1 Kɔlintyanə 1 - Əka yi Fîə

¹ Aŋwaʼlə zəənə́ á lǒo lə́ á mbô maŋ Pɔlə, páʼ Əsê a nə fóŋ nə́ mə ndzaŋ páʼ a nə ńdɔ nə́ ńgə́ maŋ pə́ táʼ ntú Yeso Klisto yitsə̌, ńkə́ ńdǒo á mbô ndim əwɛn Sɔstenesə.

² Aŋwaʼlə yi wə́ ä ghɛnə̂ lə́ á mbô nkyeetə pɔ́ pə́ Əsê ándó ə́ chî nə́ á Kɔlinə. Á kə́ ńgɛnə̂ lə́ á mbô pɔ́ pə́ Əsê ándó Əsê a fóŋ nə́ ághɔ́b ńkə́ ńgɛd ńgə́ pó pə́ táʼə á mə́m Yeso Klisto. Ḿbɨ́ ńkə́ ńgɛnə̂ lə́ á mbô apuʼə pɔ́ pə́ Əsê pətsəm pó chî nə́ aliʼə́ atsəmə páʼ pó ghóʼkə nə́ əlɛ́n Mmaʼmbî əwɛ̂n Yeso Klisto, páʼ a pə́ nə́ Mmaʼmbî əghɔb ńkə́ ḿbə́ əwɛ̂nə.

³ Pəg chaʼtə́sê ńgə́, Əsê páʼ a pə́ nə́ Tǎ əwɛ̂n pó Mmaʼmbî Yeso Klisto ə́ fɛ̂ á wɨ́ nə́ apɔŋə́ntɨ́ pópə mbwɔ́dnə.

Afoʼə á Mə́m Klisto

⁴ Maŋ zá fɛ̂ ndǎ á mbô Əsê ńté áwɨ́, ńté lə́ pə́ apɔŋə́ntə́əmə Əsê páʼ pə́ nə ə́fɛ̂ nə́ á mbô pɨ ńdaŋə̂ á mə́m Yeso Klisto.

⁵ Ndzaŋə ándó pɨ chî nə́ pɨ pə́ Yeso Klisto lə́, pə́ fɛ̂ afoʼə atsəmə á mbô pəənə́, ḿbá mbô atsáb ntsəm pópə ajíənuə atsəmə

⁶ Ńté ńgə́ nkəənə ándó pəg nə náŋkə nə́ á mbô pɨ ńté Yeso Klisto lə́ ə́ nə ńkwúnə á mə́m pɨ əshîʼnə.

⁷ Lə́ələ́ á pə́ ńgə́ nə́ kě póŋə ajûtsə́ páʼ Ajwiə ä fɛ̂ nə́ pô, ndzaŋə ándó pɨ tə́ nə́ ḿbyáb ndɛd páʼ Əsê a yǐ nə́ nəələ̂ áwɛ̂n nə́ Mmaʼmbî əwɛ̂n Yeso Klisto.

⁸ A yǒ ghɛd pɨ tɨ́ ńtyantə̂ tə ńkoʼə̂ á ndwigtə mbîə, ńjî ńgə́ nə́ yǒ ńkě fid yitsə̌ á mə́m pɨ túg pô, tə koʼə̂ alě páʼ Mmaʼmbî əwɛ̂n Yeso Klisto a yǒ nə́ ńgyǐəə.

⁹ Əsê páʼə a kě nə́ ntɨ́ əyí kwúblə pô lə́, lə́ fóŋ yí ə́fóŋə áwɛ̂n ńgə́ pɛ̌npə mɔ́ əyǐ Yeso Klisto ándó a pə́ nə́ Mmaʼmbî əwɛ̂nə ə́ chîə nəkaʼə́.

Aghabtə á Mə́m Nkyeetə Pɔ́ pə́ Əsê

¹⁰ Maŋ póʼ mbô á mbô pɨ pɔ́pə́mɛ́ mə nə́ əlɛ́n Mmaʼmbî əwɛ̂n Yeso Klisto ńgə́ pɨ pətsəm chî nə́ apímnə ńjî ńgə́ kɔ aghabtə á chîə tətɨ pəənə́. Nə́ kyeetə̂ ḿbə́ táʼ ŋwunə á mə́mə akwaŋə anuə azə́ənə́, ńkə́ ḿbə́ nə́ ndú nə́ náŋ nə́ mənu əwə.

