1 Kɔlintyanə 15 - Əka yi Fîə

Ndzaŋ Yeso klisto a nə Ńjúmnə nə́ a Nəwûə

¹ Əghâ nə́ nə́ pəlimə́ mə, maŋ loonə̂ á mə́ kwúmtə nə́ áwɨ́ nə́ nkɨ yi əshîʼnə páʼ maŋ nə ńnáŋkə nə́ á mbô pɨ lə̂, nkɨ páʼ pɨ nə́ ńdzóʼ nə́ áwɨ́d ńkə́ ńtɨ́ ə́wɨ́ ńtyantə̂.

² Lə́ nkɨ yi əshîʼnə ḿbə́ nkɨ páʼ mäŋ nə ńnáŋkə nə́ á mbô pəənə́ lə́. Nə́ chwád lə́ ńté nkɨ yi əshîʼnə wɨ́d ghɛn páʼ təmbɔʼ nə́ tɨ́ ə́wɨ́ ńtyantə̂, tə ńchî ə́lɨ́d pô, lə́ pə́ ńgə́ pɨ nə́ ńnéŋ ntɨ́ ə́wɨ́ lə́ kətaŋə.

³ Ajú maŋ nə fɛ̂ nə́ á mbô pɨ lə́ tsɔʼə yi maŋ nə ńkwá nə́, páʼ á pə́ nə́ chigə anu ə́səglə̂ ńgə́: klisto a nə ńkwû ńté pətəpɔŋ pɛn ndzaŋ pə́ nə ŋwaʼlə̂ nə́ á mə́mə aŋwaʼlə Əsê;

⁴ ńgə́, pə́ nə ńtwə́ŋə yə́, əlě pɛ́n teelə́ ə́ laŋ a júmnə á nəwû, ndzaŋ pə́ nə ŋwaʼlə̂ nə́ á mə́mə aŋwaʼlə Əsê;

⁵ ńgə́, a nə ńnɨd mbɨ əjǐə á mbô Pita, ńkə́ ḿbɨ ńnɨd mbɨ əjǐə á mbô məntú mí mə̂ ntsɔb pɛ̌.

⁶ Ńtíʼ ḿbɨ ńkə́ ńnɨd mbɨ əjǐ táʼ ngǎ á mbô ngaŋə́zoŋə́ndzəm əjí páʼ pó nə ńchî nə́ ńdaŋ nkɛd tênə, pó pətsə́ nə́ mbǎtə ńkwúkə lə́, pó pipə nɨ́ nə́ pə́ ḿbɛ́lə á mbîə.

⁷ A tíʼ ńnɨd mbɨ əjǐə á mbô Jɛmsə pópə məntú mí tsɔʼə mətsəmə.

⁸ A nə́ ńtə́ ńdwegtə̂ ńkə́ ńnɨd mbɨ əjǐə á mbô maŋə; Maŋ pǎtə ńchîə pə́ ándó ŋwu pə́ nə ḿbî nə́ yí ndɛd yi ndaʼ lə́, a pə́ ḿbɛ́d ńnɨd mbɨ əjǐə á mbô maŋə.

⁹ Ńté ńgə́ maŋ chígə́ ńkə́gə á mə́m məntú mə́ Yeso tə ḿběʼ ńkě koʼnə̂ təmbɔʼ pə́ fóŋə mə nə́ ntú əjǐ pô. Ńté ńgə́ maŋ nə́ ńtsaŋkə̂ nkyeetə pɔ́ pə́ Əsê.

¹⁰ Ńdaŋ nə́ apɔŋə́ntə́əmə Əsê maŋ pə́ ajú páʼ maŋ pə́ nə́ zɨ́d ə́sɛ̂nə̌. Apɔŋə́ntə́əmə Əsê ńté mə á nə ńkě lə́ kətaŋ laŋ pô. Maŋ kə́ ḿbɨ ḿbyádnə faʼ ńtsɛ məntú mə́ Yeso tsɔʼə mətsəmə, lə́ nə ḿbə́ ńkě mäŋ faʼə̂ pô, lə́ nə̈ faʼə̂ apɔŋə́ntə́əmə Əsê páʼ á chî nə́ nə́ maŋə.

