1 Kɔlintyanə 3 - Əka yi Fîə

Ngaŋə́faʼ Əsê

¹ Lə́ pəlimə́ mə, maŋ nə ńkě á mbô pɨ tsáb lə́ ándó maŋ nə ńtsáb nə́ á mbô pɨ pó túg nə́ Ajwi pô. Maŋ nə ńtséebə á mbô pɨ lə́ ándó pɨ pə́ mbî pəənə́, ándó pɔ̂nkə̂ á mə́m pɨ pó néŋ nə́ ntɨ́ nə́ Yeso.

² Maŋ nə nɔ́ŋkə áwɨ́ lə́ nə́ nəpə́ənə, maŋ nə kě məjî mimə tyantə̂ nə́ nə́ pɨ fɛ̂ pô, ńté ńgə́ pɨ nə ńkě kə̂ koʼə̂ pô, tə ńkoʼ əghâ nə́ nə kě kə̂ koʼə̂ á mə́ jî nə́ pô,

³ ńté ńgə́ nə́ pɛ́d ńchîə ándó pɨ pə́ mbî pəənə́. Ndzaŋə ándó ŋwéetə́ pópə afyaʼə́ chî nə́ á tətɨ pɨ lə́, pɨ pɛ́d ńkə́ ńchî lə́ tsɔʼə ándó pɨ pə́ mbîə, ngɛdmə́nu ə́wɨ́ ə́ kə́ ḿbə́ tsɔʼə yi pɨ pə́ mbîə.

⁴ Təmbɔʼ táʼ ŋwu əwəənə́ a tə́ ə́sóŋə ńgə́, “Maŋ lə́ ndzoŋ ndzəm Pɔlə,” yitsə̌ a tə́ ə́sóŋə ńgə́, “Maŋ lə́ ndzoŋ ndzəm Apolos,” nə kě ghɛlə̂ lə́ tsɔʼə ándó pɨ pə́ mbî?

⁵ Apolos lə́ əwə? Pɔlə a kə́ ḿbə́ əwə? Pəg lə́ tsɔʼə ngaŋə́faʼ Əsê páʼ pɨ nə ńdaŋ nə́ á ndzəm pəg ńnéŋ ntɨ́ əwɨ́ nə́ Əsê. Ŋwu əwəg ntsəmə a faʼə̂ lə́ tsɔʼə afaʼ páʼ Mmaʼmbîə a fɛ̂ nə́ nə́ yí ńgə́ a faʼə̂.

⁶ Maŋ nə ḿbǐ əpúmə, Apolosə a fyaʼə̂, Əsê a pə́ ńgɛd pɨ́d kɔ́ʼə.

⁷ Ŋwunə ándó páʼ a pǐ nə́ pó ŋwunə ándó a fyaʼ nə́ pó kě nə́ anu yitsə̌ chî pô, tə ńdéʼtə Əsê páʼ ä ghɛd nə́ pɨ́d kɔ́ʼə.

⁸ Ŋwunə ándó páʼ a pǐ nə́, pó ŋwunə ándó a fyaʼ nə́ ə́ faʼə̂ lə́ táʼə afaʼə. Əsê a yǒ tsɔ́ʼə afaʼə ŋwu ntsəm ə́zoŋ ndzaŋ páʼ a faʼ nə́.

⁹ Ńté ńgə́ pəg nɔd ḿbə́ lə́ ngaŋə́faʼ Əsê, nə́ tíʼ ḿbə́ afoonə, ḿbə́ ndɛ̂sê páʼ a pɔ́ nə́.

¹⁰ Ndzoŋ nə́ apɔŋə́ntɨ́ páʼ Əsê a fɛ̂ nə́ á mbô maŋ, maŋ nə ńnoŋkə̂ achîəndɛ̂ ándó chigə mbɔ̂ndɛ̂, ŋwu ndaʼə ä tíʼə ḿbɔ́ ndɛ̂ á ndu ə́wə́. Lə́ ŋwu ntsəmə a pə́ ńdɔg ndɛd ndzaŋ páʼ a pɔ́ nə́.

¹¹ Ńté ńgə́ mbɔʼ ŋwu tsə̌ a kě achîəndɛ̂ yə ndaʼ pɔ́ tə ńdaŋə̂ yi pə pɛ́d nə́ tə ḿbɔ́ pô, á pə́ nə́ Yeso Klisto lə́.