¹¹ Pɔ́pə́mɛ́ mə, mäŋ ə́sóŋə ə́lɨ́d lə́ ńté ńgə́ pɨ pətsə́ á mə́m ngwud kloe pó sóŋ nə́ maŋ ńgə́ azɔŋə á chîə tətɨ pəənə́.

¹² Anuə ándó mäŋ sóŋ nə́ lə́ ńgə́ ŋwu ntsəmə á mə́m pəənə́ a sóŋ ńgə́, “Maŋ lə́ ndzoŋdzəm Pɔlə, yitsə̌ ghə́ maŋ lə́ ndzoŋdzəm Apolosə, yitsə̌ pɨ ńgə́ maŋ lə́ ndzoŋdzəm Sifasə, yitsə̌ ghə́ maŋ zoŋə̂ mə lə́ Klisto.”

¹³ Pə́ lə́ ńgabtə̂ Klisto? Pə́ nə́ ńkwumtə̂ Pɔlə ńté áwɨ́? Kɨ pɨ nə ńkwá nkǐ nə́ əlɛ́n Pɔlə?

¹⁴ Maŋ fɛ̂ ndǎ á mbô Əsê ńté ńgə́ maŋ nə ńkě nkǐə á mbô ŋwu wɨ́ yitsə̌ fɛ̂ pô, tə ńdéʼtə Klipus pó Gayɔsə,

¹⁵ ńjî ńgə́ kɔ ŋwu tsə̌ á mə́m pəənə́ á sóŋ ńgə́ yə́ nə ńkwá nkǐ nə́ əlɛ́nə mə.

¹⁶ (Maŋ nə ńkə́ ə́fɛ̂ nkǐ nə́ ngwud Stefanasə, tə ńdéʼtə ə́lɨ́d maŋ kě pɨ ńkwúmtə ńgə́ maŋ nə ńdáʼ ə́fɛ̂ nkǐ nə́ ŋwu əwɨ yitsə̌ pô).

¹⁷ Ńté ńgə́ Klisto a nə ńkě mə tú lə́ ńgə́ maŋ yǐ ńtə́ ə́fɛ̂ nkǐ pô, a nə ńtúmə mə lə́ ńgə́ maŋ yǐ ńnáŋkə nkɨ yi əshîʼnə á mbô pəənə́. Ńkě náŋkə lə́ nə atsáb páʼə á túg nə́ ayáŋə ŋwu mbî pô, ńté ńgə́ mbɔʼ á náŋkə nə́ atsáb páʼə a túg nə́ ayáŋə ŋwu mbî, mətɨ mə́ chî nə́ nə́ nəwû Yeso atǐə apagləpaglə mə́ laŋ kətaŋə.

Yeso lə́ Mətɨ mə́ Əsê Ńkə́ Ḿbə́ Ayáŋə Ajíə

¹⁸ Atsáb ńté nəwû Yeso atǐə apagləpaglə lə́ akəkógə́ anuə á mbô pɨ pö péŋ nə́, lə́ ḿbə́ ńgɛn nə́ pɛnə̂ ándó pə́ chwádkə nə́ lə́, lə́ mətɨ mə́ Əsê.

¹⁹ Ńté ńgə́ aŋwaʼlə Əsê á sóŋ ńgə́, “Maŋ yǐ tsəŋkə̂ ayáŋə ŋwunə ándó a yáŋ nə́, ə́sɛdkə̂ ajíənuə ngaŋə́ŋwaʼlə a pə́ ənukə́taŋə.”

²⁰ Ndzaŋə á pə́ nə́ lɛ lə́, ŋwu páʼ a yáŋ nə́, a ə́fó? Njîə aŋwaʼlə yi wə́ a pə́ ə́fó? ŋwunə ándó a chigə nə́ ńjîə á mə́ kəʼlə̂ nə́ mənuə á ndu mbîə nə́ a pə́ ə́fó? Əsê a tíʼ ńgɛd ayáŋə á ndu mbî zəənə́ á sɛdnə̂ ńtíʼ ḿbə́ akəkógə́.

