Biblia Todo Logo
Bìoball air-loidhne

- Sanasan -

Sálmos 77 - Dupade Uruode


Piradé udaque gajnesṍri u piradedie irajasṍripísi. Ome Jedutún uté. Asaf ipesudé u.

1 A yinguíra yibijnani aja Dupade uté jeta chátaja yu jne. Ome yúringai dara ga yibidi uté, ga a uté chicha dangoninguini aja gadoi jne.

2 Iji yúringai áyuguhebátaque dire uté ga yucué Pangarádejnai uté ome yu. Que eyuque yijmanecade uje yayo udore údi aja gaté iji dejai údode, enga que pajnique yujnusiétigarique iji yáyipie gotique.

3 Yujnusina Dupade uté, enga jé u uje yijnare. Yáyipie dépisiji yáyuguhebátiga gajnéone cucha ga jé u uje yáyipie betápisaja iji yajei.

4 Que ajuéga jeta yedodie chipocásu dabáyode gotique; ga cuchade chácariji yúdode, enga que tocápo darai ome yu rĩ.

5 Yáyipie chajmita dire iyajmane udore iji yiquigáningo, siqueré cásidicáite udire.

6 Yujnusina uje yijñiecare ica iji dejade. Yáyipie jogate cuchade, ga yicatecã́ri yu iji yajei ome cuchade udore quigode:

7 –¡Chimo jóroque re! ¿Jé ca Pangarádejnai uté chapo detétigade iji deréjna pitárique rĩ? ¿Ama jé ca uté chingongarápo dacaniratiguérique aja yoque rĩ a?

8 ¿Jeoga ijnoraquédatéi e chise deyutiguei ga bijna iji deréjna pitade gatuaque? ¿Jeoga uté uru iyiejájnane noñaji iji deréjnane jnese?

9 ¿Jeoga Dupade chicadígui dáringai osongáca? ¿Jeoga uté úringai ájningarãque doi ga suru osongaquéode udore yui a?–

10 Ga yojninga iji yáyipie: –Yejnarei jé u udé, uje Dupade Gatajnoquei Achamisõre uté ãrachu ujopíerẽ́ uaté e chécãre re.–

11 Mu a qué yujnusina Pangarádejnai uté ipesudode cucha jne. Jé ũrepise uje a yujnusina bátedaté cásodicáite.

12 Yáyipie a jogate bapesudode udore jnese jne, enga a yidójnangapísa udore quigode iji yáyipie gatuaque.

13 Urénga, Dupade á, ueque basocade udore ome pisijnaringuéone. ¿Ama dupa uñeque cusirase a, jeta cuchadaté ga jé cho Yocudupade uté?

14 Ua u Dupade uté uje bapésu cucha pitijabátedatéode. Bapésu ga bajopié iyiejna pijoque iji erámi unirisórone udore ore ujade.

15 Ome bajmaneca ujopíerãi uté ga barame barasade udore ore, uje jnani bajade Jacob, José ore ape disi ejode u.

16 Urénga, Dupade á, yodode udore chimo ua. Yote quedéjnane udore pañaji ua nanique, ga ore chipatigase re ome dasadodéringai. Ga yodi ajedatei uté tãrara jé iji údi.

17 Ga gue abujadie udire chojne ome dajogosṍri yote iji re. Jé aja uje guéode uruode cho cúrurururu iji gaté. Ga bo bojóji ajnorápiedie ga ore chachẽre quedéjnane.

18 Ga pudududique bapesudode guéode urúo iji úyujna uaté uje chijnire jnumi aja dajesui. Ga ajnorapie uásei chijñate erámi údode gai ome dáringai jnare. Enga jnumi uté cho ta-ta-ta iji gaté ome dáringai tãrarachuque uté.

19 Bajesui uté chajna yote quedéjnai uéchai, ga bajnai dajeque chaquesu yote quedéjna cuchábode udore ore, mu que pijoque barodie iji baquigade gotique.

20 Barasade udore ore gajnua u áyasa posérigui ome ua uje babo ore údi, ga basíome udore ore irodisórone ome ore jeta ore chijñaque ore, ga ore íode u Moisés, Aarón ore.

© 2021 Ethnos360

Global Partners
Lean sinn:



Sanasan