1 Kɔlintyanə 7 - Əka yi Fîə

Əpítə Ńté Ndzɔʼə́

¹ Nə́ əghâ nə́, ńgɛn nə́ mənu páʼ pɨ nə ŋ́ŋwaʼlə̂ nə́ ńté lə́, a pěʼ ḿbɔŋ ńgə́ kɔ ŋwu mbyâŋnə a zɔ́ʼə.

² Ndzaŋə ándó anuə zɔ́ʼə ndzɔʼə́ mbǒʼḿbóʼə́ á chî nə́ á mə́m pɨ lə́, ŋwu mbyâŋnə ntsəmə a zɔ́ʼ əyǐ məngyě, məngyě ntsəmə a kə́ ńdzɔ́ʼ əyǐ ndúmə.

³ Kɔ ŋwu mbyâŋnə a zɔŋ mbɨ əjǐə á mbô ngwě əyǐə, kɔ məngyě a kə́ ńdzɔŋ əjǐə á mbô ndu əyǐə.

⁴ Ńté ńgə́ mbɨ məngyě ə́ kě lə́ tsɔʼə əjǐ yí təjiʼ pô, lə́ əzɔb ndú əyǐə. Mbɨ ŋwu mbyâŋnə ə́ kě kə́ ḿbə́ lə́ tsɔʼə əjǐ yí təjiʼ pô, ńkə́ ḿbə́ lə́ yi ngwě əyǐə.

⁵ Kɔ ŋwu mbyâŋnə a zɔŋ mbɨ əjǐə á mbô ngwě əyǐ, kɔ məngyě a kə́ ńdzɔŋ mbɨ əjǐə á mbô ndú əyǐə, tə ńdéʼtə nə́ pěʼ ḿbímnə á mə́ chî nə́ ə́lɨ́d nə́ mɔ́ akəmə ndɛlə́ á mə́ fɛ̂ nə́ mbɨ əzəənə́ á mə́mə achaʼtə́sê. Ndɛd yi wɨ́ yǐ ńdaŋ nə́ pɨ ńchúʼə á mə́ ghɛd nə́ mənu mɨ́ ńjî ńgə́ kɔ Satanə á yǒ ńkwaʼlə̂ ŋwu əwɨ yitsə̌ a ghɛlə̂ təpɔŋ ńté ńgə́ a kě chî təmbɔʼ a wam mbɨ əjǐ pô.

⁶ Maŋ kë sóŋə lə́ ńgə́ mbɔʼ nə́ shib ńgɛd ə́lɛ̌ pô, ḿbə́ ə́sóŋə lə́ ńgə́ mbɔʼ nə́ kɔŋ nə́ ghɛd ə́lə́ələ́.

⁷ Maŋ pěʼ ńkɔŋ ńgə́ mbɔʼ ŋwu ntsəmə a chîə ándó maŋ chî nə́, Əsê a pɛn ńgɛlə̂ ŋwu ntsəm lə́, ə́fɛ̂ məmí məfɛ̂nə. Ŋwunə a túg məmí ŋwunə túg məmíə.

⁸ Əghâ nə́ mäŋ sóŋə á mbô pɨ mbyâŋnə páʼ ə́ kě nə́ kə̂ zɔ́ʼə pô pópə pəkog ńgə́, a pɔŋə̂ á mbô pó á mə́ chî nə́ tə zɔ́ʼə ándó maŋ chî nə́ lɛ̌.

⁹ Lə́ təmbɔʼ pó chî chî təmbɔʼ pó wam mbɨ əzɔb pô, pó zɔ́ʼə, ńté ńgə́ a pɔŋə̂ á mə́ zɔ́ʼ nə́ ńtsɛɛlə̂ á mə́ tə́ nə́ kéelə lumə̂.

¹⁰ Ńgɛnə̂ á mbô pɨ páʼ pó zɔ́ʼ nə́, maŋ sóŋ ńgə́, lə́ pə́ ńkě mäŋ sóŋə pô, lə́ sóŋ Mmaʼmbîə: ńgə́ kɔ məngyě a fɛ́lə á ndɛ̂ ndú əyǐə;

¹¹ Lə́ mbɔʼ a fɛ́d, kɔ a pɨ ńdzɔ́ʼə, kəənə a pɨ ḿbímnə pó ndú əyǐ ḿbɨ ḿbəənə̂ á ndɛ̂. Kɔ ŋwu mbyâŋnə a kə́ fógə a ngwě əyǐə.

