Sálmos 75 - Dupade Uruode

Piradé udaque gajnesṍri u piradedie irajasṍripísi. Asaf uté ipesudé u.

¹ Urénga, yacãco babai, Dupade á, yacãco babai. Uje idógosi bei ueradi uté, enga bapesudode cucha pitijabácho chatata uté.

² Pangarádejnai uté chojninga: –A chise yojningárique gajnei dire jne, ga a yácariji yúringai Padode Ajirisõre ome yajiritigade úringane ũréo.

³ Ujetiga erámi uté nejñu ñane, jé aja achamisórone udore ore jnese, mu uyu upúsu uje yipésu erámi cutádedie udire úringanie etogue iji gaté.

⁴ Ga yojningame dicotárechoquí uté: "Jé ca asi babai." Ga yojningame sijnángone: "Jé ca ajose ua ome báringai dicase.

⁵ Jé ca ajosi ua iji gaté ome báringai daradaté; jé ca baruode uajácho ome báringai etabite carataque uté."–

⁶ Que gosi úringárique pijosiguíji gaté tṍraji guedé garani, guedé cacadi yúode gotique, jé aja uje que tṍraji erãpetarei iji umusoi garani to gotique.

⁷ Mu Dupade upúsu Padode Ajirisõre Cuchábi. Jeta ajéo ga chosi gosi iji jnumi, jeoga ajéo ga chosi ayoré uñeque iji gaté.

⁸ Uje pijópidi déji Pangarádejnai uté jmanai uté, ga irágu uté ajei. Ga chimera ore jodi aja uje i tu víno ga dajádiji jopidi uté ajei. Ga uté chojne ome víno uté iji dajópidi ga chaningáraja sijnángone udore jnese iji erámi údode jnese, ga ore chiniripise uté ga que ore cho ayé uje ore chibóta uté ajei, ga imoi tu uté ujuyaquei ome ore, jeta chejna ore.

⁹ Mu uyu ga, a jecucha yatata uté adode gatuaque jne iji deréjna pitade; a yirate yicotaqué gajnéringui yiradei ome Jacob angureni Dupade uté.

¹⁰ Uje Dupade uté chojninga: –A yaquesu ate gajnaréngone udore ore etotiguei ¡jnaque! jne, mu ome ate arégode udore ore ga a pijosique ore iji gaté ome cutejmane ore etotiguejna.–