1 Pita 2 - Əka yi Fîə

Mmaʼmbîə a Chî lə́ Ándó Ngɔʼ Páʼ ə́ Túg nə́ Nchîmbîə

¹ Nə́ myaʼ mənu mimə təpɔŋ mətsəm, kɔ pɨ tə́ ńtsɨ́d ntsəələ, ńkɔ tə́ ńgɛlə̂ məfɨgə, ńkɔ túgə ŋwéetə́ kəənə atséebə ndzɔmnə.

² Chî nə́ ándó pɔ́ pipə póolə, nji nəpɨ́ nə́ ajwi yi nə́ ŋwaʼ nə́ ə́ zá ńdzáŋə áwə́ənə́, ńjî ńgə́ təmbɔʼ nə́ nô ázɨ́d nə yǐ ńkwíŋ ńkə́ ńchwáalə.

³ Ndzaŋə ándó aŋwaʼlə Əsê á sóŋ nə́ ńgə́, “Nə́ zɨ́ nə́ nkɔ̌ʼmbɨ ə́wɨ́ ndzaŋə ándó Mmaʼmbîə a túg nə́ ntɨ́ yi əshîʼnə.”

⁴ Yǐ nə́ á mbô Mmaʼmbîə, á mbô ngɔʼ páʼ ə́ chî nə́ á mbîə, pɨ pə́ mbî pó nə ńkǐə zɨ́d ə́sóŋ ńgə́ ə́ kě atûə anu yətsə́ chî pô, lə́ Əsê a pə́ ńtsɔ́ʼə ázə́ələ́ ándó ngɔʼ páʼ ə́ səglə̂ nə́.

⁵ Yǐ nə́ ándó məngɔʼ páʼ mə́ chî nə́ mbîə, ḿmɛdtə̂ məmbɨ mɨ́ pə́ lɔg ńkwúlə tə́kɔʼndɛ̂sê ajwiə, aliʼ páʼ pɨ yǐ nə̈ ə́faʼə̂ ə́wə́ ándó ngaŋə́pêsê yi ŋwaʼ nə́, á mə́ fyaʼ nə́ anuə á mbô Əsê nə́ əpúmə afyaʼə́nu páʼ ə́ pə́ nə́ pǐə ajwi, Əsê a kə́ ḿbímə pɨ́d ńdaŋə̂ á mə́m Yeso Klisto.

⁶ Ńté ńgə́ aŋwaʼlə Əsê á sóŋ ńgə́, “Maŋ tsɔ́ʼ ngɔʼ páʼ ə́ səglə̂ nə́, páʼ maŋ yǐ nə́ noŋkə̂ ázə́ələ́ ándó ngɔʼ nəlwî nə́ ndɛ̂ á Záyɔnə; ŋwu ntsəm páʼ a néŋ nə́ ntɨ́ nə́ yí a kě əsɨ́ yǐ túg pô.”

⁷ Ngɔʼ zɨ pyádnə ə́səglə̂ á mbô pɨ páʼ nə́ néŋ nə́ ntə́əmə; lə́ pɨ páʼ pó kě nə́ ntɨ́ néŋ; “Ngɔʼ páʼ ngaŋə́póomə məláʼ kə́ kǐ nə́ ághɔ́b ə́ tíʼ sɛdnə̂ ḿbə́ ngɔʼ páʼ zɨ́d twá nə́ ndɛ̂ ntsəmə.”

⁸ Yətsə́ aŋwaʼlə Əsê á kə́ ḿbɨ́ ə́sóŋ ńgə́, “Lɛ̌ ngɔʼ páʼ ə́ yǒ nə́ ghɛd pɨ pə́ kɔntə̂, ḿbə́ ngwúb ə́ yǒ nə́ ghɛd pó wukə̂.” Pó kɔntə̂ lə́ ńté ńgə́ pó nə́ ńkě ntɨ́ nə́ atsáb yə wɨ́ néŋ pô; lɛ̌ anu Əsê a nə ńdɔ nə́ ńté ághóobə́.