¹² Á mbô apuʼə pɨ maŋ sóŋ ńgə́, (zəənə́ á fɛ́d lə́ á mbô maŋə, á kě lə́ á mbô Mmaʼmbî fɛ́d pô) ńgə́ mbɔʼ ŋwu páʼə a pí nə́ nə́ Yeso a túgə məngyě páʼ a kě nə́ nə́ Yeso pí pô, məngyě yi wə́ a kɔŋ ńgə́ pó yí ə́ chî, kɔ a fógə yə́.

¹³ Təmbɔʼ məngyě a kə́ ńtúgə a ndú əyǐ páʼ a kě nə́ nə́ Yeso pí pô, ndú wə̂ a kə́ ńkɔŋ ńgə́ pó yí chî, kɔ a fɛ́d ndzɔʼə́.

¹⁴ Ńté ńgə́ ndú wə̂ páʼ a kě nə́ nə́ Yeso pí pô lə́, a ŋwaʼ ńdaŋə̂ á ndzəm ngwě əyǐə, məngyě páʼ a kě nə́ nə́ Yeso kə́ ḿbí pô lə́ a kə́ ŋ́ŋwaʼ ńdaŋə̂ á ndzəm ndú əyǐ páʼ a pí nə́ nə́ Yeso lə̂. Təmbɔʼ á pěʼ ńchî ə́lɨ́d pô tə ḿbə́ pɔ́ pɔ́b pə́ pěʼ ńkě ŋwaʼ pô, á pɛn ḿbə́ ə́lɨ́d lə́ pó ŋwaʼə̂.

¹⁵ Lə́ təmbɔʼ yí páʼ a kě nə́ nə́ Yeso pí pó lə́, a kɔŋə̂ á mə́ ghɛn nə́ yí, pə́ mɛdtə̂ yə́ a ghɛnə̂. Nə́ ndú wɨ́d wə̂, məngyě wə̂ páʼ a pí nə́ nə́ Yeso lə́, kɨ ŋwu mbyâŋnə wə̂ páʼ a pí nə́ nə́ Yeso lə́, a chîə á mə́ ghɛd nə́ anuə atsəm páʼ a kɔŋ nə́. Ńté ńgə́ Əsê a sóŋ ńgə́ pɛn pətsəm chî nə́ mbwɔ́dnə.

¹⁶ Gho, məngyě páʼ gho pí nə́ ńdzoŋə̂ Yeso, gho jî nə́ akə̂ ńgə́ mbɔʼ Əsê a kě ndzəm gho laŋ ńchwádkə ndú əgho? Gho ndú, gho jî nə́ akə̂ ńgə́ mbɔʼ Əsê a kě ndzəm gho laŋ ńchwádkə ngwě əgho?

Ŋwu Ntsəmə a Chîə Mbî Ndzoŋ Lə́ Ndzaŋ páʼ Əsê a nə Fóŋ nə́ Yí Ńgə́ a Chîə

¹⁷ Ŋwu ntsəmə a chî nə́ nchîmbî əjǐ ńdzoŋə̂ anu páʼ Mmaʼmbîə a nə fɛ̂ nə́ nə́ yə́, ndzaŋ páʼ a nə ńchî nə́ əghâ páʼ Əsê a nə fóŋ nə́ yə́. Lɛ̌ ntəgə́ páʼ mäŋ fɛ̂ nə́ á mə́m mənkyeetə mə́ pɔ́ pə́ Əsê mətsəmə.

¹⁸ Təmbɔʼ ŋwunə a nə ńtə́ ḿbí Əsê, pə́ nə ḿbɛ́dtə ḿbóʼə yə́, kɔ a moomə̂ á mə́ lyáŋ nə́ alagə́ yəwə́; lə́ mbɔʼ ŋwu páʼ pə́ kě nə́ yí kə̂ póʼə pô, mbɔʼ a pí ndzoŋ ndzəm Yeso, kɔ pə́ pɨ ḿbóʼə yə́.

¹⁹ Ńté ńgə́ təmbɔʼ pə́ póʼə gho kɨ ńchî póʼ pô á kě nə́ anu yətsə́ chî pô. Anu páʼ á chî nə́ ə́wɨ́ lə́ ńgə́ nə́ tə́ ńdzoŋə̂ məntəgə́ mə́ Əsê.

²⁰ Ŋwu ntsəmə a chî tsɔʼə ndzaŋə a nə ńchî nə́ əghâ Əsê a nə fóŋ nə́ yə́.

²¹ Gho nə ḿbə́ lə́ apoʼ əghâ páʼ Əsê a nə fóŋ nə́ gho? Kɔ gho shǎa; Lə́ təmbɔʼ gho zɨ́ əsêndúmə á mə́ fɛ́d nə́ á mə́m ə́wɨ́, gho fɛ́lə.

