə́ ńgɛn ə́sóŋə anǔəsê á mbô əjwi páʼ ə́ chî nə́ atsáŋə.

²⁰ Lɛ̌ nə́ ḿbə́ əjwi pɨ páʼ pó kə kě nə́ Əsê zóʼnə pô, páʼ Əsê a nə ńgwam nə́ ntɨ́ ḿbyáabə. Nə́ ndɛd páʼ Nwâ a kə tə́ nə́ ḿbóomə apáŋə ají lə́, á mə́mə apáŋ yə wɨ́ pɨ pə́ nə ńkě nɨ́ pô, lə́ nə ḿbə́ tsɔʼə pɨ nəfeemə́ páʼ pó nə ńchwád nə́ ńdaŋ nə́ nkǐə.

²¹ Zəənə́ a kə̈ nəələ̂ lə́ ándó akwáalə́nkǐ páʼ ä tíʼ nə́ ńchwádkə áwɨ́ əghâ nə́ leenə́, á nə ńkě nə́ pə́ lə́ mə sog nə́ ndɔtí páʼ ə́ chî nə́ akwub pɨ pô, lə́ nə ḿbə́ ńdaʼnə̂ páʼ pɛn kə ghɛd nə́ á mbô Əsê nə́ ntɨ́ yi əshîʼnə. Ndaʼnə zɨ ə́ chwádkə áwɨ́ ńdaŋə̂ nə́ mə júmkə nə́ Yeso Klisto á nəwûə,

²² páʼ a nə ńgɛn nə́ nəpó ńtíʼ ńnáanə əlá apô Əsê yə təənə, əsáʼə pətseŋpə́ndɛ́pə́sê pətsəm pópə mətû mətsəm mə́ chî nə́ nəpóolə, nə́ aliʼə́ mətəənə atsəmə.