1 Kɔlintyanə 16 - Əka yi Fîə

Ndzaŋ pə́ nə Maʼ nə́ Nkáb Ńkwá Pəlim Ə́wɨ́ pó Néŋ nə́ Ntɨ́ nə́ Yeso á Jɛlusalɛmə

¹ Əghâ nə́, ńgɛn nə́ anuə amaʼə́nkáb ə́ kwáatə pɨ pə́ Əsê ə́wɨ́ lə́, ghɛd nə́ tsɔʼə ndzaŋ páʼ maŋ nə fiʼtə̂ nə́ mənkyeetə mə́ pɔ́ pə́ Əsê páʼ mə́ chî nə́ á Galɛsya ńgə́ pó tə́ ńgɛlə̂ lə̂.

² Á mə́m ntsɛɛmbiə alě á mə́m ngab mbî ntsəm, ŋwu ntsəmə a shib ńdɔʼkə̂ ndɛn nkáb yitsə̌ páʼ wɨ́d ə́ koʼnə̂ nə́ nə́ ajú páʼ a faʼ nə́ nə́ ngab jɨ́d zə̂. Ńdɔʼkə̂ ájɨ́d ńjî ńgə́ əghâ páʼ maŋ yǒ nə́ ńgyǐ kɔ pə́ pɨ ńtə́ ḿmaʼə̂ ajúmə.

³ Ńjî ńgə́ əghâ maŋ yǒ nə́ ńgyǐ, maŋ tíʼ ŋ́ŋwaʼlə̂ aŋwaʼlə ə́fɛ̂ á mbô pɨ páʼ nə́ tsɔ́ʼ nə́ ńtíʼ ńtúmə ághɔ́b nə́ əpú pəənə́ á Jɛlusalɛmə.

⁴ Á kə́ ńkoʼnə̂ pə́ ńgə́ maŋ ghɛn ə́wɨ́, pə̌gpo ghɛnə̂.

Pɔlə a Tyáŋtə Mbɨ Əjǐə á mə́ Ghɛn nə́ Nənyinə

⁵ Maŋ yǒ laŋə̂ a Masedonya ə́ pɔŋə̂ yǐ ghéenə áwə́ənə́: ńté ńgə́ maŋ nə ḿbɛ́d tə ńkwaŋə̂ á mə́ laŋ nə́ á Masedonya.

⁶ Maŋ yǒ yǐ pɛn chî tə ndi ə́ sagə̂ kɨ əghâ tsə̌ pɛn yǒ ńchî tə ḿməg ndɛd əfə́g ntsəm ńjî ńgə́ mbɔʼ pɨ yǒ ńkwáatə mə maŋ ghɛnə̂ aliʼə́ atsəm páʼ maŋ chî nə́ á mə́ ghɛn nə́ ə́wə́.

⁷ Maŋ kě kɔŋə̂ á mə́ yǐ nə́ laŋ tsɔʼə laŋ nə́ pô. Maŋ kɔŋə̂ á mə́ yǐ nə́ pɛn chî nə́ ndɛd yitsə̌ páʼ təmbɔʼ Əsê a pímə.

⁸ Lə́ maŋ yǐ pɛ́d chîə á Ɛfesus tə koʼə̂ alě Pɛntekɔsə,

⁹ ńté ńgə́ əsa yi ngweŋ ŋáʼnə á mbô maŋ ə́fênə̌ á mə́ faʼ nə́ afaʼ yə əshîʼnə. Pɨ pipə nɨ́ nə́ pó pǎtə ə́sɔb məsɔŋə́ a ndzəm maŋ lə, əsa ə́ pə́ ŋ́ŋáʼnə.

¹⁰ Mbɔʼ Timotiə a yǐ ńgyǐ, nə́ túgə yí əshîʼnə á mə́m pɨ ńté ńgə́ a kə́ faʼə̂ lə́ afaʼə Mmaʼmbî tsɔʼ ándó maŋə.