²² Ńté ńgə́ apoʼ páʼ Mmaʼmbîə a fóŋ nə́, a tíʼ ḿbə́ lə́ ŋwunə á ngǎ yə́ á mbô Mmaʼmbîə. Tsɔʼə nə́ ndú wɨ́d wə́, ŋwu páʼ a nə ńkě nə́ apoʼ pô əghâ páʼ Mmaʼmbîə a nə fóŋ nə́ yí, a tíʼ ḿbə́ lə́ apoʼə á Yeso.

²³ Əsê a nə ńjúnə áwɨ́ lə́ jú nə́, lə́ələ́ pə́ ńgə́ kɔ nə́ pɨ ḿbímə apoʼə á mbô ŋwu məsɔŋə́.

²⁴ Pəlimə́ mə á mə́m Yeso, ŋwu ntsəmə a chî pó Əsê ndzaŋ páʼ a nə́ ńchî nə́ ndɛlə́ ándó páʼ Əsê a nə́ fóŋ nə́ yí lə́.

Apítə Ńté Pɨ pó kě nə́ Zɔ́ʼ pópə Pəkog pə́ Pəngyě

²⁵ Əghâ nə́, anu ńté pɨ pə́ kě nə́ zɔ́ʼ pô, maŋ kě anu yətsə́ túgə á mə́ sóŋ nə́ á mbô pɨ páʼ á lǒo nə́ á mbô Əsê pô, lə́ mäŋ sóŋə lə́ azéemə anu páʼ maŋ kwaŋ nə́, ándó ŋwu páʼ apɔŋə́ntə́əmə Mmaʼmbîə á chî nə́ nə́ yə́, a kə́ ḿbə́ ŋwu ə́sóŋə anu pə́ zóʼə.

²⁶ Ńdzoŋ ngə́ʼ páʼ ə́ chî nə́ əghâ nə́, maŋ kwaŋ ńgə́ á pěʼ ḿbɔŋə̂ á mbô ŋwu ńgə́ a chî tə zɔ́ʼə.

²⁷ Gho túgə məngyě? Kɔ pɨ ńdoonə̂ á mə́ kəm nə́ yə́. Gho kě kə̂ zɔ́ʼə? kɔ gho pɨ ńnáŋə gho məngyě.

²⁸ Lə́ mbɔʼ gho zɔ́ʼ, gho kě lə́ təpɔŋ ghɛd pô, kɨ mbɔʼ məngyě a kě nə́ kə̂ zɔ́ʼə pô a zɔ́ʼ, a kě lə́ təpɔŋ ghɛd pô. Lə́ pɨ páʼ pó zɔ́ʼ nə́ pó chî nə́ ngə́ʼ ńté mənu mə́ mbî məənə́, lə́ ḿbə́ ńgɛn nə́ pɨ maŋ loonə̂ ńgə́ kɔ nə́ kwúnə á mə́m ngə́ʼ zɨ́d zə̂.

²⁹ Anu páʼ maŋ sóŋ nə́ á mbô pɨ pəlimə́ mə lə́ ńgə́, ndɛd yi wɨ́ ə́ tə́ ḿbáatə, ńchwáakə nə́ pə́ əghâ nə́ mbyâŋnə páʼ ə́ zɔ́ʼ nə́ pó chîə mbîə ándó pi pó kě nə́ zɔ́ʼ pô.

³⁰ Pɨ pó kyéŋ nə́ pó chîə ándó anu yətsə́ á kě nə́ tə́ ńdaŋə̂ pô, pɨ pó tə́ nə́ ńkɔŋtə̂ pó chîə ándó pɨ pó kě nə́ tə́ ńkɔŋtə̂ pô, pɨ pó jú nə́ əpúmə, pó chîə ándó pɨ pó kě nə́ ajú túg pô,

³¹ pɨ pó faʼ nə́ á mə́m əpú mbî kɔ pó néŋ ntɨ́ əghɔ́b ə́wə́. Ńté ńgə́ ndzaŋə ándó mbî zɨ chî nə́ əghâ nə́ lə́, zɨ́d kě yǐ pɨ chî ndi ə́ sag pô.

³² Maŋ yǐ kɔŋ ńgə́ kɔ nə́ tə́ ńjwaʼ mbɨ əzɨ ńté mənu mə́ mbîə; ŋwunə a kě nə́ zɔ́ʼ pô a tə́ ńkwaŋə̂ pə́ mənu ńté afaʼə Mmaʼmbîə, ńté ńgə́ a loonə̂ á mə́ faʼ nə́ afaʼ páʼ Mmaʼmbî əyǐə a yǐ nə́ kɔŋə̂.

