Sálmos 91 - Dupade Uruode

¹ Gosi uje cho dayaridíji Pangarádejna Gatajnoquei Achamisõre gãrésõre jogadi uté a jé pusi Dupa Ujopíerã́quedatéi uté uburúdi jne.

² A yósi tome Pangarádejnai jne: –"Uté u Yãrésõri, jé aja pinama uaté uje chaparu yibai; ga Yangureni Dupa upo uté rĩ, uje yicha yanguretigai aja uté.–

³ Jé ũrepise uje a uté chiqueta ua ome bajnenie pujuya pipoguiédei udire uje bajnapáisõri chicháji baquei, jé aja dequejnaréquedaté pequesarãsórone.

⁴ Chamáñaje uté a chaco babai ome daramanie jne, ga a ese báringárique pãreque iji uté ujnóngone uburúdi. A uté úringai ũré tu jne ujetiga cho paróbedie gajnei guebeque ome ua jeta chaparu babai.

⁵ A jé ca atodo cucha dacate noñatígo iji dejai jne, jé aja bamajosórone ore ichogaranenie docojoi iji diri;

⁶ Jeoga dequejnareque chagúode u uje diguiji ijnangunu uéguei ajéode, jeoga cucha chungóri uje chejna ore iji guedé gatócoro uté, mu a jé ca atodo jne.

⁷ Uje a pejnaque ayoréode iji barosadi jne uje ore batigai chise mil, jé aja iji bãrachua qui ga a pejnaque ayoréode uñane iji uté jne ga ore batigai chise 10 mil marínga, a jé ca ujápisaja ua go.

⁸ Mu ome ua ga gusu a ajire udore ore aja quigode bisideque jne ome bedodie, enga apáñaji jne jeta ate gajnaréngone udore ore chise dasijnaringuéone udore oré ome raque.

⁹ Uje e bo bajogadíji Dupade Gatajnoquei Achamisõre uté gãrétigai; uje Pangarádejna Eyúgojmai u, ga Yãrésõri tupo rĩ.–

¹⁰ Jecute a jé ca cuchárique chósi tiji ua jne. Ga a jé ca cucha chungónique cunguésõri baguíjna cárpai uté to.

¹¹ Chamáñaje a uté chiroque darótigo gaté unirísoño ore aja ua jne gu jetiga ore chirote bejode aja bajesúrigo jnese.

¹² A udore ore chãrai ua iji gaté ome dajmanáyone jne, jeta jé ca anguíra barídai uté aja cucarané uñáraque jne.

¹³ A achíe caraté uaté iji jnumi jne, jé aja uga chagúi uté. Caraté ucatogue uaté jé aja arócojna quedéjnai uté, ga a achiéjna udore iji jnumone jne.

¹⁴ Pangarádejnai chojninga: –Uje uté chicha dajnoraquei aja yu ga, a yirame uté jne. A yicha uté aja jogadi uje idájai jnumi ome dáringárique pãreque. U gu uje uté chiraja yi ueradi ome re gu.

¹⁵ A uté tibidi yu, ga a yichajnai uté jne; yugúsi uté gari iji gajnenie pujurei jmainie. A yijnime uté iji udore, ga a yijosi uté iji gaté jne.

¹⁶ A yipésu ujetiga uté ucuecaringuei umare jne, ga nunaji gajnenie siquerei udire. Enga a yingongara yúringai Piquetasõre aja uté jne.–