1 Kɔlintyanə 4 - Əka yi Fîə

Məntú mə́ Yeso

¹ Lə́ələ́ á pə́ ńgə́ pɨ pə́ chîə á mə́ lɔg nə́ áwɛ̂nə ándó ngaŋə́faʼ Klisto, ə́ kə́ pɨ ə́lɔgə̂ áwɛ̂nə ándó pɨ pə́ néŋ nə́ mənu mə́ nəlyaŋnə́ míə á mbô pó.

² Əghâ nə́, á nɨd ńgə́ ŋwu páʼ a tə́ nə́ ńnáŋə apeʼə ŋwu pə́ néŋ ntɨ́ nə́ yí, ä tséebə ndə̌ŋdəŋ əyǐə.

³ Təmbɔʼ nə́ sáʼ əsáʼə mə, kɨ pɨ pə́ mbî pó kə́ ńdɔgə̂ mə ńgɛnə̂ aliʼə́sáʼə́məsáʼ, zə̂ á pə́ lə́ mɔ́ kə́nyaŋə́ anuə á mbô maŋə. Alǒ maŋ, maŋ kě əsáʼə mə sáʼə pô.

⁴ Maŋ kě jîə anuə təpɔŋ yitsə̌ páʼ maŋ ghɛd nə́ pô, lə́ á pə́ ńkě nɨd ńgə́ təmbɔʼ pə́ kě mə nə́ anuə təpɔŋ pɛ́d ńgwam pô. Lə́ Mmaʼmbîə á sáʼ nə́ məsáʼə mə.

⁵ Lə́ələ́ pə́ ńgə́ kɔ nə́ sáʼ əsáʼ yitsə̌ záʼ ndɛlə asáʼə́məsáʼ ə́ pɔŋə̂ koʼə̂. Pyáb nə́ tə ndɛd Mmaʼmbîə a yǐ nə́ yǐ ə́ koʼə̂. A yǒ yǐ lə́, ə́fógə ajúmə atsəm páʼ á chî nə́ á mə́m ndzəmə á əshîsaŋə, ə́ kə́ kyaʼə̂ akwaŋə atsəm páʼ á chî nə́ á mə́m məntɨ́ mə́ pəənə. A yǒ pə́ əghâ yi wɨ́ lə́ ŋwu ntsəmə a kwáalə ndǎ əyǐə á mbô Əsê.

⁶ Pəlimə́ mə, maŋ ghɛd ndɛn mənu ghɛn ətsəm lə́ pəg Apolosə, ńjî ńgə́ ape anuə á pə́ azə́ənə́. Ńjî ńgə́ nə́ yǐ ńdaŋə̂ á ndzəm pəg ńdzéʼə anu páʼ atsáb zəənə́ á sóŋ nə́ ńgə́, “Kɔ nə ghɛd mənu ńdaŋ ndɛn pə́ ŋwaʼlə̂ nə́.” Ńjî ńgə́ kɔ ŋwu əwɨ yitsə̌ a kɔ́ʼkə mbɨ əjǐ ə́sóŋ ńgə́ yə́ a kɔŋə̂ ŋwu tsə̌ ńtsɛɛlə̂ yitsə̌.

⁷ Əwə a ghɛd nə́ a gho, gho tsɛ pətsɨ́ pəənə? Lə́ á akə̂ ajú páʼ gho túg nə́ páʼ Əsê a nə ńkě nə́ nə́ gho lə́ fɛ̂ nə́ fɛ̂ pô? Mbɔʼ pə́ nə fɛ̂ nə́ gho lə́ kətaŋ, lə́ ghɛlə̂ akə̂ gho tíʼə ńkɔ́ʼkə mbɨ əzo ándó pə́ nə ńkě nə́ nə́ gho lə́ kətaŋ fɛ̂ pô?

⁸ Pɨ pɛ́d tə ńtúgə ajúmə atsəm páʼ pɨ lɔ nə́! Nə́ pɛ́d tə ḿbə́ lə́ pəfoʼə! Nə́ pɛ́d tə ḿbə́ lə́ pəfo tə ghə́ pəg pɛ́d tə ḿbə́ pətsə́. Maŋ pěʼ ńkɔŋ ńgə́ nə́ pěʼ ḿbə́ chigə pəfo ńjî ńgə́ pɛn pətsəm tíʼ ńnɔd ḿbə́ pəfo

⁹ Á chîə pə́ ándó Əsê a fɛ̂ pə́ aliʼə́ á ndzəmə á mbô pəg məntú mə́ Yeso, ándó pɨ pə́ chî nə́ á mə́ sáʼ nə́ əsáʼ əghɔ́b pó wǔ pə́ jwítə ághóobə́ á ndzɔʼə́ aláʼə, ńdɔgə̂ áwə́g ə́sɛlə̂ aleŋnə ə́wə́ á mə́m mbî ntsəm, pəg tíʼ ńchîə ándó ngaŋ nəkwaʼə á mbô pətseŋpə́ndɛ́pə́sê pópə ŋwu məsɔŋə́.