³³ Lə́ ŋwu páʼ a zɔ́ʼ nə́ a kwaŋə̂ lə́ əpú mbî, ńté ńgə́ a loonə̂ á mə́ ghɛd nə́ mənu páʼ ngwě əyǐə yǐ nə́ kɔŋə̂,

³⁴ ńdaŋ ə́lɨ́d a tíʼ ńtə́əmə a yə́ á tətɨ nkǐə. Lə́ məngyě páʼ a kě nə́ zɔ́ʼ kɨ mɔ̂ məngyě a kě nə́ ŋwu mbyâŋnə kə́ jîə a kwaŋə̂ lə́ ndzaŋ mbɔʼ á tə́gə atûə ají lə́ á mə́ faʼ nə́ á mbô Mmaʼmbîə, ńdoonə̂ á mə́ ŋwaʼ nə́ nə́ mbɨ pó ajwiə. Lə́ məngyě páʼ a zɔ́ʼ nə́ a kwaŋə̂ lə́ mənu mə́ mbîə, ńdoonə̂ lə́ á mə́ ghɛd nə́ mənu mə́ pɔŋə̂ a ndú əyǐə.

³⁵ Maŋ sóŋə zɨ lə́ ńté ńgə́ maŋ loonə̂ á mə́ kwá nə́ áwə́ənə́, maŋ kě loonə̂ lə́ á mə́ zɔŋ nə́ ńgə́ kɔ nə́ tə́ ńgɛlə̂ mənu pô. Lə́ ḿbə́ ńdoonə̂ ńgə́ mbɔʼ nə́ tə́ ńgɛlə̂ mənu nə́ ndú yi əshîʼnə, ńkə́ fɛ̂ mbɨ əjɨ ntsəmə á mbô Mmaʼmbîə.

³⁶ Ńgɛn nə́ ŋwu páʼ a tə́g nə́ məloʼə á atû ngwě əyǐ: mbɔʼ ŋwu mbyâŋnə a kwaŋ ńgə́ anu pó məngyě wə́ ghɛd nə́ a kě koʼnə̂ pô, a kə́ ńtə́ ńdumə̂ tə́shú ńté anuə ndzɔʼə́, ńkə́ ńkwaŋ ńgə́ mbɔʼ pó yí ghɛd ndzɔʼə́ əghɔ́b yi, a pɔŋ ńgə́ a zɔ́ʼə məngyě yi wɨ́ ńnéŋə ndɛ̂ ndzoŋ ndzaŋ páʼ ntɨ́ yí lɔ nə́. Ńté ńgə́ mbɔʼ a zɔ́ʼə məngyě wə̂, təpɔŋ yitsə̌ á kě ə́wɨ́ chî pô.

³⁷ Lə́ mbɔʼ ŋwunə a sóŋə á ntɨ́ yí ndə̌ŋdəŋ ńgə́, yí yǐ wam mbɨ əjǐ ə́ kě zɔ́ʼə mɔ̂ məngyě páʼ a nə ńchî nə́ mə́ zɔ́ʼ nə́ lə́, ńkə́ ḿbə́ ńgə́ mbɔʼ a wam mbɨ əjǐ, á faʼə̂ anu páʼ a tsɔʼ nə́ a ntɨ́ yí lə́, a jî ńgə́ a faʼə̂ lə́ anu yə əshîʼnə páʼ a kě nə́ məngyě wə̂ zɔ́ʼ pô.

³⁸ Lə́ələ́ a pə́ ńgə́ ŋwu mbyâŋnə páʼ a zɔ́ʼ nə́ məngyě yi wə̂ a faʼ əshîʼnə, ŋwu mbyâŋnə páʼ a kě nə́ yə́ mɔ̂ məngyě wə̂ zɔ́ʼ pô, a chígə́ faʼə̂ anu yə əshîʼnə.

³⁹ Məngyě páʼ a zɔ́ʼ nə́ a chî mə́ mɛdnə̂ nə́ á mbô ndú əyǐ páʼ ndú əyǐ a pɛ́d nə́ á mbî, lə́ mbɔʼ ndú əyǐ yi wə́ a kwû, a koʼnə̂ á mə́ zɔ́ʼ nə́ ndú yi ndaʼ páʼ a kɔŋ nə́. Lə́ ŋwu mbyâŋnə wə́ a shib ḿbə́ mɔ́ Klisto.

⁴⁰ Lə́ nə azéemə akwaŋ, maŋ jî ńgə́ a yǐ pyádnə chîə yí əshîʼnə páʼ təmbɔʼ a chîə yə́ ŋwu ndaʼ pɨ zɔ́ʼ pô. Lɛ̌ azéemə akwaŋə, maŋ nə́ nkɔ̌ʼmbəəmə, maŋ kwaŋ ńgə́ maŋ túgə Ajwi páʼ á lǒo nə́ á mbô Əsê.