⁹ Lə́ pɨ lə́ ngwud ŋwu məsɔŋ pə́ nə ńtsɔ́ʼ nə́, ngaŋə́pêsê Əfo, aláʼ yə ŋwaʼ nə́, pɨ pə́ Əsê pə́ kə tsɔ́ʼ nə́ ághɔ́b ńgə́ pó náŋkə mənu mimə yɛ́d nə́ yɛ́d nə́ Əsê a faʼ nə́, Əsê páʼ a nə fóg nə́ áwə́ənə́ á mə́m ndzəmə ńtíʼ ńnéŋə á mə́m mɛ́ tə́kɔʼ nkyaʼ əyǐə.

¹⁰ Á nə ḿbə́ ndɛd yitsə̌ nə́ kě lə́ pɨ pə́ Əsê pô, nə́ pə́ əghâ nə́ pɨ tíʼ ḿbə́ lə́ pɨ píə; a nə ḿbə́ ndɛd yitsə̌ nə́ kě akóolə́mə́lə́ŋə Əsê jî pô, lə́ nə́ əghâ nə́ pɨ kwáalə akóolə́mə́lə́ŋə Əsê.

Əpoʼ Əsê

¹¹ Pəshunə́ mə, maŋ póʼmbô á mbô pɨ̌ pɨ pə́ nə́ pəghɨ ḿbɨ́ ḿbə́ pɨ pə́ fɨ́dkə nə́ ághóobə́ á mə́m mbî ghɛn ńgə́; kɔ nə́ pí mənu páʼ na mbɨ əzɨ lɔ nə́ ńgə́ nə́ faʼə̂. Mənu mɨ na mbɨ lɔ nə́ lə́, mə́ chî pópə ntɨ́ əgho lə́ ándó pó po chîə á ntsoolə.

¹² Noŋkə əwəənə́ á mə́m pətəjǐsê á chîə á mə́ pɔŋ nə́ nə́ ndú ńgə́, təmbɔʼ pó néŋə anuə atû pɨ ńgə́ pɨ lə́ pɨ pə́ təpɔŋ, pó yǐ shib ńjɨ́ mənu mimə əshîʼnə mɨ́, ńdaŋ ə́lɨ́d ŋ́ŋáŋkə Əsê Alě páʼ a yǐ nə yǐəə.

¹³ Zóʼnə nə́ mətû mə́ mbî ńté pə́ Mmaʼmbîə, ńdzóʼnə Kasa páʼ a ŋáŋnə nə́ ńtsɛɛlə̂ ŋwu ntsəmə,

¹⁴ ńkə́ ńdzóʼnə pəgɔ́bnɔ páʼ a tú nə́ ńgə́ pó néŋ pəənə ándó pó fankə̂ nə́ mənuə á atsáŋ ńkə́ ŋáŋkə pəənə ándó pö faʼ nə́ əshîʼnə.

¹⁵ Ńté ńgə́ lə́ anu Əsê a lɔ nə́ ńgə́, pɛn faʼ əshîʼnə ńjî ńgə́ əkəkóg pɨ páʼ pö tsáb nə́ ńté áwɛ̂n pó naʼ nə́ məntso móobə́.

¹⁶ Chî nə́ á mbîə ándó pɨ pó chî nə́ təmbɔʼ pó faʼə̂ anu pó tsɔ́ʼ nə́ ńgə́ pó faʼə̂, kɔ nə́ tsɔ́ʼə pə́ mə́ faʼ nə́ anuə təkoʼə, lə́ chî nə́ mbîə pə́ ándó əpoʼ Əsê.

¹⁷ Ghóʼkə nə́ ŋwu ntsəmə, kɔŋ nə́ pəlim pə́ənə́ á mə́m nkyeetə, ńgóʼkə Əsê ńkə́ ńdzóʼnə Kasa.

