Sálmos 83 - Dupade Uruode

Piradé u. Asaf uté ipesudé Sálmo udaque.

¹ Urénga, Dupade á, jé ca o paráguiji jnumi gatuaque. Jé ca bajnui tu pijnate parigode, Dupade á, ga ca ácare bádi.

² Cajire bajmajosórone udore ore uje ore ipesute cutejmane dachora, ga betesórone udore ore chosi riji gaté ome ua.

³ Ga ore chimate dáyipie josipíerénie ome barasade udore ore yui; uje ore áyipie noñánguenie quisórone u bedójnarione udore ore.

⁴ Ore chojninga: –Boyo yico ga a yipéco jaribei tiji ore uniri jé aja achamisórone jnese jne, jeta jé ca páyipie gaidápo israélgosode ore i uté iji erámi udé.–

⁵ Ore chimate dáyipiedie ome ñane, ga udore ore cho ayoré chojmarárique uje ore cháta raja ñane; ga ore chajo raja daru iyiejnane udore uje ore pésu ome ua:

⁶ Ga edómgosode udore irengúone u, jé aja ismaélgosode udore ore. Udore ore déji to uje ore tṍraji punirone uje ore íode u Moab, Agar ore.

⁷ Guebálgosode ore déji to, jé aja amóngosode ore, jé aja amaléquegosode, jé aja filistéogosode ore, jé aja Tíro achamisórone udore to.

⁸ Ga asíriagosode jé upo rĩ, uje ore cháta raja ore to: uje asíriagosode udore ore gaidi u ujetiga ore cháta detotiguejnai aja Lot casicaite ape disi ejode udore ore.

⁹ Dupade á, jé be basoca casica ome madiángosode ore nanique ome udore ore. Ga ore gajnéone bajuyaqué jé cho bajuyaqué casica uje bapésu ome jnani bajade uñane uje ore íode u Sísara, Jabín ore iji tié uaté uje i tu Cisón.

¹⁰ Uje pejnaque ore nanique iji pidai Endor uté, ga udore nóña ga cho puchade iji jnumi.

¹¹ Be ga apésu jeta ore angaránone udore gajnúone u udore uje ore íode u Oreb, Zeeb ore. Ga ore eduguéjna ibijógode jnese jé chorase Zéba, Zalmúna ore.

¹² Uje udore ore chojninga: –Yicoi ga yoco yocajnéngu Dupade gachidedie jogapíode udore garáyo jne.–

¹³ Urénga, Yudupade á, apésu ga ore chorase úyujna uaté uje chijnire jnumi aja dajesui, ga ore cho jnacaraque chiriritátigo uje emi chubúchu ore aja quedéjnane.

¹⁴ Peduguéjna ibijógode udore ore adi jé urásu uguíjnamu papótique ome cutejmai docarádejna, ga chopo cucarãtique ome dáringárique ocarataque rĩ.

¹⁵ Jecute be ga ajmongarája ore ome batocaidi eme cuchátique, ga apésu jeta ore aguté cho túcutúc ome bapesudi guetṍraque uté.

¹⁶ Ejna pajegátigai aja ore edodie jeta irágupúsu, uje bagaidi u gu jeta jnanione udore ore chucué bei ueradi ome re, Pangarádejná.

¹⁷ Jé tiógararása jeta dipoi yore ore gai ga jé ca udore chise dajegátigai eruénique iji deréjna pitade jnese; omitigai turásu ujetiga ore chajéngome re ga ore toi dáringai dipoque údi.

¹⁸ Apésu ga ore chiraja jnese uje ua u uje pĩcaraque Pangarádejna Eyúgojmai aja ua; ga Dupade Gatajnoquei Achamisõre dugai tu ua uje bajnué cuchade gai jnese iji jnumi tudé.