Sálmos 93 - Dupade Uruode

¹ Pangarádejnai chácariji dayaridi ome dáringai Peduguéjna Cuchape, ga cho daguidé pibiéji dáringai nanganataque. Pangarádejnai uté cho daguidé pibiéji dáringai etotinguerãque, ga chigaru aja re. Jnumi uté déji dayaridi uté to ga uajádiji uté, ga que pijocayaque gotique.

² Bayaripi cuchábi uté jé jogate ao dajogadi uté to. Ua u uje bajogate gatuaque, ga que piyaque beruénique to, jé aja uje que barãtique cucha cuse to.

³ Urénga, yote quedéjna bayade udore ore e chéngame re, Pangarádejná. Yote bayade udore ore jocarãi uté chicáji gaté; yote quedéjna bayade udore josé querúpise uje tṍra raja daquéode.

⁴ Mu ujopíeranguipíse uté ome yote quedéjna cuchábode udore jocarãque cuchábode; ujopíerã́quedaté uté ome yote quedéjnai uté igojnane udore ore; Pujnuéngaisṍripísi tu Pangarádejnai uté iji gaté ome ore jnese.

⁵ Bapijogúsorone barúo jé jogate ome dáringane ũrepíso; baguíjnai uté cho daparagádu dáringai puyaguipise, Pangarádejná, enga a jé ca eruénique cuse iji deréjna pitade gatuaque.