Sálmos 99 - Dupade Uruode

¹ Pangarádejnai u Peduguéjna cuchábi. Uté charidi tu gaté unirisórone udore uñane ore ujai, uje udore ore íode u querubíneone. ¡Punirone unirisórone a jé ore dorási ga ore tãrarárasiji dajogadode! ¡Jnumi udé iji erámone a jé tãrarárasiji dayaridi to!

² Cuchadaté Pangarádejnai uté iji Sión uté, uje íode uñai u Jerusalén. Uje Pangarádejnai uté u uje cuchadatei u ome punirone ore jnese.

³ Picotaque Opejã Pangarádejnai uté i, uje cuchadaté ga iquiñiringuetaque to. ¡Puyaguipise Dupade uté!

⁴ Ua u Peduguéjna Cuchape Pirosobádejnai uje bajnorapise pate uréone. Ua upúsu uje bapésu cuchade jeta tiróguiji jnumi. Ua upo rĩ uje betingare Jacob ape disi ejode ore adode úringáringo ũréo, ga ũrepise bajiritigade ome udore.

⁵ Acotáyo Pangarádejnai, Yocangureni Dupade uté, ga achacho uacagataidie aja jnumi iji uté guídade iquei. ¡Puyaguipísi u uté!

⁶ Moisés, jé aja Aarón ore déji uté catecãraisórone sacerdóteo ore ujade. Samuel déji udore ore ujade to uje ore chutṍri uté i ome re. Ga Pangarádejnai tangári udore ore, ga chajnai udore ore catecãraitigade quigode ome re.

⁷ Dupade uruode tṍraji gue abuja gajnua ome udore ore uje catecã́ri ore. Ga ore suse uté ipijogúsorone darúo quigode guio, jé aja uté áyipie parénguenie udire quigode uje chisíome ore.

⁸ Pangarádejná, Yocudupade á, jé ũré uje bachajnai udore ore. Uje Dupade Posõrasṍri tu ua ome ore, ga banoningase udore ore mu bo bajuñame ore ate gajnaréngone.

⁹ Asíyo Yocangarádejnai Dupade gai enga achacho uacagataidie aja jnumi iji uté jogapi cucarãte puyaque uté iquei. ¡Uje puyaguipise Pangarádejnai, yocangureni Dupade uté!