Sálmos 92 - Dupade Uruode

Sálmo u, piradé ome dire puyai Sábado.

¹ Cucha ueradi tupúsu ujetiga yacãco Pangarádejnai uté gai jé aja ujetiga yiraco yoquicotaqué gajnéringui yoquiradei ome bei ueradi uté, Pangarádejná, Gatajnoquei Achamisõre á.

² Uerate jeta yocujúdi u bajnoraquédatéi iji durasedie, jé aja basoca uréone udore iji dejade.

³ Uerate to uje yujégo yoquigode jocarãtácho udore uje carubode 10 déji, jé aja uñai uje i tu saltério, jé aja árpa, uje jocarãi uerate uje yijocáco udore.

⁴ Chamáñaje bapésu yirasitigade ome bapesudode cucha udore, Pangarádejná. A yijñiecare ome yajéchietaquéode jne, ga gose bamaningone cucha udore uje bapésu ome bajmainie.

⁵ ¡Urénga, cuchadaté bamaningone udore cucha, Pangarádejná, ga báyipiedie idájapísiji guesi ome dáringanie cuchadaté!

⁶ Mu gatodepéode que ore irajatigárique cuse; ga táyipiegode que ore chiraja cuchade quigode.

⁷ Uje pisijnaringuéone ipesusórone udore ore cho ugarabia uje sué, enga pate gajnaréngone ipesusórone udore ore jnese ujnienie cuse, cuse gatuaque ome dáringanie dipesei, mu ore quique obiréjnai tu dáringáringo pejnaque iji deréjnane jnese gatuaque.

⁸ Mu ome ua, Pangarádejná, bagúsi báringai pijosique iji gaté iji deréjna pitade jnese gatuaque.

⁹ Uje cajirape to betesórone, Pangarádejná; cajirape to bamajosórone ore, uje a ore chise dáringáringo pejnacho jne. Uje pisijnaringuéone ipesusórone udore ore jnese a chisite rágaja quedéjnane jne.

¹⁰ Mu e bajosi yetotiguei iji gaté, ga jé chopise tóro aseque ubuñurãi uté etotiguejnai. Ga aseque ichai uté ga e pojnéngaja yibai.

¹¹ Ga yedodie nínapúsu re uje pañaji yetesórone udore úringane pejnacho. Ga yangoninguinone chududipise yumajósõre sijnángone ujnomei uje udore ore chisingare re ome yu ica.

¹² Ate arégode a ore cho ijnane ome dáringane pojnácho, enga a ore quérã jne, ga ore cho pore yoríco cédro uaté iji uguíjnamui uje i tu Líbano uté.

¹³ Uje pacaque ore iji Pangarádejnai uté iguíjna cuchábi uté, ga a ore ujnienie cuse, cuse gatuaque iji Yocudupade iguíjna cuchábi dosadode.

¹⁴ A ore chise dáringáringo choquíjna marínga, a jecucha ore adie cuse gatuaque jne, ga a ore cho pore ijõre jne uje eteque surujnai.

¹⁵ Ga ore júdi tu uje ũrei tupúsu Pangarádejnai, uje Yãreto cucarané tu, enga que pisijnaringué unátaque cunguésõri uté.