Sálmos 8 - Dupade Uruode

Piradé udaque gajnesṍri u piradedie irajasṍripísi. David ipesudé Sálmo u.

¹ ¡Urénga, Pangarádejná, Yocangarádejnai Pujnuéngaisṍre á, ijningueñatai tu bei ueradéjnai iji erámi údode jnese! Bachajapite bangoningájnai aja gatajnoquei uté uéchai.

² Betotiguei pijoque ome betesórone udore ore gu disi parátagabode, disi pacucarámone sudore ore, uje garósosi sudore ore etotiguebi mu; uje bedugádabode sudore ome bajnéone picotaquéo uje tṍraji ore pijnani, ga bapésu jeta bamajosórone ore cho paraque, jé aja jnani jnutágode udore ore.

³ Uje yajire gaté ga yimo gatajnoquei úringai pimanique ome bajmainie, jé aja guedoside, guédodie udire ore uje bachajapite udore jnese aja charidode iji gaté;

⁴ ga yojninga iji yajei: –¿Ga cuchárique u jnani uté? uje báyipie jogate uté. Uje ayorei ape gosi, mu ¿cuchárique u gu a uje bajmita uté?–

⁵ Mu bapésu jeta bamani uté ayoré chajni bapesudode gaté unirísoño ore yúode garósi. Ga ayorei uté pi u ducayo nanganatátique ome ua, uje bapesute uté úringai ingoningarãque, úringai pisígai ome uté.

⁶ Bapésu uté úringai pujnuéngaisṍre ome cuchade udore jnese iji bamani udé jnupe gai te rĩ, uje bapésu udore ome bajmainie, ga bacha cuchade udore jnese aja ayorei uté guídade údi;

⁷ Ga áyasadie jnese u, jé aja aquirájnanie jnese rĩ, jé aja cuchiso ponáyone jnese iji garáyode;

⁸ Ga chugúpẽre chogode upo rĩ, jé aja oyídode uje ore déji yote quedéjnai uté jochai ajei, jé aja yote quedéjnane unirisórone cucha udore jnese, uje uté sué gai jnese.

⁹ ¡Urénga, Pangarádejná, Yocangarádejna Pujnuéngaisṍre á, ijningueñatai tu bei ueradéjnai iji erámi údode jnese!