Sálmos 82 - Dupade Uruode

Asaf uté ipesudé Sálmo udaque.

¹ Dupade chague iji dapesudé gague uaté iquei ome dajiritigade ome padode ajirisórone ore, uje ore chácariji dayaridode gu Dupade uté, ga Dupade cho dupárigo iji ore ome ore úringane peduguéjna.

² Enga chósi tome ore: –¿Ga cho rique ujetiga ayáyo uacajiritíga tágode udore, ga ayáyo oyo uacameserane iji sijnángone udore ore?

³ Beyoi ga ũré uágome uacajiritigade ome udore uje que ore tayápo rĩ, jé aja disijádode ore; ga apéso pajiritíga uréone quigode ome pijosipiedie gajnesórone udore ore, jé aja ayoré jmatágode udore ore.

⁴ Aquetáyo ayoré serẽrachugode jé aja ayoré jmatágode udore ore, ga ajnicho udore ore iji ore isasórone jnani sijnaque udore ore jmainie.–

⁵ Pirajatigai chona padode ajirisórone udore ore, ga que ore nunaji cuchárique quigode gotique to. Ore chaca ñane iji ijnangununie ajéode. Ga cuchade erodie jnese iji erámi chécãre dajogadode iji udore ore ajiritíga tágode jmainie.

⁶ Uje yojninga: –E yo dupárigo iji uaque uje yutocaidode u uaque ome uacáringane peduguéjna. Ga Dupade Gatajnoquei Achamisõre abode jnese u uaque.

⁷ Mu ũré uje a oyo ayoré ponáyone jnese jne, uje ore jnese chise dáringáringo tocho; a jé oyo peduguéjnane uñane ore jnese to uje ore cṍra jnese.–

⁸ Urénga, ãriji, Dupade á, be ga ajire padode iji erámi ome bajiritigade udore, uje punirone jnese ore gajnesṍri tu ua gu.