Sálmos 85 - Dupade Uruode

Piradé udaque gajnesṍri u piradedie irajasṍripísi. Ome Coré abode. Sálmo u.

¹ Urénga, Pangarádejná, bangongara bacaniratiguei aja bajnei punire uté. Uje batirépo Jacob ájnape disi ejode ore gajnéone cucha dacate arécho ore gai rĩ.

² Banoningase barasade udore ore isijnaringuéone iji ua. Ga baco udore ore ate gajnaréngone gai jnese.

³ Bacha bájnangamíe jnese aja ti yui, ga borei bedoboi iji bájningai uté úringai júruru.

⁴ Urénga, atirépo yocúringa casodica areque yoquibai rĩ, Yoquiquetasṍri Dupá, enga apésu jeta báringai tagu dejo eruei tu ome yoque.

⁵ ¿Ama jé ca báringai ájningarãque ome yoque chibéropo re jne rĩ iji deréjna pitade a? ¿Jeoga jé bo báringai júruru uté údi jé aja pape disi ejórigo udore jnese eruénique jne a?

⁶ ¿Ga a jé ca atirépo yocucuecaringuei yoquibai jeta barasade uyoque yachietágoji ua ome yoque jne a?

⁷ Urénga, Pangarádejná, angongara bajnoraqué eyúgojmai aja yoque, ga ajuéga jeta yimóngo báringárique yoquiquetasõre ome yoque.

⁸ A yangári Pangarádejnai Dupade uru quigode jne. Uje uté a chichaga pajesereringai aja darasade jne, danguresórone udore ore, mu jé ca ore chajniapója datáyipietigade jne rĩ.

⁹ Jé ũré uje Dupade úringai Piquetasõre idógosipísiji udore gosode uje udore ore tõrorája uté iquei, ujetiga uté ingoningájnai cho daniri iji yocuniri udé jnupe.

¹⁰ Posongaquei, puru uréone ore chachai ñane; ga pisoca ujñapetade, pajesereringai ore doi ga chucu ñane uredie.

¹¹ Cucha uréone ujnienie udire a sué iji jnumi jne; enga pisoca ujñapetade iji gatajnoquei a chajo raja jnumi yui jeta toji gai jne iji dádi.

¹² Jé ũrepise uje a Pangarádejnai uté isíomeone u cucha ueradode jne, ga yoquiyaridi jnupe a pésu dadie jne.

¹³ Ga pisoca ujñapetade udore jé jogate Dupade uté iquei jeta pésu dajei iji uté iquéode.