¹⁰ Pəg lə́ əkəghə ńté Yeso, pɨ pə́ ḿbə́ ngaŋə́ ayáŋə á mə́m Yeso! Pəg póolə, nə́ pə́ ńtyantə̂! Pə́ wágə áwə́gə́, ḿbə́ ńgóʼkə áwə́ənə́!

¹¹ Tə ńkoʼ əghâ nə́ nji ə̈ záŋə áwə́gə́, nji nkǐ ə́ kə́ ńdzáŋə áwə́gə́. Pəg wê əsɛ̌kə ətsəʼə́; pə́ kɔ́ʼ ngə́ʼə atû pəg ńchîə; pəg kéelə ńtə́əmə;

¹² Pəg táŋnə, ńkɔ́ ətû mbô pə́gə́ á mə́ kwá nə́ mbɨ əzəgə́, təmbɔʼ pə́ wɛ́ʼə áwə́g, pə́ fɛ̂ lə́ afoʼə, təmbɔʼ pə́ tsaŋkə̂ áwə́g, pəg wam ntə́əmə.

¹³ Təmbɔʼ pə́ zoomə̂ áwə́g pəg kwěe nə́ mbwɔ́dnə. Pəg tíʼ ḿbə́ lə́ ntsaʼə́ á ndu ndəsê, nəkwɛdnə́ apû nə́ mbîə.

¹⁴ Maŋ kě mənu mɨ ŋwaʼlə̂ lə́ á mə́ néŋ nə́ əsə́ənə á atû pɨ pô, maŋ ŋwaʼlə̂ lə́ á mə́ kwantə̂ nə́ áwə́ənə́ ándó póonə mə páʼ maŋ kɔŋ nə́.

¹⁵ Ńté ńgə́ təmbɔʼ nə́ pěʼ ńkɔŋ nə́ túgə a pə́ pɨ tɔsə nəghə́m páʼ pö tə́gtə nə́ áwə́ənə́ á mə́m Yeso, jî nə́ ńgə́ nə́ túg lə́ tsɔʼə táʼ tǎ. Ńté ńgə́ maŋ lə́ tǎ əwəənə́ á mə́m Yeso Klisto ńdaŋə̂ á mə́m anǔəsê.

¹⁶ Ńdaŋ ə́lɨ́d, zoŋ nə́ ntag məkoolə mə.

¹⁷ Ńdaŋ nə́ anu zɨ, maŋ tíʼə ńtúmə Timotiə á mbô pəənə́, móonə mə páʼ maŋ kɔŋ nə́ a kə́ ńtúg mbimə́ á mə́m Mmaʼmbîə. A yǐ wə́ʼtə áwɨ́ ndzaŋə ándó nchîmbîə mə á mə́m Yeso ə́ chî nə́, ḿbímnə pópə anuə atsəm páʼ maŋ zéʼkə nə́ zə́ələ́ aliʼə́ atsəm á mə́m mənkyeetə mə́ pɔ́ pə́ Əsê.

¹⁸ Pɨ pətsə́ á mə́m pɨ pó kwúnə á mə́mə achánə ńkwaŋə̂ azɔ́b ńgə́ maŋ kě chîə á mə́ yǐ nə́ yǐ ə́ ghéenə áwɨ́ pô.

¹⁹ Lə́ tsɔʼə ngǎ pɛ̌ maŋ yǐəə, páʼ təmbɔʼ Əsê a pímə; maŋ yǐ yǐ lə́ ə́ kě náŋ lə́ tsɔʼə mənu ngaŋə́chánə zɨ ə́ tsáb nə́ pô, ə́ pə́ kə́ náŋ ńgə́ pó túg lə́ zə́ənə́ ndzaŋ mətəənə.

²⁰ Ńté ńgə́ anuə nəfoonə Əsê lə́ kě atséebə á ntso pô, lə́ mətɨ mə́ afaʼə.

²¹ Nə́ kɔŋ lə́ zə́ənə́? Ńgə́ maŋ yǐ nə́ ngwan, kɨ nə́ akɔŋnə pópə ajwiə mbwɔ́dnə?