¹¹ Kɔ ŋwu əwɨ yitsə̌ a wágə yə́, kwáatə nə́ yí ńjî ńgə́ a ghɛnə̂ á nənyi əyǐ nə́ mbwɔ́dnə mbɨ ńgyǐ ńtégə mə; ńté ńgə́ pə̂gpə pəlimə́ mə tə́ ḿbyáabə yə́.

¹² Əghâ nə́, ńgɛn nə́ ndim əwɛn Apolos, maŋ nə ḿbyádnə ńtɛ́nkə yí ńgə́ a yǐ pópə pəlim pətsə́ ńgéenə áwə́ənə́, atûə ajíə á pə́ ńkě lánə ńdá ńgə́ mbɔʼ a yǐ əghâ nə́ pô. Lə́ mbɔʼ əsa ə́ yǒ ə́fɛ́d, tə ḿbə́ a yǐ yǐəə.

Ndwegtə Atséebə

¹³ Kɔ nə lê, tɨ́ nə ńtyantə̂ á mə́m mbimə́ əzəənə́, túg nə́ atyǎŋtəntə́əmə ándó mbyâŋnə ńkə́ ńtɨ́ ńtyantə̂.

¹⁴ Faʼ nə́ afaʼə atsəm nə́ akɔŋnə.

¹⁵ Əghâ nə́ nə́ pəlimə́ mə, nə jî ńgə́ əla Stefana lə́ nə ḿbə́ pɨ pó nə ḿbeg nə́ néŋ ntɨ́ əghɔ́b nə́ Yeso Klisto aláʼə Akaya ńkə́ ə́fɛ̂ məmbɨ móobə́ á mə́ faʼ nə́ kə́ kwá pɨ pə́ Əsê. Pəlim, maŋ póʼ mbô

¹⁶ ńgə́, nə tə ńdzóʼnə ndzaŋ pɨ zɨ́d zəənə́, ńkə́ ḿbə́ nə́ ŋwu ntsəm páʼ pó po faʼ nə́.

¹⁷ Mbəəmə mə ə́ nə ḿbɔŋə̂ ándó Stefana pó Fɔtunatu ḿbéenə Achakus pó nə ńgyǐ nə́, ńté ńgə́ pó nə ḿmegnə̂ akwá páʼ pɨ nə ńkě nə́ aliʼə́ nə́ chîə á mə́ fɛ̂ nə́ nə́ maŋ pô.

¹⁸ Pó nə́ ńgɛd ntə́əmə mə ə́ féŋtə ándó pó nə ńkə́ nə́ ńgɛd ə́wɨ́ ə́ kə́ ə́féŋtə lə̂. Pí nə́ afaʼə pəənə ándó pɨ́d pəənə́.

¹⁹ Mənkyeetə mə́ chî nə́ á mboʼ Esya pó ghə́ maŋ chaʼtə̂ áwə́ənə́. Akwilasə pó Plisila ḿbɨ ḿbá nkyeetə páʼ ə́ kwú nə́ á ndɛ̂ pó lə́, pó tə́ ńchaʼtə̂ áwɨ́ nə́ chigə achaʼtə yi əshîʼnə á mə́m Mmaʼmbîə.

²⁰ Pəlim páʼ pó chî nə́ aliʼə́ nə́ tsɔʼə pətsəm pə́ tə́ ńchaʼtə̂ áwə́ənə́. Chaʼtə̂ nə́ pəlim táʼ táʼ ńchweg məmbɨ mɨ́ nə́ ndú páʼ ə́ koʼnə̂ nə́.

²¹ Lə́ maŋ Pɔlə páʼ maŋ ŋwaʼlə̂ nə achaʼtə jɨ nə́ apô mə, á mbô pəənə́.

²² Ŋwu ntsəm páʼ a kě nə́ Mmaʼmbî kɔŋ pô ndɔ ə́ chîə á atû yə́. Malanata - Mmaʼmbî əwəg, yǐəə.

²³ Apɔŋə́ntə́əmə Mmaʼmbî Yeso a chîə á mbô pəənə́.

²⁴ Akɔŋnə mə á chîə á mbô pɨ ńdaŋə̂ á ndzəm Mmaʼmbî Klisto Yeso, Amɛn.