¹¹ Lə́ələ́ pə́ ńgə́ kəənə á nə fɛ́lə á pə́ á mbô maŋ kəənə á mbô pó tə ḿbə́ lɛ̌ nkɨ pəg pətsəm kə náŋkə nə́, nə́ kə́ ńnéŋ ntɨ́ ə́wə́.

Mə Júmnə nə́ Nəwûə

¹² Əghâ nə́, mbɔʼ pɛn tə́ sóŋə ńgə́ Yeso klisto a nə ńjúmnə nəwû, pɨ pətsə́ á mə́m pɨ pó pɨ ńdǎ lə́ ə́lɛ́ ḿbɔŋə̂ sóŋə ńgə́ pəkwû pə́ yǒ kě á nəwû júmnə pô?

¹³ Təmbɔʼ lə́ pə́ ndə̌ŋdəŋ ńgə́ pəkwû pə́ yǒ kě a nəwû júmnə pô, lə́ələ́ pə́ ńgə́ alǒ Yeso klisto a nə ńkě a nəwû kə́ ńjúmnə pô.

¹⁴ Təmbɔʼ Yeso a nə ńchîə a nəwû júmnə pô, tə ḿbə́ pəg kě nkɨ yitsə̌ túgə á mə́ náŋkə nə́ pô, nə kě kə́ ńtúgə anu yətsə̌ təmbɔʼ nə́ néŋ ntɨ́ ə́wɨ́ pô.

¹⁵ Anu tə ńtsɛɛlə̂ ájɨ́d zə̂ á yǐ ḿbə́ ńgə́ pə̈g néŋə lə́ ntsəələ atû Əsê ńté ńgə́ pəg sóŋ ńgə́ a nə ńjúmkə Yeso á nəwûə lə́ pə́ ńgə́ a nə ńkě yə́ á nəwû júmkə pô páʼ təmbɔʼ a pə́ ndə̌ŋdəŋ ńgə́ pəkwû pə́ yǒ kě á nəwû júmnə pô.

¹⁶ Ńté ńgə́ mbɔʼ pəkwû pó chî chîə á mə́ júmnə nə́ á nəwû pô, tə ḿbə́ Əsê a nə ńkě Yeso kə́ ńjúmkə pô.

¹⁷ Təmbɔʼ Yeso a nə ńkə́ ńchîə á nəwû júmnə pô, tə ḿbə́ nə kě anu yətsə̌ túgə á mə́ néŋ nə́ ntɨ́ ə́wɨ́ pô, ńkə́ ḿbɛ́d ḿbéŋə á mə́m təpɔŋ əwəənə́.

¹⁸ A kə́ ńnɨd ńgə́ pɨ páʼ pó kwû nə́ á mə́m Yeso pó péŋə.

¹⁹ Təmbɔʼ akwaŋə́nuə azɛ̂n ńtə́ ḿbyáabə á mə́m Yeso á chî ńté lə́ tsɔʼə nchîmbî əzɛ̂nə á ndu mbî ghɛn, tə ḿbə́ pə́ chîə á mə́ sɔbnə̂ nə́ ə́ té áwɛ̂n tsɛɛlə̂ ŋwu ntsəmə a ndu mbîə.

²⁰ Ndə̌ŋdəŋə́ á chî nə́ á mə́m ə́wɨ́ lə́ ńgə́, Klisto a nə ńjúmnə á nəwû ḿbə́ akyeʼə́nuə á mə́ nɨd nə́ ńgə́ pəkwû pə́ yǒ júmnə á nəwûə.

²¹ Lə́ələ́ pə́ ńgə́ ndzaŋ páʼ nəwûə a nə ńgyǐ nə́ ńdaŋə̂ á ndzəm táʼ ŋwu lə́, mə júmnə nə́ á nəwû mə́ yǐ kə́ yǐ laŋə̂ á ndzəm táʼ ŋwunə.

²² Ndzaŋ ŋwu ntsəmə ä kwû nə́ ńté atûə Adam lə́, lə́ kə́ ḿbə́ ndzaŋ ŋwu ntsəmə a yǒ nə́ júmnə á nəwû ə́ té atûə klisto.

²³ Lə́ ŋwu ntsəmə á pə́ ńjúmnə nə́ əjǐ ndɛlə́: Yeso a pə́ ntsɛɛmbi ŋwunə; ńtíʼ ńdǒ ə́lɨ́d, pɨ páʼ pó pí nə́ nə́ yí pó júmnə əghâ páʼ a yǒ nə́ yǐəə.

