Bìoball air-loidhne

1 Kɔlintyanə 14 - Əka yi Fîə

Mətsə́ Mənu Ńté Məfɛ̂nə mə́ Lǒo nə́ á Mbô Ajwǐəsê

¹ Lɔ nə́ ndú ətsəmə á mə́ túg nə́ akɔŋnə, ńtə́gə atûə azɨ́ nə́ məfɛ̂nə mə́ lǒo nə́ á mbô Ajwǐəsê, ḿbə́ pə́ nə́ á mə́ zóʼ nə́ ə́ kə́ náŋkə nkɨ Əsê.

² Ŋwu páʼ ä tsáb nə́ ətsab pəfî, a kě lə́ á mbô pɨ pə́ mbî tséebə pô a tséebə lə́ á mbô Əsê ńté ńgə́ ŋwu tsə̌ a kě tə́ ńdzóʼə anu páʼ ä sóŋ nə pô. Ajwǐəsê ä kwá nə́ yə́ a tséebə mənu mə́ nəlyaŋnə́.

³ Lə́ ŋwu páʼ a zóʼ nə́ ńkə́ náŋkə nkɨ Əsê, a tséebə lə́ á mbô pəənə á mə́ kwá nə́ ághɔ́b, ə́ kwíŋkə ághɔ́b, ə́ kə́ legtə̂ məntɨ́ móobə́.

⁴ Ŋwu páʼ a tsáb nə́ ətsáb pipə fî a kwáalə lə́ tsɔʼə mbɨ əjǐə. Lə́ ŋwu páʼ a zóʼ nə́ nkɨ Əsê ńnáŋkə wɨ́d a kwíŋkə lə́ nkyeetə pɔ́ pə́ Əsê ətsəmə.

⁵ Maŋ pěʼ ńkɔŋ ńgə́ mbɔʼ pɨ pətsəm pěʼ ńtə́ ńtsáb ətsáb pipə fîə, lə́ ḿbə́ ḿbyádnə ńkɔŋ ńgə́ mbɔʼ pɨ pətsəm pěʼ ńchî təmbɔʼ nə zóʼ nkɨ Əsê ńnáŋkə. Ŋwu páʼ ä zóʼ nə́ nkɨ Əsê ńnáŋkə a tsɛɛlə̂ ŋwu páʼ a tsáb nə́ ətsáb pipə fî tə ńdéʼtə ŋwu tsə̌ chî wə́ mə́ kyagtə̂ nə́ anu páʼ ŋwu yi wə́ á sóŋ nə́ ńjî ńgə́ á kwíŋkə nkyeetə pɔ́ pə́ Əsê.

⁶ Əghâ nə́ nə́ pəlimə́ mə, mbɔʼ maŋ yǐəə á mbô pɨ ńtsáb ətsáb pipə fî ə́ kwáalə áwɨ́ nə́ akə̂? tə ńdéʼtə maŋ yǐ nə́ mənu páʼ Əsê a nɨd nə́ mə ə́wə́ á mbô pəənə́, kɨ nə́ ajíənu yətsə́, kɨ nə́ nkɨ yitsə̌ páʼ maŋ zóʼ nə́ mbô Əsê, kɨ nə́ ndzéʼkə yitsə̌.

⁷ A lǒo əpú páʼ ə́ kě nə́ jwǐə pô, pə́ póʼ nə́ ándó fluto kɨ nəloŋ, mbɔʼ ŋwunə jî ngyɛ nkǐ yi wɨ́ lə́ ə́lɛ́ páʼ mbɔʼ nkǐ chî ə́fɛ́d ŋwaʼ pô?

⁸ Mbɔʼ pə́ chî ndɔ́ŋ ntso əshîʼnə tɔ́ŋ pô əwə a fɛ́d ńgɛnə̂ á ntsoolə?

⁹ A kə́ ńchî lə́ tsɔʼə ə́lɨ́d nə́ ətsáb pipə fîə á mbô pəənə́. Tə ńdéʼtə gho tsáb ətsáb páʼ mbɔʼ pɨ pə́ zóʼə anu ətsáb pipə fî pəwɨ́ sóŋ nə́, gho tíʼə ńtséebə lə́ á mbô əfə́gə.

