Sálmos 89 - Dupade Uruode

Etán ezraítagosi o quigode u udojo.

¹ A jecucha yicha Dupade uté osongaquéode aja yiradedie achachagúgode gatuaque jne. A yibijnani júdode u basoca uréone udore jne jé aja ujeta pijógome pape disi ejode ore jnese.

² Uje yojninga: –A jecucha pipesute pijnoraqué eyúgojmai aja gaté iji deréjna pitade gatuaque jne. Ga bachajapite basoca uréone udore aja gaté jeta jé jogate.–

³ Ga bósi te: –E yipésu yuru iyiejájnane ome yajegaidi uté. Ga yajo yuja yichagájade cucha ome yiroi David uté, jeta uté cho dajnéngu.

⁴ Uje yojninga: "A yipésu jeta jé ca bape disi ejórigo eruénique cuse jne iji deréjna pitade, ga a yipésu bayaripi uté úringai cuchape aja gaté jé aja pape disi ejode udore ore jnese."–

⁵ Urénga, gaté jogonórone udore a ore chicota bapesute pitijabádode jne, Pangarádejná, jé aja basoca uréone to, iji gaté unirísõre puyade ore uague uaté.

⁶ ¿Uje gosi iji gaté cunguésõrirási Pangarádejnai uté? ¿Gosi te á, uje cho Pangarádejnai uté iji gaté jogosórone udore ore ujade?

⁷ Iji gaté unirísõre puyade udore uaguedaté uaté ga Pirosobádejnapísi tu Dupade uté; ga uté úringai iquiñiringuetaque suépise udore jnese gáyode uje ore chaparu uté gai iji charidi.

⁸ Urénga, Pangarádejna Dupa Pujnuéngaisṍri á, ¿gosi déji jeta cho ua? Uje Pangarádejná, etóguejnai tu ua, ga basoca uréone udore ore chaparu babai.

⁹ Bajopié cuse ome yote quedéjna bayade udore ore uje ore socárome dajesui; uje josé chachẽre daquéode mu ua u uje baquĩ́ra ga yodi josé cho paráguiji jnumi.

¹⁰ Ua u uje bãro puniri Rahab uté aja qui, uje puniri uté íode uñai tu Egípto uté, ga cho pajnoqueque aode. Basite betesórone udore ore aja quedéjnane ome bajmaneca ujopíerãi uté.

¹¹ Bajneque gaté, ga jnumi gajnesṍri tupo ua rĩ. Erámi tudé jé aja jogosórone cucha jnese iji erámi údode, ga ua u uje bamanique ore ga ore jogate gu ua.

¹² Bapesute casaque garani, jé aja umusoi garani. Cucarãte chaguesíode uje ore íode u Tabor, Hermón ore chachietáji bei ueradi uté ga ore chicháji daradedie.

¹³ Bajmanecai uté ga ujopíerãque. Bajmanai etoque, ga bajmanai iji bãrachua pijosiguíji gaté.

¹⁴ Pate arégode, pajiritíga uréone ore u bayaripi ueradéjnai iríbidi. Posongaquei jé aja cucha uréone udore ore déji barúbuchai iquei gatuaque.

¹⁵ Pininaquei gajnesórone u udore ore uje ore chiraja pininaquei uté ichorai. Urénga, Pangarádejná, a benochai idírecaringuéi u ujeta chijñate udore ore guípiedie gáyode jne.

¹⁶ Ga ore chachietáji bei ueradi uté iji deréjnai údode. Ome bate uréone udore ga a pijosique udore ore iji gaté jne.

¹⁷ Chamáñaje ore etotiguei úringai ingoningarãque garani tu ua. Ome bacaniratiguei uté ga a apésu jeta pijosique yóguiji gaté ome cutejmane yoquetotiguejna jne.

¹⁸ Uje yocãrésõre guebei uté uje pichajapite aja yocarobé yui, mu Pangarádejnai gajneque uté. Ga yoqueduguéjna cuchábi uté gajnesṍri tu Peduguéjna Puyai uté iji Israel uje ueguipise uté ome pisijnaringuéone.

¹⁹ Ua upúsu uje bapésu ga baroque uréone ore chimo denominone, ga bojningame ore iji uté: –E yẽrate yátajaquéode ome jnani etoque cuchábi uté; uje e yijosi yajegaidi jnacare jõcarataque uté iji gaté iji ujode ayoré ore ujade.

²⁰ E yise yiroi David uté. Ga yojne yajnei aseque puyaque aja David uté ójo.

²¹ Ga a jecucha jogate yijmanai ome uté jeta chátaja uté gatuaque jne, jé aja yijmanecai uté to jeta chisíome petotiguei ome uté.

²² A jé ca toque jne ujetiga uté umajósonique doi ga sué uté gai ome daringaquérique; ga a jé ca ate noñángone ape gotique doi ga cho dajosipié ome uté jne.

²³ Uje a yĩro uté umajosórone udore ¡quéguese! jne iji uté edominone, ga a yinguíra uté etesórone udore aja jnumi.

²⁴ Enga yisoca uréone, yúringai osõrataque ore a jecucha jogate ome uté gatuaque. Ome yi ueradi uté a pijosique uté iji gaté ome cutejmane detotiguejna.

