1 Jɔnə 1 - Əka yi Fîə

Atsáb Páʼə ä Fɛ̂ nə́ Nchîmbîə

¹ Pəg ŋwaʼlə̂ aŋwaʼlə zəənə́ á mbô pɨ ńté lə́ atsáb páʼ ä fɛ̂ nə́ nchîmbîə, zə́ələ́ á kə chî wɨ́ ə́fɛ́lə á nəchwaakənə́. Pəg kə zóʼə anu ńté atsáb zɨ ńkə́ ńdzɨ́ nə́ əmə́g mə́gə́. Lə́ ndə̌ŋdəŋə́, pəg kə zə́ənə zə́ələ́, mbô mə́g mə́ kə́ ńkwumə̂.

² Əghâ nchîmbî zɨ kə fɛ́d nə́ əshîsaŋ lə́, pəg zə́ənə zə́ələ́. Lə́ ghɛd ə́lɨ́d pəg tséebə anu ńté zɨ́d ə́fiʼtə̂ anu ńté nchîmbî páʼ ə́ mɛdnə̂ nə́ ngǎ mɔʼə́, páʼ ə́ kə chî nə́ pó Tǎ, pə́ ghɛd pəg jîə zə́ələ́.

³ Anu pəg zɨ nə́ ńkə́ ńdzóʼ lə́ zɨ́d pəg kə́ nə́ fiʼtə̂ áwə́ənə́. Ńjî ńgə́ pɨ yǐ ḿbegə̂ áwə́gə́ á mə́m nkyeetə pəg túg nə́ pə̂gpə Tǎ, ńdzoŋ ḿbéenə Mɔ́ əyǐ wə́ a pə́ nə́ Yeso Klisto lə́.

⁴ Pəg ŋwaʼlə̂ aŋwaʼlə zɨ lə́ ńjî ńgə́ akɔŋtə azɛ̂nə á lwɛ́nkə.

Əsê lə́ Nkyaʼə

⁵ Nə əghâ nə́ lɛ̌ nkɨ páʼ pəg zóʼ nə́ á mbô Mɔ́ əyǐ ńtíʼə ə́fiʼtə̂ áwə́ənə́. Nkɨ yi wɨ́ lə́ ńgə́: Əsê lə́ nkyaʼə, ndzəmə́ yi ndaʼ ə́ kě nə́ yí chî pô.

⁶ Mbɔʼ pɛn sóŋ ńgə́ pɛn chîə nəkaʼ pɛn po, ḿbɨ ńkə́ ńchîə mə́m ndzəmə́, tsɔʼə əghâ wɨ́, lə́ á pə́ ńgə́ atséebə azɛ̂n lə́ ntsəələ, ngɛdmə́nu əwɛ̂n ə́ kě kə́ ńkoʼ pô.

⁷ Lə́, mbɔʼ pɛn chîə á mə́m nkyaʼ, tsɔʼə ndzaŋə a chî nə́ á mə́m nkyaʼ, pɛn tíʼ ńchîə nəkaʼ pɛ̌npə pɔ́pə́mɛ́ pətsəmə, achǐə Yeso a pə́ nə́ Mɔ́ əyǐə á yǐ sog pətəpɔŋ pɛnə̂.

⁸ Mbɔʼ pɛn sóŋ ńgə́ pɛn kě təpɔŋ ghɛd, pɛn fɨgə̂ lə́ mbɨ əzɛnə̂, á pə́ ńgə́ ndə̌ŋdəŋə́ á kě mə́m pɛn chî pô.

⁹ Lə́ təmbɔʼ pɛn kyéŋə á mbô Əsê ńgə́ a ləgnə̂ pətəpɔŋ pɛn, a yǐ ńdɔʼkə̂ ndaʼnə əjǐ ə́faʼə̂ anu páʼ a koʼnə̂ nə́: ńdəgnə̂ əfankəmə́nu əpɛ̂n ńtíʼ sogə̂ áwɛ̂nə á mə́m mənu mə́ təpɔŋ mətsəmə.

¹⁰ Mbɔʼ pɛn sóŋ ńgə́ pɛn kě təpɔŋ ghɛd, a pə́ ńgə́ pɛn ghɛd Əsê tíʼ ngaŋntsəələ, atséebə ajíə á kě mə́m pɛn kə́ ńchî pô.