²⁴ Ndwegtə mbî ə́ tíʼ ńgyǐəə, Klisto a tsəŋkə̂ ajwiə təpɔŋ páʼə ä sáʼ nə́ mbîə, pópə mətû mətsəm nə́ mətɨ mətsəm páʼ pə́ sáʼ nə́ mbî ə́wə́, ńtíʼ ə́fɛ̂ nəfoonə á mbô Əsê páʼ a pə́ nə́ Tǎ.

²⁵ Ńté ńgə́ Klisto a chîə á mə́ sáʼ nə́ nəfɔ tə koʼ nə́ ndɛd páʼ Əsê a yǒ nə́ tsɛ ngaŋkə́pa əjí ə́ tíʼ néŋə ághóobə́ a nətɛ́n nə́ məko Yeso Klisto.

²⁶ Ngaŋkəpa pə́ yǒ nə́ lwigtə̂ mə́ tsəŋkə̂ nə́ lə́ nəwûə.

²⁷ Ńté ńgə́ aŋwaʼlə Əsê a sóŋ ńgə́, “Əsê a néŋə ajúmə atsəmə a nətɛ́n nə́ məko yə́.” Á lánə ńchígə́ ŋ́ŋwaʼ ńgə́ pə́ sóŋ ńgə́, “Ajúmə atsəm” lə́ ńkě Əsê páʼ a nə ńnéŋ nə́ ajúmə atsəmə á məko Yeso Klisto lə́ ə́wɨ́ peg pô.

²⁸ Lə́, əghâ ándó pə́ yǒ nə́ ḿmɛdtə̂ ajúmə atsəm ńgə́ Yeso Klisto a sáʼ, yí Yeso Klisto nə́ nkɔ̌ʼmbɨ əyə́ ándó mɔ́, a kə́ ḿmɛdtə̂ əjǐ mbəəmə á mbô Əsê páʼ a kə mɛdtə̂ nə́ ajúmə atsəmə á mbô yi lə̂. Əsê a tíʼ ńkwéʼnə əsáʼə ajúmə atsəmə.

²⁹ Nə́ kwaŋ ńgə́ təmbɔʼ mə júmnə nə́ á nəwû mə́ chî ə́wɨ́ chî, pɨ pə́ kwá nə́ nkǐə aliʼ pəkwû lə́ pó pə́ ńkwáalə lə́ ńgə́ á kwáalə ághɔ́b nə́ akə̂ lə́? Təmbɔʼ pəkwû pə́ chî chîə á mə́ júmnə nə́ á nəwû pô, pɨ pə́ tíʼə ńkwá nkǐ aliʼ pó ńgə́ akə̂?

³⁰ Ńgɛn nə́ pəg, pə̈g fɛ̂ mbɨ əzəgə́ á ntso nəwû əghâ ətsəm lə́ ńgə́ akə̂?

³¹ Pəlimə́ mə, mäŋ kwɛnə̂ nə́ nəwû əlě ətsəmə! kətɨd páʼ maŋ túg nə́ nə́ pɨ ńté nchîmbî əzɛnə̂ á mə́m Yeso Klisto páʼ a pə́ nə́ Mmaʼmbî əwɛn lə́, ä ghɛlə̂ ńgə́ maŋ sóŋ leenə́.

³² Təmbɔʼ maŋ nə̈ ḿbóʼnə məlaʼ pəg pə́ məna mə́ məyeŋ mə́ təpɔŋ a Ɛfesus lə́ tsɔʼə mə́ kwá nə́ ape ŋwu mbî, tə ḿbə́ ape anuə mə ə́wə́ á pə́ ńgə́ akə̂? Təmbɔʼ pəkwû pə́ chî chîə á mə́ júmnə nə́ á nəwû pô, á pə́ ńgə́, “Pɛn jî ńkə́ ńnô ńté ńgə́ a yǒ pə́ a ngwɛʼə́ pɛn kwúkə.”

³³ Kɔ ŋwu tsə̌ a fɨgə̂ áwə́ənə́, “əghɨ təpɔŋ ə́ tsəŋə̂ a mbɔ́ yi əshîʼnə.”

