Sálmos 88 - Dupade Uruode

Piradé u. Sálmo udaque pipesudé ome Coré abode. Piradé udaque gajnesṍri u piradedie irajasṍripísi. Hemán ezraítagosi o quigode u udojo.

¹ Urénga, Pangarádejná, Yiquetasṍri Dupá, iji dirode, dejade ore ga yibidi ua iji benominone.

² Amesẽre jeta yicatecãraitigade chise baquei. Orei bangoninguini iji gadoi jeta angári yagoyedie iji bejode.

³ Chamáñaje cucha dacate gajnareque uásejnane udore u uje yore yibai. Enga yucuecaringuei uté e chirõre ducode uaté pijnanai.

⁴ E pisecarãte yu to iji udore ore batigai uje ore basája togode ore gajnei eruque, ga yajnui tu jnani etótique uje nóña ga que etotiguérique cusapo rĩ.

⁵ Jnani noñimei tu yu iji togode udore ujade, ga yisocai jé cho ayoré chutígo udore ore uje e ore moji jnaropié uaté ga que ajnusinápo udore ore rĩ, ga pejñuque ore iji bajmanai úringárique pãrésõre.

⁶ Bachajapite yu aja ejo yoríco udimitópisi chaquipie, uje utataringué cuchábi jogadi tu.

⁷ Báringai júruru uté chajo yu aja jnumi; bapésu ga yejnáreque yu ome yote bayátique igojnane udore uje doi baroquéode ga ore chacópise yibai jnese.

⁸ Bajna yijorámeone ore jnese iji yari jeta idája ore iji yu, ga bapésu yúringai peteque ome ore. Pujurúgai yu, ga que toque guese pigaitígome yu.

⁹ Yajirigode íjnoque ga gose cutejmane yáyuguhebátiga. Urénga, Pangarádejna Eyúgojmá, iji dirode jnese ga yibidi ua ga yorei yijmainie iji gaté iji bei.

¹⁰ ¿Ama jé apésurásu bapesute pitijabátique ome ayoré togode ore a? ¿Ama ayoré togode oré gatedie chiringarirase re ga chicota ua to a?

¹¹ ¿Jé ũré uje pute bajnoraquédatéi iji ducode uaté jã? ¿Jeoga ore chatata báringai ũrepise iji cucha pejnangore jogadi uté?

¹² ¿Ama bátedatéode pijoguirase iji ijnangununie jogadi uté to a? ¿Jeoga bate arégode u, jeta ore chiraja udore iji cucha picadiguiédode jnese uniri uté?

¹³ Mu uyu ga, e yibidi ua jeta átaja yu, Pangarádejná. Ga yicatecãraitigade a chajningare baquei iji durasé jne gatuaque.

¹⁴ Urénga, ¿Cuchárique u gu a uje bo betéquedatéi iji yu, Pangarádejná? ¿Cuchárique u gu a uje bapógu benochai ome yu?

¹⁵ Uje qué jnacaripíta yu nanique jé aja de, mu jé yipese yu aja quedéjnane ga yajni pitoringai ejode gatuaque. Yipeyaque yu ome beranone pagutéjoragoso udore cucha, uje que yimécãre.

¹⁶ Báringai júruru uté e pamurañaque yibai, ga beranone cucha iquiñiringuetáguipíso udore e chajnongose yu.

¹⁷ Iji deréjnai údode ore chaparu yibai, ga cho yote bayátique iji yejode; e ore chajópise yu aja ñane.

¹⁸ Bajnime yijorámeone ore iji yari jeta idája ore iji yu, jé aja udore jnese uje yijnórango ñane, ga yijõra idógosia tu ijnangunua uaté.