¹⁰ Ətsáb pipə nɨ́ nə́ ə́ chîə á ndu mbiə, lə́ yətsə́ a kě nə́ anu sóŋə pô a kě wɨ́ chî pô.

¹¹ Lə́ təmbɔʼ maŋ chî tə́ zóʼə anu páʼ atséebə atúmə ä sóŋ nə́ pô, tə ḿbə́ maŋ yǐ pə́ lə́ ŋwunə atúmə á mbô ŋwu páʼ ä tsáb nə́, ŋwu wɨ́d wə̂ a kə́ ḿbə́ ŋwunə atúmə á mbô maŋə.

¹² Ndzaŋ páʼ pɨ chígə́ nə́ ńdoonə̂ á mə túg nə́ məfɛ̂nə mə́ Ajwǐəsê lə́, lánə nə́ fǔəlóʼə á mə́ faʼ nə́ mənu nə́ ndú páʼ mbɔʼ mə́ kwáatə nkyeetə pɔ́ pə́ Əsê ńgə́ jɨ́d ə́ kwéŋə.

¹³ Lə́ələ́ pə́ ńgə́ ŋwu ntsəm páʼ ä tsáb nə́ ətsáb pipə fî, a chaʼtə́sê ńgə́ Əsê a fɛ̂ mətɨ nə́ yí təmbɔʼ a tyáatə anu páʼ ətsáb pipə wɨ́ ə́ sóŋ nə́.

¹⁴ Ńté ńgə́ mbɔʼ maŋ chaʼtə́sê nə́ atsáb yə fî, maŋ chaʼtə̂ lə́ á mə́mə ajwiə mə, lə́ akwaŋə mə a pə́ ńkě anu ə́wɨ́ wam pô.

¹⁵ Lə́ələ́ pə́ ńgə́ mbɔʼ maŋ ghɛd ə́lɛ́? maŋ yǐ chaʼtə́sê á mə́mə ajwiə mə ə́ kə́ chaʼtə̂ nə́ akwaŋə mə. Maŋ yǐ zɔb nkǐ nə́ ajwiə mə ə́ kə́ zɔb nə́ akwaŋə mə.

¹⁶ Mbɔʼ gho tə́ ńdáʼkə Əsê tsɔʼə á mə́mə ajwiə azô ŋwu tsə̌ a chîə á mə́m pɨ páʼ a kě nə́ anu yətsə̌ kə̂ jîə pô a pə́ ndǎ ə́lɛ́ ḿbɔŋə̂ sóŋ ńgə́, “Amɛn” nə́ ndǎ á mbô Əsê əgho yi wɨ́ páʼ a kě nə́ anu páʼ gho sóŋ nə́ zóʼ pô?

¹⁷ Mbɔʼ gho chígə́ ńtə́ ə́fɛ̂ ndǎ əshîʼnə, lə́ zɨ́d pə́ ńkě yitsə̌ ŋwu tə́ ńkwíŋkə pô.

¹⁸ Mäŋ láʼkə Əsê ńgə́ mäŋ tsáb ətsáb pipə fî ńtsɛɛlə̂ áwɨ́ pətsəmə.

¹⁹ Lə́ á mə́m nkyeetə pɔ́ pə́ Əsê, maŋ yǐ kɔŋ ńgə́ mbɔʼ maŋ sóŋ mənu mɛn tâ mbɔʼ pə́ zóʼ ńtsɛɛlə̂ á mə́ tsáb nə́ mənu tɔsə nəghə́m nə́ atsáb yə fîə.

²⁰ Pəlimə́ mə, kɔ nə́ chîə ándó pɔ̂nkə̂ nə́ akwaŋə́nuə azə́ənə́. Chî nə ándó pɔ́ pi póolə á mə́m təpɔŋə, ḿbə́ ńkwíŋ nə́ akwaŋə́nuə ándó pətəkaŋə́.

²¹ Pə́ ŋwaʼlə̂ á mə́mə aŋwaʼlə Əsê ńgə́, “Mmaʼmbîə á sóŋ ńgə́ maŋ yǐ lɔg ətsáb pipə fî ńnéŋə á ntso pɨ pə́ atû ńjî ńgə́ pó tséebə á mbô pɨ pəənə́. A yǐ pǎtə pə́ ə́lɨ́d lə́, pó kě jwə́ʼtə pô.”