¹² Təmbɔʼ ŋwu ntsəmə a tə́ ḿbóomə á ndumə achîəndɛ̂ zɨ́d zɨ, kəənə a tə́ ḿbóomə a pə́ nə́ atəənə́ gôl, kəənə yə sɛləba, kɨ məngɔʼ mimə əshîʼnə kɨ mətǐ kəənə akəkaʼ kɨ ngɔ́n,

¹³ pə́ yǒ zə́ənə afaʼə ŋwu ntsəmə á Alě ándó Yeso a yǒ nə́ yǐəə, ńté ńgə́ Alě yi wɨ́ lə́ yǒ pə́ alě páʼ a yǒ nə́ jwə́ʼə afaʼə ŋwu ntsəm nə́ móg, ńté ńgə́ móg yǒ jwə́ʼ tíʼ nɨd ntê afaʼ ŋwu ntsəmə a nə faʼ nə́.

¹⁴ Təmbɔʼ afaʼə ŋwu ntsəm páʼ a nə faʼ nə́ á ndúmə achîəndɛ̂ zə̂ a yǒ ńchwád móg, tə ḿbə́ a yǒ kwá ńtsɔ́ʼə afaʼ əjǐə.

¹⁵ Lə́ təmbɔʼ móg yǒ ńtoonə̂ afaʼə ŋwu tsə̌, afaʼə ngaŋə á laŋ kətaŋə, lə́ yí nə́ nkɔ̌ʼmbɨ əyí a yǒ chwáalə, lə́ ə́ pə́ chwád lə́ tsɔʼə ándó ŋwunə ándó pə́ chúb nə́ yə́ á mə́m mógə́.

¹⁶ Pɨ kě jî ńgə́ pɨ nə́ nkɔ̌ʼmbɨ əwɨ́ lə́ Ndɛ̂sê, Ajwiə pə́ nə́ yə Əsê a kə́ ńchîə á mə́m pɨ?

¹⁷ Təmbɔʼ ŋwu ntsəmə ándó páʼ a tsəŋkə̂ nə́ Ndɛ̂sê, Əsê a yǐ ńkə́ ńtsəŋkə̂ yə́, ńté ńgə́ Ndɛ̂sê ə́ ŋwaʼə̂, pɨ nə́ nkɔ̌ʼmbɨ wɨ́ pɨ pə́ zə́ələ́.

¹⁸ Kɔ gho fɨg mbɨ əzo, təmbɔʼ ŋwu tsə̌ á mə́m pəənə́ a kwaŋ ńgə́ yə́ a túgə ayáŋ, ndzoŋ ndzaŋ páʼ mbî kwaŋ nə́ ńgə́ pó yáŋ lə́, a sɛlə̂ “akəkóg” ńjî ńgə́ a yǐ ńtúgə chigə ayáŋə.

¹⁹ Ńté ńgə́ ayáŋə á mə́m mbî zɨ lə́ akəkógə́ a əmə́g Əsê. Ndzaŋə ándó páʼ aŋwaʼlə Əsê a sóŋ nə́ ńgə́, “Əsê á téemə atəənə́ ńgwaamə̂ pɨ pó yáŋ nə́ á mə́mə ayáŋə azóobə́,”

²⁰ aliʼə́ aŋwaʼlə yitsə̌ a kə́ sóŋ ńgə́, “Mmaʼmbîə a jî ńgə́ akwaŋə anuə pɨ páʼ pó yáŋ nə́ lə́ ənukə́taŋə.”

²¹ Lə́ələ́ pə́ ńgə́ kɔ ŋwu tsə̌ a kɔn ndzɔʼ əjǐ nə́ anu páʼ təmbɔʼ pɨ pə́ mbî pə́ faʼə̂. Ńté ńgə́ ajúmə atsəm lə́ azə́ənə́.

²² Kəənə a pə́ pə́ Pɔl kəənə Apolosə kɨ Sifasə kɨ mbî kɨ nchîmbî kɨ nəwû kɨ mənu mə́ lɔg nə́ aliʼ əghâ nə́, kɨ mimə́ pɛ́d nə́ tə yǐ - atsəmə atsəm lə́ azə́ənə́,

²³ pɨ lə́ pɨ pə́ Klisto, Klisto a pə́ yi Əsê.