Sálmos 81 - Dupade Uruode

Piradé udaque gajnesṍri u piradedie irajasṍripísi. Asaf uté ipesudé Sálmo udaque.

¹ Ajñiecachója yoquetotiguei guẽrasṍri Dupa uté ome uacaninaquéode; anguíraño uacabijnanone aja Jacob angureni Dupa uté ome uacachietaquéode.

² Beyoi sálmo uaté, ga ajéyo uaqueguedie panderéta ¡yígui, yígui! Ajéyo uaquegode saltério ore, jé aja árpa to uje jocarãque unéño.

³ Abúchuyo uacabuchugode trompéta jeta chise guedosi tocachuque ichai. Jé aja jeta chise guedoside uje e dai ga yoquininquei dire puyaque jogadi u uté.

⁴ U gu uje Dupade iroquei u ome Israel uté jeta yipéco dire puyai uté, enga parecujate iyiejna u uje tṍraji Jacob angureni Dupa.

⁵ Uje Dupade pésu ga jé jogate iroquei uté úringai pijogúsõre ome José uté to, uje chaquesu Egípto ome dáringai do iji uté. Ga yudute puru guichayade iji uté uje que yiraja quigode gotique.

⁶ Ga chojninga: –E yijnime uté orotadi iji jnungone cucha iménuo. Enga yejñu uté jmanáyone isagode iji canásta iménujna uaté.

⁷ Babidi yu ome báyuguhebátigade ga yiqueta ua ome udore. Yichajnai ua iji yibié uaté gue abuja uje guéode uruode cho dapoguiépidi iji uaté. Ga yetingare banguretigai iji gajño uaté uje i tu Meríba.

⁸ Urénga, yurasade uaque á, angáchoi yu ga a jé yisíome yaquĩraquéode ome uaque jne. ¡A jé angáchobírasi yu, israélgosode uaque á!

⁹ Jé ca ajuécho dupa quedéjnarique iji uacajade. Enga ca achacho uacagataidie aja jnumi iji purása quedéjnane ore angurenone dupa iquei to.

¹⁰ Pangarádejnai u uyu, Badupade uté, ga uyu u uje yijnimique uáguiji puniri Egípto uté nanique. Angare babijnani gai jeta guesápisaja, ga yĩreta ome bameserane cucha udore jne.

¹¹ Mu yurasade que ore pota tangári yúringai dara. Enga israélgosode que ore doi yuruode gotique.

¹² Jecute yiminingara ore ome ore áyipie ucusuréringane, ga ore chajna dáyipie ayoré quigode iji jnumone.

¹³ Urásu ujetiga yurasade ore tangárirási yuru quigode, ga israélgosode udore a ore chajnápisirase yijmapiedie udire quigode.

¹⁴ Enga a jĩraque yipésurásu ore umajosórone ore úringai pujnuéngai, ga a yijócãrirase ore etesórone udore ore ome yijmanai uté.

¹⁵ Pangarádejnai uté etesórone udore ore a ore chajórase rágaja ñane iji uté iquei ome cutejmane danejequé tácho, mu ore úringane pujuya jogadi urásu iji deréjna pitade gatuaque.

¹⁶ Mu ome ua ga a yṹrarása trígo ueradi aja ua. Ome cutepéode uje tṍraji cucaranédaté uje déji erámi ga a yipésurásu jeta jé ca aroriguíji.–