1 Jɔnə 3 - Əka yi Fîə

Pɔ́ pə́ Əsê

¹ Zɨ́ nə́ ndɛnə akɔŋnə Tǎ túg nə́ nə́ pɛnə̂, akɔŋnə ajíə a nɨ́ lɛ tətə, pə̈ tíʼə ə́fóŋə áwɛ̂n nə́ pɔ́ pə́ Əsê; a kə́ ḿbə́ ndə̌ŋdəŋ ńgə́ pɛn lə́ pə́ələ́. Lɛ̌ anuə á ghɛd nə́ mbî kě áwɛ̂n jî lə́; ńté ńgə́ ə́ kě Əsê kə́ ńjî pô.

² Pəshunə́ mə maŋ kɔŋ nə́, pɛn tíʼ ḿbə́ lə́ pɔ́ pə́ Əsê əghâ nə́; lə́, atûə azɛ̂nə a pə́ ńkě kə́ ŋwaʼə̂ nə́ ajú pɛn yǒ nə́ pə́ zɨ́d pô, lə́ pɛn jî ńgə́ əghâ Klisto a yǒ nə́ yǐ lə́, pɛn yǒ chîə ándó yí, ńté ńgə́ pɛn yǒ zə́ənə yí chigə ndzaŋə a chî nə́.

³ Ŋwu ntsəmə ándó a túg nə́ akwaŋ zɨ ńtə́ ḿbyáabə ńté Klisto a fóg mbɨ yə́ á mə́m mənu mə́ kě nə́ ŋwaʼ pô tsɔʼə ndzaŋ Klisto a kə́ nə́ ə́fóg mbɨ əjǐə á mə́m mənu mə́ kě nə́ ŋwaʼ pô.

⁴ Ŋwu ntsəmə ándó ä ghɛd nə́ təpɔŋ, a fankə̂ noŋkə Əsê, ńté ńgə́ təpɔŋ lə́ mə fankə̂ nə́ noŋkə.

⁵ Nə́ jî ńgə́ Klisto a nə ńgyǐ lə́ mə́ lɔg nə́ pətəpɔŋ ghɛnə̂, təpɔŋ yitsə̌ a kě nə́ yi kə́ ńchî pô.

⁶ Lə́ á pə́ ńgə́ ŋwu ntsəmə ándó a chî nə́ nəkaʼ pó Klisto ä kě ghɛnə̂ nə́ mbiə á mə́ ghɛd nə́ təpɔŋ pô; Lə́ ŋwu páʼ a ghɛn nə́ nə́ mbiə á mə́ ghɛd nə́ təpɔŋ a nə ńkě yí kə́ láʼə zə́ənə pô ńkě yí kə́ ńjî pô.

⁷ Póonə mə, kɔ ŋwu tsə̌ á fɨgə̂ áwə́ənə́! Ŋwu ntsəm páʼ a faʼ nə́ anu páʼ á koʼnə̂ nə́ a tɨ́ ndə̌ŋdəŋə́, tsɔʼə ndzaŋə ándó Klisto a tɨ́ nə́ ndə̌ŋdəŋə́.

⁸ Ŋwu ntsəmə ándó a ghɛn nə́ nə́ mbiə á mə́ ghɛd nə́ təpɔŋ, lə́ ŋwu Dɛbəələ, ńté ńgə́ Dɛbəələ a nə̈ ńgɛlə̂ təpɔŋ ə́fɛ́lə á nəfɛdnə́. Lɛ̌ anu Mɔ́ Əsê a kə yǐ nə́ ńté lə́, á mə́ tsəŋkə̂ nə́ mənu Dɛbəələ a kə faʼ nə́.

⁹ Ŋwu ntsəmə a pə́ nə́ mɔ́ Əsê təmbɔʼə a kě ghɛn nə́ mbiə á mə́ ghɛd nə́ təpɔŋ pô ńté ńgə́ a fî Əsê, Əsê a kə́ ḿbə́ Tǎ əyǐə, lə́ ghɛd ə́lɨ́d təmbɔʼ a kě ghɛn nə́ mbiə á mə́ ghɛd nə́ təpɔŋ pô.

¹⁰ Lɛ̌ ndzaŋ pɛn chî nə́ á mə́ jî nə́ ńgə́ ŋwu nə́ lə́ mɔ́ Əsê kɨ yi Dɛbəələ; ŋwu ntsəm páʼ a kě nə́ faʼə̂ anu páʼ a koʼnə̂ nə́ pô kɨ ńkě pəlim pí kə́ ńkɔŋ pô, a kě lə́ mɔ́ Əsê pô.

Kɔŋ nə́ Məmbɨ Mə́ənə́

¹¹ Nkɨ pɨ kə zóʼ nə́ ə́fɛ́lə nəfɛdnə́ lə́ ńgə́, pɛn shib ńkɔŋ məmbɨ mɛ́nə.