Ngə́ʼ Klisto Ándó Afiʼkə

¹⁸ Pɨ ngaŋə́faʼ nə́ shib ńdzóʼnə pɨ nə́ faʼ nə́ á mbô pó ńkɔ wágə ághóobə́. Kɔ pɨ ghɛd ə́lɛ̌ tsɔʼə á mbô pəənə ándó pó pwɔ́dnə nə́ ńkə́ ńgɛd əshîʼnə, kə́ nə́ ńgɛlə̂ á mbô pi páʼ ntɨ́ əghɔ́b ə́ tsə́g nə́.

¹⁹ Əsê yǒ fɛ̂ afoʼə azə́ənə́, páʼ mbɔʼ nə́ wam ntɨ́ ńdzɨ́ ngə́ʼə á mə́mə anu páʼ pɨ kě nə́ jî pô ńté á pə́ ńgə́ pɨ tə́ ńdoonə̂ á mə́ faʼ nə́ anu páʼ Əsê lɔ nə́.

²⁰ Təmbɔʼ á pə̂ ńkwáalə á gho lə́ ə́lɛ́ páʼ təmbɔʼ nə́ səg ntə́əmə á mə́m ngwan ńté á pə́ ńgə́ pɨ faʼə̂ anuə tə koʼə̂? Lə́ təmbɔʼ gho səg ndzɔʼə á mə́m ngə́ʼ páʼ gho ghɛd nə́ á pə́ əshîʼnə, Əsê a yǐ ńtsɔ́ʼə afaʼə azɨ́ ńté ə́lə́ələ́.

²¹ Lɛ̌ anu Əsê a nə fóŋ nə́ áwɨ́ ńté lə́, ńté ńgə́ Klisto nə́ nkɔ̌ʼmbɨ əyə́ a nə ńdzɨ́ ngə́ʼ ńté áwɨ́ ńtíʼ ḿmɛdtə̂ fiʼnəghɔlə á mbô pɨ, ńjî ńgə́ mbɔʼ nə́ zoŋ ntag məko əyə́.

²² A nə ńkě anu yətsə́ fankə̂ pô, ŋwu tsə̌ a nə ńkě kə́ ńdzóʼə a tsɨd ntsɨd pô.

²³ A nə ḿbə́ əghâ pə́ nə ńdzɔmtə̂ nə́ yí lə́, a nə kě kwěe nə́ ndzɔmnə pô; əghâ ándó a nə ńtə́ nə́ ńdzɨ́ ngə́ʼ lə́ a nə ńkě atséebə təpɔŋ tsáb pô, lə́ ḿbə́ ńnéŋə akwaŋə ajíə atsəm ńtə́ ḿbyáabə nə́ Əsê páʼ á pə́ ndə̌ŋdəŋ əsáʼməsáʼə

²⁴ Klisto nə nkɔ̌ʼmbɨ əyə́ a nə ńtwá pətəpɔŋ pɛnə̂ á mbɨ əyí ńkɔ́ʼ nə́ pə́ələ́ atǐə apagləpaglə, ńjî ńgə́ anuə atsəm ńté təpɔŋ, pɛn chîə ándó pɨ pə́ kwû nə́, ńtíʼ ńchîə á mbî ńté mə tɨ́ nə́ ndə̌ŋdəŋə́, ńtíʼ ńdaŋ nə́ məfəŋ mí pɨ féŋtə.

²⁵ Ńté ńgə́ pɨ nə ńchî lə́ ándó məmbéŋ mə́ ndzɛd mə́ nə fankə̂ nə́ ndú əghóobə́, lə́ nə́ pə́ əghâ nə́ pə́ pɨnkə̂ wɨ́ ńgə́ nə́ zoŋə̂ Ntseŋnə wə́ a pə́ nə́ Ndɔʼkə mə́lə́glə əwɨ lə́.