²² Lə́ələ́ pə́ ńgə́ mə tsáb nə́ nə́ ətsáb pipə fî, lə́ kě akyeʼə́nuə á mbô pɨ páʼ pó jî nə́ Əsê pô. Lə́ akyeʼə́nuə lə́ á mbô pɨ pə́ kě nə́ Əsê pí pô, anuə mə́ zóʼ nə́ nkɨ Əsê ə́ kə́ náŋkə lə́ á mbô pɨ pə́ jî nə́ Əsê, lə́ kě á mbô pɨ pó kě nə́ Əsê pí pô.

²³ Lə́ələ́ pə́ ńgə́ mbɔʼ nkyeetə pɔ́ pə́ Əsê ə́ chîə aliʼ mɔʼə́, ŋwu ntsəmə a chúʼə á mə́ tsáb nə́ ətsáb pipə fî, pɨ páʼ pó kě nə́ pɨ pɔ́b pô kɨ pɨ pə́ kě nə́ Əsê pí pó kwúnə á mə́m pó, pó kě sóŋ ńgə́ pɨ lə́ əpɛ̌lə?

²⁴ Lə́ təmbɔʼ ŋwu ntsəmə a pə́ ńtə́ ńnáŋkə nkɨ Əsê, pɨ pó kě nə́ Əsê pí pó kɨ pɨ pó kě nə́ pɨ pɔ́b pô, pó kwúnə á ndɛ̂, ḿbə́ təpɔŋ əghoobə́ a yǐ ŋwaʼə̂ a əmə́g pó ńté anu pó zóʼ nə́. Anu pó zóʼ nə́ a kə́ ńgɛd pó jî ńgə́ pó wǔəə anuə,

²⁵ mənu mətsəm páʼ mə́ chî nə́ á ntɨ́ pó atûə azóobə́ á tsɔ́ʼnə nə́ mɨ́d pó tíʼ ńtsóolə əsê nə məkwəʼtə́ mɔ́b ńgóʼkə Əsê, ə́sóŋ ńgə́, “Lə́ ndə̌ŋdəŋ ńgə́ Əsê a chîə á tətɨ pəənə́ aliʼə́ nə́!”

Əsêndú Páʼ ə́ Pɔŋ nə́ á mə Ghóʼkə nə́ á Mə́m Nkyeetə Pɔ́ pə́ Əsê

²⁶ Mbɔʼ pə́ tíʼ ńgɛd lə́ ə́lɛ́ əghâ nə́ pəlimə́ mə? təmbɔʼ nə́ yǐ ńkyeetə̂ aliʼə́ mɔʼə́, ŋwu tsə̌ a túgə azoobə́nkǐə ngóʼkə, ŋwu tsə̌ a túg ndzéʼkə yitsə̌, ŋwu tsə̌ a túgə anu yitsə̌ páʼ Əsê a kyaʼ nə́ yí nə́ zɨ́d, ŋwu tsə̌ chî mbɔʼ á tsáb ətsáb pipə fî kɨ ŋwu tsə̌ a kə́ ḿbɛ́d ńchî təmbɔʼ a fiʼtə̂ anu páʼ ətsáb pipə fî pə́ ə̈ sóŋ nə́, ghɛd nə́ anuə atsəmə á pə́ nə́ ndú páʼ á yǐ nə́ shib ə́ túgə akwáalə á mbô nkyeetə pɔ́ pə́ Əsê ə́ ghɛd zɨ́d kwéŋə.

²⁷ Təmbɔʼ pɨ pə́ ńchî nə́ ətsáb pipə fîə á mə́ tsáb nə́, á tsáb tsɔʼə pɨ pə́ pɛ̌ kɨ pɨ pə́ teelə́, táʼ ŋwunə a tsáb záʼ yitsə̌ a pɔŋə̂ tséebə ajíə, táʼ ŋwunə a tíʼ ńtyáatə anu pó sóŋ nə́.

²⁸ Lə́ təmbɔʼ ŋwunə a chî ə́wɨ́ chîə á mə́ tyáaatə nə́ anu pó sóŋ nə́ pô, ŋwu páʼ a pěʼ nə́ ńchîə á mə́ tsáb nə́ ətsáb pipə fî lə́, a naʼə̂ yí ńtíʼə ńtséebə nə́ mbɨ əjǐ pó Əsê.

