Títo 2 - Dupade Uruode

Pacajnaqué uréone quigode u unojo

¹ Mu, Títo á, be enga edu pacajnaqué uréone uje Dupade acho uje bacate bojode ayoréo.

² Ango jnanione ujetiga ca boqueraque ore, enga ore ujode ayoréo ore tangári ore. Enga ore susípise deo to ome pisijnaringuéone. Enga etoque ore iji danguretigai. Enga ore chijnorapise dojode ayoréo. Enga ore chidota re ome cuchade jnese rĩ.

³ Adi jé u to ome chequedíe. Ujetiga ore ujodie chequei tangári ore, enga ore chedu Dupade iji dajéode to. Enga ca jutaréguechoquí ore. Enga jé ca ore chójiapo yote pioi rĩ. Enga uerate ore adode ujetiga ore ujodie chequei chirate ore aja ore átegoningáne udore.

⁴ Adi jé u to ujetiga chequedíe chacate gapudíe ore ujetiga ore chijnóra damaníngo, datígo ore jnese rĩ.

⁵ Ujetiga ore susípise deo, enga ca ore pésu cucha gajnarétigo. Ujetiga chaguesi ore to enga ore susípise uraque daguíjnane guio. Enga caniré ore. Enga ore tangaripísi dabayode. Bamo gu ujetiga ore suse dadode guio, enga a ca toque jne ujetiga Dupade guetésonique doi enga cho cucha bisidéguiji Dupade uruode gu ore adode.

⁶ Adi jé u to ujetiga o jnacarode ore quique. Ujetiga ore susápo deo rĩ.

⁷ Títo á, ajusípise beo to, enga a ore chirate ua aja bate omone jne. Ujetiga acate ore, mu edu Dupade uru uréone enga báringai ũrepise pijógapo ome ore jnese rĩ.

⁸ Ajusípise baruode guio to ome bacajnaquéode jnese. Bagaidi tu gu ujetiga ca ore chiraja daru quitique jne ome ua ome bacajnaquéode quitígo. Enga a anguíra pajegátigai aja gosi ujetiga pota chotigase yocacajnaquéode. Uje que cucha gajnarétique déji bacajnaquéode udore gu.

⁹ O ayoré pisagode, pirógode ore quique to. Enga ore tangaripísi dasasórone, darósorone ore. Enga ore ucuei tu ujetiga ore isasórone irasique ore adode jnese. Enga jé ca ore chajnai dasasórone ome daru dosótigo, mu ore cho paraque.

¹⁰ Enga jé ca ore pota poriquérique ome dasasónique ugúcharique. Ore gaidi u gu ujetiga ore isasónique ca todópisa ore ome dagúcha poritígo. Ore gaidi tupo rĩ ujetiga ore úringáringo ate uome pijoque ome ore jnese. Enga ore ujode ayoréo chiraja uje ate uome ore gu uje pacadique ore ome yoquiquetangore Dupade adode.

¹¹ Jé ũré uje Dupade chingo dáringai piquetangore aja erámi unirisórone uyoque jnese. Enga adi jé u uje yirajágo uje chijnóra yoque.

¹² Dupade chijnóra yoque jecute chaquĩ́ra yoque ome yocate gajnaréngone, yoquipotigué gajnaréngone ore rĩ ome erámi jogonórone cucha. Enga chiroque yógaja ujetiga yujuco yocadode guio iji erámi tuné, enga yipecopúsu cucha arégode, enga tadipise yoquijnoraquéode ome Dupade.

¹³ Enga Dupade pota to ujetiga yanguretágopise ojningane cucha yúode. Cuchiyi tupúsu Dupápisi Piquetangóri Jesucrísto diringai ujetiga ca yiyágo yocangoroné ome yui. Chamáñaje di gojni jne enga pininaqué diringai tuté ome yoque.

¹⁴ Baraja gu uje Jesucrísto uté u uje tẽra re ome yoque. Gaidi u gu ujetiga chiqueta uyóguiji yoquisijnaringuéone jnese ome dáringai chuque. Enga churupise yoque ujetiga chinoningase yoque uje pota yógome re gu. Enga pota to ujetiga yójigoji gatéode ome yoquipesutígo cucha omío gatuaque.

¹⁵ Títo á, bajnei tu ujetiga ango cuchade unojo aja ore, enga o ore quique to ujetiga ore jnusi rángome Dupade adode to. Aquĩ́rapo ore to rĩ ome ore ate gajnarétigo. Enga ca agutu ua ome udore. Chamáñaje Dupade iroque ua gu. Ujetiga ajusípise badode guio enga a ca toque jne ujetiga diquiyaque bayoguérique. Enga jogadi a u jne ujetiga pangarate ua ome ore jnese.