²⁵ A yichajapite uté jmanai aja yote quedéjnai uté gai jne uje imoi tu uje cho dajnepídi iji uté, ga uté jmana dãrachua u uje a yicháji tiedie udire gai jne ome uté úringai pujnuéngaisṍre.

²⁶ A uté tibidi yu jeta chojningame yu jne: "Ua u Iapade, jé aja Yangureni Dupa uté. Ga bajnua tu yãretóraque cucarané uje yúringai piquetaque tṍraji uaté."

²⁷ Ga a yo yuti yape iji uté jne, jeta déji peduguéjna cuchábode udore ore jnese gai iji erámi.

²⁸ Yosongaquei ome uté a jé jogate iji deréjna pitade gatuaque, ga uté gajnéone yuru iyiejájna ome re ga a ca toja gotique to jne.

²⁹ A yipésu jeta jé ca uté ape disi ejórigo eruénique cuse jne iji deréjna pitade, ga uté charipi cuchábi jé chome gaté jogosórone cucha ome gajnéone dire.

³⁰ Mu ujetiga uté abode cho dedobóya yuru pirosobádode udore ga jé ca ore chajna yarecujate iyiejnanie udire quigode;

³¹ Jeoga ore cho cucha bisidéguiji yáyipie pirosobádedie, ga jé ca ore doi yiroquéode udore quigode;

³² Enga jé u jne ujetiga yo yujuñame ore angoninguite paritigade ome yogué uaté, ga a ore chimo yejopórigo ome re jne gu ore ate gajnaréngone udore ore.

³³ Mu yetéquetí yijna yosongaquei iji David uté gari jne, ga que yujuéga ujetiga yúringai ũré uté aringaquérique cuse gotique to.

³⁴ A jé ca toc ujetiga yibéro yu ome yuru iyiejnane udore ore quigode jne, uje adi tu yuruode udore uje tocade iji yibijnani, que pecãraque gotique to.

³⁵ Cucha chojmarai tu uje yajo yuja ome Yúringai Dupa Puyaque, enga que toc ujetiga yo yurupatáringa ome David uté:

³⁶ Uje a jé ca uté ape disi ejórigo eruénique cuse jne iji deréjna pitade gatuaque, ga uté charipi cuchábi jé chome guedé uté iji yedominone ome úringai jogate.

³⁷ Uté charipi cuchábi uté a jé jogate jne gatuaque ome dáringai eyúgojma, ga gajnui tu guedoside uté, uje pijogúsõri ũré tuté iji gaté.–

³⁸ Mu bṍra uté aja ti yui, Dupade á, ga bo betéquedatéi iji. Bajegaidi casica eduguéjna uté e nóña ga bo bájningame uté.

³⁹ Baru iyiejnane udore ome baroi e que bepoi quigode rĩ. Enga bapésu uté ayoi úringai noñaque uje banguíraja jnumi ¡tung!

⁴⁰ Ua u uje bajnangarase uté ujuyaquéode udore jnese, ga bapésu ga poragadé yorícodie jnese uje chãraque uté e nóña ga urui jnumone.

⁴¹ Udore ore jnese uje ore chiramísara uté jogadi ga ore doi ga chajnose uté aja dajesúode. Ga uté gajnéone u ejominórone ujo ayoré ore ichietabáitigade.

⁴² Bajosi uté etesórone udore ore ãrachua iji gaté, ga bapésu uté umajosórone udore ore ajéchietaringuéi ome dáringáringo pujnuéngaisóño.

⁴³ Bapésu uté oidi queségodóque asi uté úringai paca, enga que apésu uté iyáguesiringárique iji dajocaningai uté gotique.

⁴⁴ Uté úringai ingoningarãque e chise deruei, ga gose ua. Enga banguíra uté charipi cuchábi aja jnumi.

⁴⁵ Baquesu uté úringai jnacare gajnéone dire iji pajei, ga catadéo. Ua u uje bapésu ga uté cho pepeque piguidíji dipoi uté.

⁴⁶ Urénga, Pangarádejná, ¿díningo cho rique iji yui? ¿Apógu ua iji deréjna pitade gatuaque a? ¿Cho rique iji yui ujetiga báringai júruru uté que chopo pioque ditaguérique rĩ?

⁴⁷ Ajnusina uje garósi yucuecaringuei iji de erámi. ¿Gotique chimo jóroque re uje bapésu jórogu jnanione udore ore jnese?

⁴⁸ ¿Ama uñeque dérasi jetiga eca ga ca toji erámi udé to, jeoga doi ga chapídome pitoringai uté jmana ujopíerãi isagode ome re jã?

⁴⁹ Urénga, Pangarádejná, bajnoraquédaté baja casica ¿déji rique? Uje bajo ua aja bachagájade barúo udore ome David uté ome báringai ũré uté.

⁵⁰ Pangarádejná, ajnusina uje barógode uyoque ga jiei ore uje ore dojnóngaja yoque, ga purása quedéjnane udore ore jnese chujñieta yoque. Enga udojo chácariji yáyipie údode.

⁵¹ Urénga, Pangarádejná, bamajosórone ore u uje ore cho damitiguéo, ga ore dojnóngaja bajegaidi uté guípiedie jnese, uje bojne aseque puyai aja uté ójo.

⁵² ¡Picotaque Opejã Pangarádejnai uté iji deréjna pitade údode jnese! Ga jé upúsu, Amén.