²¹ Ńté ńgə́ Əsê nə ńgɛd nə́ nə́ ayáŋə ají nə́ ndú ńgə́ pɨ pə́ kě chîə mə́ lɔg nə́ lə́ ayáŋə ndu mbî zɨ ə́ jîə yí wɨ́ pô. Əsê a tíʼ ńtsɔ́ʼə á mə́ chwádkə nə́ pɨ pó pí nə́ ndzoŋ nkɨ əyí ghɛn páʼ mbî lɔg nə́ ándó akəkógə́ lə́.

²² Pəjus pó náŋə lə́ əkyeʼmə́nuə, Pəglik pó pə́ ńnáŋə lə́ ayáŋə.

²³ Lə́ nə́ pəg, pəg náŋkə lə́ nkɨ ndzaŋ Yeso a nə ńkwû nə́ atǐə apagləpaglə, nkɨ páʼ ə̈ ghɛd nə́ Pəjus pö záŋə məndě, Pətəjǐsê pó kə́ ńdɔg nkɨ yi wɨ́ ńgə́ lə́ akəkógə́ atséebə.

²⁴ Lə́ ḿbə́ ńgɛn nə́ pɨ páʼ Əsê fóŋ nə́ ághɔ́b kɨ pó pə́ pə́ Pəjus kɨ Pəglik, pó jî ńgə́ Yeso lə́ mətɨ mə́ Əsê ńkə́ ḿbə́ ayáŋə Əsê.

²⁵ Ńté ńgə́ akəkógə́ anuə á mbô Əsê, á tsɛɛlə̂ ayáŋə ŋwu mbîə, ajúmə ándó pɛn zɨ́ nə́ ńgə́ á pwɔ́dkə á mbô Əsê, á tyantə̂ ńtsɛ mətɨ mə́ ŋwu mbîə.

²⁶ Pəlimə́ mə, nə́ pə əghâ nə́, kwúmtə nə́ ndzaŋ pɨ nə ńchî nə́, záʼ Əsê a pɔŋə̂ ə́fóŋə áwə́ənə́. Ndzoŋ ndzaŋ ŋwu mbîə a kwaŋ nə́, pɨ pipə nɨ́ nə́ á mə́m pɨ, pɨ kə kě əjî túg pô, ńkě mətɨ kə́ ńtúg pô, ńkě kə́ ḿbə́ pətə́kɔʼ pə́ pəənə́ á mə́mə aláʼ pô.

²⁷ Lə́ Əsê a pə́ ńtsɔ́ʼə ajúmə ándó mbî zɨ sóŋ nə́ ńgə́ lə́ akəkógə́ ajú á mə́ néŋ nə́ əsə́ənə atû pɨ pə́ yáŋ nə́, ńkə́ ḿbɨ ńkə́ ńtsɔ́ʼə ajú páʼ mbî zɨ ə́ sóŋ nə́ ńgə́ á pwɔ́dkə á mə́ néŋ nə́ əsə́ənə á atû ngaŋmə́təənə.

²⁸ A tsɔ́ʼ əpú páʼ mbî wág nə́ ńkəŋkə̂ ə́sóŋ ńgə́ lə́ ənukə́taŋ, ńjî ńgə́ a laŋ ə́lɨ́d ńtsəŋkə̂ əpú páʼ mbî kwaŋ nə́ ńgə́ ə́ chîə atûə anu yətsə̌.

²⁹ Zəənə́ á nəələ̂ lə́ ńgə́ mbɔʼ ŋwunə a kě mbɨ əjǐə á mbi Əsê kɔ́ʼkə pô.

³⁰ Lə́ ghɛd Əsê ńgə́ pɛn pə́ táʼə á mə́m Yeso Klisto, lə́ kə́ ńgɛd tsɔʼə yí ńgə́ Yeso a pə́ ayáŋə azɛ̂nə, ńdaŋə̂ a ndzəm yí pɛn tɨ́ ndə̌ŋdəŋə́ á mbi Əsê, ńtíʼ ḿbə́ pɨ pə́ Əsê pipə ŋwaʼ nə́, Əsê a chwádkə nə́ áwɛ̂nə á mə́m təpɔŋə.

³¹ Lə́ tsɔʼə ndzaŋə ándó aŋwaʼlə Əsê á sóŋ nə́ ńgə́, “Ŋwu ntsəm páʼ a tə́ nə́ ńdoonə̂ á mə́ kɔ́ʼkə nə́ mbɨ əjǐ, a kɔ́ʼkə mbɨ əjǐ ńté pə́ Mmaʼmbîə.”