³⁴ Fóŋ nə́ ajîə azə́ənə́, ḿmɛdtə̂ á mə́ tə́ nə́ ghɛlə̂ təpɔŋ; ńté ńgə́ pɨ pətsə́ pə́ chîə á mə́m pɨ páʼ pó kě nə́ Əsê jî po, mäŋ sóŋə jɨ lə́ á mə́ néŋ nə́ əsə́ənə á atû pəənə́.

Ntê Mbɨ páʼ ə́ Yǒ nə́ Júmnə á Nəwûə

³⁵ Lə́ ŋwu tsə̌ a chî təmbɔʼ a pítə ńgə́, “Təmbɔʼ pəkwû pə́ júmnə nəwû lə́ ə́lɛ́? Pó yǒ tíʼ túg lə́ zə́ənə́ ntê mbəəmə?”

³⁶ Akəkóg! Ajú páʼ gho pǐ nə́ a kě sáʼə pô tə ńdéʼtə á kwûə.

³⁷ Ajú páʼ gho pǐ nə́ á ndəsê lə́ tsɔʼə mbi əjǐə. Əghâ tsə́ a pə́ pə́ mbi ngəsáŋ kəənə ajúmə ndaʼə.

³⁸ Lə́ Əsê a pə́ ə́fɛ̂ ntê mbɨ ntsəm nə́ yí páʼ a kɔŋ nə́, ńkə́ ńgɛn nə́ ntê mbǐpú ətsəm ə́fɛ̂ ndzaŋ mbɨ ntsəm páʼ ə́ koʼnə̂ nə́.

³⁹ Na mbɨ ntsəm ə́ kě lə́ ndə̌ŋdəŋ pô: ŋwu məsɔŋə́ a túg əzɔb mbəəmə, məna mə́ túg əzoobə́, pəsə́ŋ pə́ túg əzoobə́, məshú mə́ kə́ ńtúg əzoobə́.

⁴⁰ Məmbɨ mə́ chîə á nəpóolə, məmbɨ mə́ kə́ ńchîə á ndu ndəsê ghɛnə́; lə́ nəpɔŋ məmbɨ mə́ nəpóolə á pə́ ḿbə́ lə́ táʼə. Nəpɔŋ məmbɨ mə́ ndu ndəsê á kə́ ḿbə́ lə́ táʼə.

⁴¹ Mə́numə a túg lə́ táʼ nəpɔŋə, sáŋə á kə́ ńtúg əyǐə, pɔ́ pə́ sáŋ pə́ kə́ ńtúg əghoobə́, alǒ á mə́m pɔ́ pə́ sáŋ, nəpɔŋə a kə́ ńchî ə́wɨ́ lə́ tsɔʼə ndzaŋə ndzaŋə.

⁴² Lə́ lɛ̌ ndzaŋ páʼ a yǒ nə́ chî əghâ páʼ pəkwû pə́ yǒ nə́ júmnə á nəwûə. Əghâ pə́ tə́ nə́ ńtwə́ŋə lə́ a pə́ mbɨ páʼ ə̈ kwû nə́, əghâ á mə́ júmnə nə́ lə́, ə́ tíʼ lə́ yi kě nə̈ kwûə pô.

⁴³ Əghâ páʼ pə́ tə́ nə́ ńtwə́ŋə lə́ ə́ shwad ńkə́ ḿbóolə; əghâ páʼ ə́ tə́ nə́ ńjúmnə nəwû lə́, ə́ túgə nəpɔŋ ńkə́ ńtúgə apɛ̂.

⁴⁴ Pə́ tə́ ńtwə́ŋə lə́, ə́ pə́ lə́ na mbəəmə; əghâ páʼ ə́ tə́ nə́ ńjúmnə lə́ ə́ túgə ajwǐə. Mbɔʼ na mbɨ ndu mbî ə́ chî ə́wɨ́, tə ḿbə́ yə ajwi ə́ kə́ ńchî ə́wə́.

⁴⁵ Ńté ńgə́ aŋwaʼlə Əsê a sóŋ ńgə́, “ntsɛɛmbi ŋwu pə́ nə ńtsoŋkə̂ nə́ a pə́ Adam lə́, a nə ńtúg nchîmbîə” ndwegtə ndzəm Adamə a pə́ Ajwi páʼ a nə̈ fɛ̂ nə́ nchîmbîə

⁴⁶ Mbi lə́ nə ńkě ajwi kwá pô. Na mbɨ ə́ nə ńkwá nə́ mbi záʼ ajwiə a pɔŋə̂ zoŋə̂.