¹² Kɔ pɛn chîə ándó Kɛnə, a kə̈ faʼə̂ lə́ á mbô Yi wə́ a pə́ nə́ Ngɛdtəpɔŋə, ńtíʼ ńjwítə ndim əyǐ Abɛɛlə. Kɛnə a kə jwítə yí lə́ ńgə́ akə̂? Ńté ńgə́ mənu Kɛnə a kə̈ faʼ nə́ ají mə́ nə ńkě koʼnə̂ pô, lə́ mənu ndim əyǐ a kə̈ faʼ nə́ mə́ nə ńkoʼnə̂.

¹³ Pəlim, lə́ á pə́ ńgə́ kɔ á jwaʼə̂ áwɨ́ páʼ təmbɔʼ pɨ pə́ mbî pó peenə̂ áwə́ənə́.

¹⁴ Pɛn jî ńgə́ pɛn fɛ́lə á mə́m nəwû ńtíʼ ńkwúnə á mə́m nchîmbîə, pɛn jî ə́lɨ́d lə́ ńté ńgə́ pɛn kɔŋ pəlim pɛnə̂. Ŋwunə ándó a kě nə́ akɔŋnə túg pô nəwûə á pɛ́d ńtúg mətəənə á ndu yə́.

¹⁵ Ŋwu ntsəm páʼ a pa nə́ ndim əyǐ lə́ njwítə, nə́ kə ńjî ńgə́ njwítə yitsə̌ a kě əwɨ́ chî páʼ a túg nə́ nchîmbî ə́ mɛdnə̂ ngǎ mɔʼə́ pô.

¹⁶ Təmbɔʼ pɛn zə́ənə ajú páʼ akɔŋnə a pə́ nə́ zɨ́d ńdaŋ lə́ nə́ ndú ghɛn ńgə́, Klisto a kə fɛ̂ nchîmbî əjǐ ńté atûə azɛ̂nə, pɛn chîə á mə́ kə́ nə́ fɛ̂ əzɛ̂n nchîmbî ə́ té atûə pəlim pɛnə̂.

¹⁷ Pəfoʼ páʼ pó zɨ́ nə́ ndim əghɔb anuə tə́ ńtsɛɛlə̂ yí, pó sɛdkə̂ əshî əghɔ́b nə́ yí, təmbɔʼ pó kě sóŋ ńgə́ pó kɔŋ Əsê pô.

¹⁸ Póonə mə, kɔ akɔŋnə azɛ̂nə á pə́ tsɔʼə aliʼə́ atséebə kɨ atséebə ntsoolə, á shib ḿbə́ chigə akɔŋnə páʼ á nɨd nə́ mbɨ əjǐ á mə́mə afaʼə.

Mə Túg nə́ Ntə́əmə á Mbi Əsê

¹⁹ Lɛ̌ ndzaŋ pɛn chî nə́ á mə́ jî nə́ ńgə́ pɛn chî lə́ á mbô ndə̌ŋdəŋə́, ńkə́ ńtúg ntə́əmə á mbi Əsê.

²⁰ Əghâ ətsəm ntɨ́ əwɛ̂n tə́ nə́ ə́sóŋə áwɛ̂n ńgə́ pɛn wǔ əsáʼ, pɛn jî ńgə́ Əsê a tsɛ ntɨ́ əwɛ̂n ńkə́ ńjîə anuə atsəmə.

²¹ Pəshunə́ mə maŋ kɔŋ nə́, lə́ á pə́ ńgə́ təmbɔʼ ntɨ́ əwɛ̂n chî sóŋ ńgə́ pɛn wǔ əsáʼ pô, pɛn túg ntə́əmə á mbi Əsê.

²² Ńdaŋ ə́lɨ́d pɛn kwáalə ajúmə atsəmə á mbô yí páʼ pɛn pítə nə́ ńté ńgə́ pɛn zóʼnə pənoŋkə pí ńkə́ ə́faʼə̂ anuə atsəm páʼ a kɔŋ nə́.

²³ Noŋkə əyǐ lə ńgə́, pɛn néŋ ntɨ́ nə́ əlɛ́n Mɔ́ əyǐ Yeso Klisto ḿbɨ́ ńkɔŋ məmbɨ mɛ́nə, tsɔʼə ndzaŋ Yeso a kə sóŋ nə́ á mbô pɛn ńgə́ pɛn faʼ lə́.

²⁴ Ŋwu ntsəm páʼ a zóʼnə nə́ noŋkə Əsê, a chîə nəkaʼ pó Əsê, Əsê a kə́ ńchîə nəkaʼ pó po. Ńdaŋ nə́ Ajwi páʼ Əsê a fɛ̂ nə́ nə́ pɛn, pɛn jî ńgə́ Əsê a chîə nəkaʼ pɛn po.