Sálmos 98 - Dupade Uruode

Sálmo u.

¹ ¡Aracho uacaradé icháraque ome Pangarádejnai, uje uté ipesudode cucha pitijabácho! Ga chise dáringai Pujnuéngaisṍre ome cutejmai detotiguejna, jé aja dãrachu pirosobádejna.

² Pangarádejnai Dupade júdi u uje chise dáringai Pujnuéngaisṍre jé aja Piquetangore. Chingongara dáringai Padode Ajirisõre aja erámi unirisórone ore iji ore edominone.

³ Uté jnusinápo daru ũré casodica ome israélgosode ore jé aja dáringai osongáca ome udore ore. ¡Yocudupade uté úringai Piquetangore ujnomei e chubu erámi!

⁴ Abichoi Pangarádejnai ome uaque iji uacaninaquéode udore quigode, jnumi achamisórone uaque jnese. Anínaño uaque, ga ejnáñopusu uacajñiecade ome uté jeta aracho piradedie uje picotaquéode imotodie u udire.

⁵ Ajñiecacho ome Pangarádejnai ga acotáyo uté ome uacachachagúgode udore, ga ajéyo uaquetígo cucha jocarãtácho uje udore i tu árpa; beyoi ga ajnáño uaquetígo árpa ome uacajñiecade udore.

⁶ Asayo uacabuchutígo iji gatéode uje edodie tṍraji pajéode, jé aja uacabúchudie púpuri udire jocarãtígo ome uacacotaquéode iji Pangarádejnai edominone uje Peduguéjna Cuchábi u uté gu.

⁷ Apésu yote quedéjnai, jogosórone cucha ore jnese jeta ore pésu dajocarãtique iji dajogadi uté yote ga ore usereréjna iji jnumi; jé aja jnumi tudé achamisórone ore jnese jeta ore usereréjnapo iji erámi udé údode rĩ.

⁸ Jé aja yote quedéjna uode ome dáringai bayaque ga chome ayorérique jeta chinguíra dajmanáyone aja ñane, jé aja cucarãte orónenie jeta ore doi ga ore chorase ayorérigo uje ore chijñiecare ome darasitíga gajnéone cucha.

⁹ Ga ore pésu udore iji Pangarádejnai iquei; uje uté a di jne, ga Padode Ajirisõre ome erámi udé. Ga a uté chajire erámi unirisórone ore adode aja quigode jnese, uje ũrepísi tu uté ome cuchade jnese gu, ga ayoré ponáyone jnese a ore pañaji uté ajiritigade udore úringane ũréo jne.