Sálmos 80 - Dupade Uruode

Piradé udaque gajnesṍri u piradedie irajasṍripísi. Asaf uté ipesudé Sálmo udaque.

¹ Urénga, israélgosode ore Irodisõre á, ua u uje bajñaque José uté aja ajesúode ga bo áyasa posedie iji urasade, ga be ga acha bangoninguini aja gadoi. Ua u uje bo bayaridi iji gaté unirísõre orerane udore ore ujai, uje udore ore íode u querubíneone, iji baruode pi cajo joride gai, ga be ga aqueta ua aja yógome badírecaringuéi uté.

² Iji Efraín, jé aja Benjamín, jé aja Manasés ore uáguedie edominone, ga aringare betotiguejnai, enga abágui yógome báringai Piquetasõre.

³ Urénga, atirépo yocúringa casodica areque yoquibai rĩ, Dupade á. Be ga ajñate yoquibai ome benochai úringai nanganataque, enga yocúringai piquetaque jogadi a jé u jne.

⁴ Pangarádejna Dupa Pujnuéngaisṍri á, ¿cho rique díningo jne ujetiga aya bájningamíe uaté ome barasade udore ore icatecãraitigade ome ua?

⁵ Uje bã́raja ore ga ore cho arureque pibotíji ore educadode; bapésu ga ore chóji deducadode ga ore ujuyápise.

⁶ Bapésu ga pujuredie garani tu yoque ome yoquejominórone yocujo ayoré ore; enga yocumajosórone udore ore cana dabáyode ome yoque.

⁷ Urénga, atirépo yocúringa casodica areque yoquibai rĩ, Dupa Pujnuéngaisṍri á. Be ga ajñate yoquibai ome benochai úringai nanganataque, enga yocúringai piquetaque jogadi a jé u jne.

⁸ Bajnime erejna quedéjnarique iji Egípto uté ga bãri údi iji de. Bajócãre purása quedéjnane iji ore gajnei jnupe ga baca bajnimi uté erejna quedéjna iji ore jogadi.

⁹ Ga bajo jnumi uté bajaque jeta aca erejna quedéjnai uté iji bajopídi. Ga sué ga erode jnome sona ga jmanecade quérã ga suru puniri uté.

¹⁰ Ga erejna quedéjnai uté chaco cucaranone gai ome dáringai uburutaque, ga jmanecade choru pore yorícodie gai uje ore i tu cédro ga chaco ore gai.

¹¹ Erejna quedéjnai uté jmanecade chuságaja yote quedéjnadatéi uté, ga dugúgode chichagapo raja tiédaté rĩ uje i tu Éufrates.

¹² ¿Cuchárique u gu a uje bajnangarase ujuyaquei uté iji erejna quedéjnai adie úva gai? ga udore jnese uje ore chiramísara jogadi uté ga ore doi ga ore na adie aja dajesúode.

¹³ Yãcoré quedéjna choquíode udore uje tṍraji monte chicha daromínone aja bacadie udire gai ga chuchiéjna jnumone. Enga garai jogonórone cuchiso sijnácho ore tagu udire adie.

¹⁴ Urénga, Dupa Pujnuéngaisṍri á, ¡yijóchago bajei údi jetiga ajniápo rĩ! Iji bayaridi iji gatajnoquei uté ga ajire yóguiji bádi, ga adójnanga unojo. Ga ajire erejna quedéjnai udé yui ome báringai iroditaque.

¹⁵ Ãraque bacai uté erejna quedéjna uje baca uté ome bajmanai bãrachua, jé aja ujnié uaté uje bapésu úringa etogue aja gaté ome ua.

¹⁶ Bacai uté erejna quedéjna ga paquesuque aja jnumi, ga e papose gai; a barasade udore ore toi jne ujetiga benochai patíja ome ore.

¹⁷ Be ga bajmanai uté chácarásiji jnani uté gai uje déji bãrachua, iji jnani abi uté gai uje baringare uté aja gaté ome ua, ga bapésu uté jeta uajádiji dajogadi.

¹⁸ Enga a jé u jne ujetiga jé ca yicagóji siñéngome ua. Be ga asi ome pucuecaringuei ome yoque gaté, enga a yutocoi bei ueradi ome yoque jne.

¹⁹ Urénga, atirépo yocúringa casodica areque yoquibai rĩ, Pangarádejna Dupa Pujnuéngaisṍri á. Be ga ajñate yoquibai ome benochai úringai nanganataque, enga yocúringai piquetaque jogadi a jé u jne.