⁴⁷ Pə́ nə ńtsoŋkə̂ ntsɛɛmbi Adam lə́ nə atsaʼə́; ndzoŋdzəm Adamə a lǒo lə́ á nəpóolə.

⁴⁸ Pɨ pə́ chî nə́ á ndu ndəsê pə́ chî lə́ tsɔʼə ándó ŋwu pə́ nə ńdɔg nə́ ndəsê ńtsoŋkə̂ yí ə́wɨ́ lə̂. Pɨ pə́ chî nə́ á nəpó pə́ kə́ ńchî lə́ ándó ŋwu páʼ a nə ńdǒ nə́ a nəpó lə̂.

⁴⁹ Ndzaŋ pɛn fî nə́ ŋwu páʼ pə́ nə ńtsoŋkə̂ nə́ nə́ ndəsê lə, lə́ tsɔʼə ndzaŋ pɛn yǒ nə́ kə́ fîə ŋwu páʼ a nə ńdǒo nə́ á nəpóolə.

⁵⁰ Maŋ kyaʼə̂ áwɨ́ nə́ pəlimə́ mə ńgə́, na mbɨ pópə achǐ ə́ kě chîə á mə́ yǒ nə́ kwúnə á mə́mə anuə nəfoonə Əsê pô, mbɔʼ ajú páʼ ä kwû nə́ a kě kə́ ńdɔgə̂ aliʼə́ ajú páʼ á kě nə́ kwûə pô.

⁵¹ Jwə́ʼtə nə́ maŋ kyaʼə̂ áwɨ́ nə́ ndə̌ŋdəŋə́ anuə nəlyaŋnə́ yətsə̌: pɛn pətsəm yǒ kě kwû pô, Əsê a yǒ ghabkə̂ ə́kwúblə áwɛ̂n pətsəmə.

⁵² A yǒ pə́ lə́ tsɔʼə ándó gho pə́btə əmə́g mô lə́, pə́ tɔ́ŋə ndwegtə nəpaŋə. Ńté ńgə́ əghâ pə́ yǒ nə́ tɔ́ŋə ájɨ́d lə́, pəkwû pə́ júmnə ńdáʼ ńkě pɨ ńkwû pô, pɛn pətsəm tíʼ ńkwúblə.

⁵³ Ńté ńgə́ pə́ yǒ kwúblə ajúmə atsəm páʼ ä lə̂ nə́ a pə́ yə tə lə̂. Ajúmə atsəm páʼ ä kwû nə, pə́ kə́ ńkwúblə zə́ələ́ á pə́ yə tə kwûə.

⁵⁴ Lə́ələ́ pə́ ńgə́ əghâ ándó ajú yə lə̂ nə́ a sɛd nə́ ńtíʼ yə tə lə̂, yə́ ä kwû nə á kə́ sɛlə̂ yə tə kwûə, lə́ələ́ pə́ ńgə́ anu páʼ aŋwaʼlə Əsê ä sóŋ nə́ á lɔgə̂ aliʼə́ ají ńgə́, “Pə́ tsɛɛlə̂ nəwû ḿmǐəə yə́.”

⁵⁵ “Nəwû, mətɨ mô mə́ ə́fó? Nəwû, ə́sɛ̂n gho ə́fó?”

⁵⁶ Ə́sɛ̂n nəwû lə́ təpɔŋə, mətɨ mə́ təpɔŋ mə́ fɛ́lə lə́ á mə́m pənoŋkə pə́ Mosisə.

⁵⁷ Lə́, ndǎ á mbô Əsê páʼ a ghɛd nə́ pɛn tsɛɛlə̂ nəwû ńdaŋə̂ á ndzəm Mmaʼmbî əwɛn Yeso Klisto.

⁵⁸ Pəlimə́ mə maŋ kɔŋ nə́, lə́ələ́ pə́ ńgə́, nə́ tɨ́ ńtyantə̂, kɔ nə́ chiʼnə̂. Fɛ̂ nə́ mbɨ əjɨ tsɔʼə ntsəmə á mə́mə afaʼə Mmaʼmbî əghâ ətsəm ńté ńgə́ nə́ jî ńgə́ afaʼə azə́ənə́ á mbô Mmaʼmbîə a kě lə́ kətaŋ laŋə̂ pô.