Sálmos 95 - Dupade Uruode

¹ Boyóji te, ga yijñiecaco ome Pangarádejnai uté. Beyoi ga yejnángopúsu yocuruode ome yocachietaquéode ome yocúringane piquetacho guẽrasṍri uté uje gajnua tu yocãretóraque cucarané.

² Beyoi, ga yacágoja uté charidi iji edominone iquei jeta yacãco uté gai, ga yibicoi uté ome yoquininaquédatéode uje yiraco Sálmonie ome uté.

³ Chamáñaje Pangarádejnai u Gosójningai Dupa uté. Peduguéjna Cuchape ga sué dupa pangurenone gai jnese.

⁴ Jogadode iji erámone uje idájapísiji guesode, mu uté chicha udore aja dajmana ajã́ro, ga uté gajneque cucarãte yoricode ore ójodie to.

⁵ Uté jé gajneque yote quedéjna cuchábi uté, uje imanique uté gu. Enga uté chinguíra jnumi aja dajmainie uje chimate jnumi cajnóningai nanique.

⁶ Boyóji te, ga yisígo uté gai ga yibérogo yógaja jnumi. Beyoi, ga yichajo yoquigataidie aja jnumi iji Pangarádejnai Yoquimanisõre uté iquei.

⁷ U gu uje Yocudupade u uté, enga uté urasapísode u yoque, ga uté cho dachidedie áyasai iji yoque uje déji uté gajnei garai. Yoco áyasa posedie iji uté jmainie ome uté úringai Yoquirodisõre. Ujetiga adúcho uté úringai dara iji diri tudé, enga jé beyórasi quigode,

⁸ Uje uté chojninga: –Ca ajároyo uágaja ome yuru quigode, enga ca oyo uacayode ore uje ore áyipiedie uajádei iji pajmini uje i tu Meríba icaite, ga ore isocai upo rĩ iji pajmite uñai uje i tu Masah iji diri tuté iji erãpetarei.

⁹ Ga uacáquiode ore chetingare yu iji uté ga ore chachóguina yu ome yipesutígo cucha, uje ore chimo yipesudode udore mu.

¹⁰ Siqueredie chise 40 años nanique uje yujnapise udore ore uje ore charite erãpetarei iji siqueredie udire, enga yojninga: "Ayoréode udore ore áyipiedie chicáji quedéjnane ome yu, ga que ore chiraja yijmapiedie."

¹¹ Jecute yo júruru ome ore nanique, ga yajo yu aja yurúñiejnane udore, jeta jé ca ore chacája yerani punire ujetiga ore cho paráguiji uté.–