²⁹ Tsɔʼə nə́ ndú wɨ́d wə́, məntúmə́sê mɛ́n mə́ mbɛ̌ kɨ mɛ́n teelə́ mə́ zóʼ nə́ nkɨ Əsê pó chî náŋkə, pətsə́ pɨ pó tíʼə ńkwaŋə̂ á mə́mə atû pó ńgə́ anu məntúmə́sê mə̈ sóŋ nə́ lə́ á lɛ̌ ńkoʼə̂.

³⁰ Lə́ təmbɔʼ ŋwu tsə̌ náanə ńtúgə anu páʼ Əsê a nɨd nə́ yí ə́wɨ́, ŋwu páʼ a tə́ nə́ ńtséebə kɔ a pɨ ńtséebə.

³¹ Ńté ńgə́ mbɔʼ pɨ pətsəm zóʼ nkɨ Əsê ńnáŋkə anu páʼ Əsê a nɨd nə́ áwɨ́ ə́wɨ́ táʼ táʼə, ŋwu ntsəmə a zéʼə anu ə́wə́, ńkə́ ńnéŋ ntɨ́ mɔ́mɛ́ əyǐə.

³² Ŋwu páʼ a túg nə́ ajwi páʼ a zóʼ nə́ nkɨ Əsê ńnáŋkə áwɨ́d a chîə á mə́ ghɛd nə́ ajwiə ajíə a jwə́ʼtə á mbô yí,

³³ ńté ńgə́ Əsê a kě lə́ Əsê ajwaʼlə pô, lə́ Əsê mbwɔ́dnə. Ndzaŋə á chî nə́ á mə́m pɨ pə́ Əsê á mə́m mənkyeetə mə́ pɔ́ pə́ Əsê mətsəm lə́,

³⁴ Pəngyě pə́ naʼ nə́ ntso əghóobə́ á mə́m nkyeetə pɔ́ pə́ Əsê. Ńté ńgə́ noŋkə á kě nɨd ńgə́ pó tséebə á mə́m nkyeetə pô, pó chîə á mə́ tə́ nə́ zóʼə lə́ zóʼ nə́ ndzaŋ páʼ noŋkə Mosisə á nɨd nə́.

³⁵ Təmbɔʼ anu yitsə̌ á chî ə́wɨ́ pó lɔ nə́ á mə́ jî nə́, pó kwə̂ ḿbítə pəlú póobə́ á ndɛ̂; Ńté ńgə́ lə́ əsə́ənə á mbô məngyě á mə́ tsáb nə́ á mə́m nkyeetə pɔ́ pə́ Əsê.

³⁶ Kɨ nə́ kwaŋ ńgə́ atséebə Əsê á nə́ ńdǒo lə́ á mbô pəngyě? kɨ nə́ kwaŋ ńgə́ atséebə Yeso a nə ńgyǐ lə́ tsɔʼə á mbô pɨ pəngyě?

³⁷ Təmbɔʼ ŋwu tsə̌ a kwaŋ ńgə́ yí lə́ ŋwu páʼ ä zóʼ nə́ nkɨ Əsê ńnáŋkə, kɨ ńgə́ a túgə ajwi, a chîə á mə́ shib nə́ jî ńgə́ anu páʼ mäŋ ŋwaʼlə̂ nə́ lə́, lə́ ntəgə́ Mmaʼmbî maŋ ŋwaʼlə̂ nə́ á mbô pəənə́.

³⁸ Təmbɔʼ ŋwu tsə̌ á mə́m pəənə́ a chîə anu zɨ pí pô tə ḿbə́ pə́ kě yə́ á mə́m nkyeetə pɔ́ pə́ Yeso kə́ ḿbí pô.

³⁹ Lə́ələ́ pə́ ńgə́ pəlimə́ mə, nə́ néŋ ntɨ əwə́ənə́ á mə́ tə́ nə́ zóʼ nkɨ Əsê ńnáŋkə, lə́ kɔ nə́ kə́ nkǐə anuə mə tsáb nə́ nə́ ətsáb pipə fîə.

⁴⁰ Lə́ nə́ ghɛd mənu mətsəm ndə̌ŋdəŋ ńkə́ ńdzoŋə̂ noŋkə yi əshîʼnə.

« Roimhe

Air adhart »

2018

Lean sinn:

Ceanglaichean taic

Sanasan