Títo 1 - Dupade Uruode

¹ Dupade iroi u Páblo uyu uje yurúsarome ua. Enga Jesucrísto iroguipísode apóstol uñai upo yu rĩ. Enga Jesucrísto uté chiroque yu ujetiga yimate Dupade ajegaidode ayoré aja panguretigai ome Dupade jnese. Jé u to ujetiga yo ore quique ome yoquigaidode Dupade uru uréone ujetiga ore chirajapise quigode to.

² Jé u to ujetiga ore chirote pucuecaringué eyúgojmai yui ome raque to. Chamáñaje Dupade uje que taque to go ome darúrique jé urúo unojo nanique uje cáma chimate erámi. Enga chisi ome pucuecaringué eyúgojmai tuté ome danguresórone ore jnese.

³ Uje chise Dupade ojningai dire enga chingo dáyipie omenie udire ome erámi. Enga Yoquiquetangóri Dupade chiroque yu aja to ujetiga yatata uruode udore ome ore jnese.

⁴ Cho ujetiga yujnacaripise ua, Títo á, uje yanguretágo Dupade jnese. Enga yurusarane unojo gajnengóri tu ua. Yajéode u ome ua ujetiga Yocai Dupade, Yoquiquetangóri Jesucrísto ore chatapísaja ua. U to ujetiga ore chosõre ua enga ore chisi ome pajesereringai ome ua to.

Títo doi Dupade iroquéode iji Créta

⁵ Yaquĩ́ra ua iji yote quedéjnai ajã́ro uje i tu Créta ica gu ujetiga acate ore gaté, enga apésu cucha amirone aja quigode iji ore ujade uje cáma yipéco ica. Yajéode u jeta apésu jnaníringo uñane úringane anciáno iji ore idai chojmara, chojmarane ore jnese. Enga yigaidi tu ujetiga Jesús anguresórone ore cho dangaránone anciáno iji udore iji ore uáguedie jogadode ome dáringa Dupade iglésia. Enga yijíome yiroquéode iji bari to ica ome bacuegode jnanío udore. Enga yiroquéode quigode u unojo ica:

⁶ Ujetiga uerate Jesús anguresórone angaránone anciáno adode enga ca diquiyaque ore iyoguérique ome dojode ayoréo ore jnese. Enga ore acotéraque chojmára. Enga ore abode changureta Jesús jnese to, enga ca dara quedéjnarique tagu ore ome ore angoninguite paritigárigo, jé ome ore ate gajnarétigo to rĩ.

⁷ Chamáñaje Jesús anguresórone angaránone anciáno ore gaidode urásu Dupade iroquéode iji dojode Jesús anguresóño ujade. Jecute omi tu ujetiga ore atígo omío gatuaque. Ujetiga ca ore cho dajosipié ome dojode ayoréo. Ujetiga ca jĩrique ore cho júruru. Ujetiga ca ore chóji yote pioi. Ujetiga ca sijnaque ore. Ujetiga ca ore jnari pláta docoidé bisidégueraque ome re.

⁸ Mu paraque ore, enga ore ajéode u ujetiga ore chijna ayoré díode aja daguíjnane gatuaque. Enga ore irasique picaniratiguéode. Áyipierãque ore enga ore chedu Dupade iji dajéode, enga ore chidota re ome cucha gajnaréngone. Enga ore susípise deo.

⁹ Ore gajnei tupo rĩ ujetiga ore chidota re iji Dupade uru uréone to uje pacadique ore ome ica. Ore gaidi u gu ujetiga ore cho dojode Jesús anguresóño ore quique ome dacajnaqué uréone udore to, enga ore ujode Jesús anguresóño ore jnusi rángome Dupade adode to. Ore gaidi tupo rĩ ujetiga ore chacate Dupade uruode otigayasórone ore to rĩ, ujetiga ore cha chotigase Dupade uru uréone.

¹⁰ Jé ũrepise, Títo á, uje jiei angoninguite parigode iji uacajade gu. Enga cuchiyíode u judíode ore. Uje ore chijnime dara bisidégode gatuaque, enga ore chãra uacuñane.

¹¹ Jé tiógara ujetiga pujuruque jnanione udore pijnanone. Chamáñaje pijogasúode uñane ore tangári ore acajnaquéode enga ore anguretigade chicai quedéjnane. Bamo gu uje quedéjna ore acajnaquéode quigode enga a ca pujuegádirase ore acajnaquéode ujetiga pacadiguirase ore ome. Chamáña gu uje ore cho uréone iji raque mu ore ajegaidi upúsu ujetiga ore chisi ore iji daplátadie.

¹² Crétagosode ore urasade uñai uje ore cho proféta iji ome cucha piqueminórone chojninga nanique: "Jecucha ga ducutáquechoquí crétagosode. Que gusu udore mu chagujnare ore enga ore gajnúone u cuchiso sijnángone uje que toque go ujetiga ayorérique chaquĩ́ra ore ome ore adode. Enga táquechoquí ore to rĩ."

¹³ Enga jé ũrepise crétagosode ore urásai tuté ome dojñane. Jecute opise Jesús anguresórone ore quique iji Créta enga baruode dosója ore. Bagaidi u gu ujetiga ore cha tangári pacajnaqué quedéjnaringo, enga gusu Dupade uru uréone ujetiga ore changureta.

¹⁴ Enga angome ore ujetiga ca ore tangári judíode ore acajnaqué bisidégode uje cachi ore ipesute dacajnaquéode udore. Enga jé ca ore doi ore iroquéode quigode ome yoque. Uje udore ore u gu uje ore cho dedobóya Dupade uru uréone.

¹⁵ Adójnacho uje ome udore uje ore áyipie e icha, enga jé ũré uje límpio cuchade jnese ome ore. Chamáñaje Dupade uruque ore enga ore áyipiedie ueradei. Mu Dupade anguresórojmáne ore isijnaringuéone jé jogate ore ajéode, enga ore áyipiedie quigode gajnarécho. Enga ore áyipiedie pésu ore ejóporinguéone. Jecute ajei noñaque ore enga ore chetaque cuchade jnese.

¹⁶ Chiese ore chiraja Dupade, mu gajnareque ore adode, enga obiréjna uje que ore changuretapise Dupade to. Gajnarenguipise ore adode enga angoninguite paric ore, enga que ore chibote dacátegoningáne adode gotique.