Sálmos 74 - Dupade Uruode

Piradé udaque ipesusṍri i tu Asaf, jeta pujnusinamane.

¹ Urénga, Dupade á, ¿cuchárique u gu a uje bo betéguiji yoque iji deréjna pitade gatuaque? ¿Ama gotique gu a uje bo bájninga ga cho pioque úyujnanie uje que íjnoque ome barodedie áyasai uyoque uje yugúcoji bajnei garai?

² Ajnusina barása dipeséode ore uje bo ore oré jé iji dire diyajmane udore iji yoquiquigáningo. Ga ore uague uña tu uje baqueta ujetiga o bajnéngu ore. Ga bajogadi cucarãte Sión uté u uje bagúsiji uté.

³ Be ga orei barípiedie iji cucha arímeque eyúgojmane udore ore yui, uje bamajosórone udore ore pésu jaribei tiji cuchade jnese uje déji baguíjna cuchábi ajé puyai uté ajei.

⁴ Betesórone ore cho dajé, ga ore cho cuchiso surungúone iji bajogadi uté uje batuangóa barasade ore iji uté. Ga betesórone udore ore chicha daniri pijoguto bandéra aja jogadi uté, ga jé imoi tu ore úringane yocujnuéngaisóño.

⁵ Ga ore cho pidode aquesusórone uje ore chinguíra dajnósedie aja poridie iji abuéraque ajénique.

⁶ Enga uajate udore ore inguirane ome dajnósedie, martíllodie ore uje ore chajnangarase baguíjnai aparagádode tábla jnese aja dejode.

⁷ Uje ore chãru baguíjnai ajé puyaguipísi uté ome pioi, ga ore pésu cucha noñánguipísiji jogadi uté uje bacha bei ueradi aja uté, uje ore chucuase uté aja jnumi ¡ju! ¡ju!

⁸ Ore chojninga iji dáyipiedie: –Yicoi jnese, ga a yipéco jaribei tiji ore jne.– Ga ore chãru pijogadode jnese gáyode iji puniri udé údode uje Dupade anguresórone ore chimáta ñane aja udore ome Dupade uté úringai pisígai.

⁹ Que yimóngopo cucha pitijabátique uñeque rĩ; ga que baruode júsõre uñeque dépoji yocujánique to rĩ. Que yirajágo jeta cucha dacadode udore chise deruénique ome yoque.

¹⁰ Urénga, Dupade á, ¿cho rique díningo ujetiga pumajósõri uté cha cho damitiguéome ua? ¿Ama petésõri uté dojnóngaja bei ueradi uté iji deréjna pitade jne á?

¹¹ ¿Cuchárique u gu a uje baquĩ́ra bajmanecai uté, bajmana bãrachua ga que ejna ore? Ajnime bajmanai uté iji baguidé uráya ga anoningase ore.

¹² Dupade á, báringai Yeduguéjna Cuchape jé jogate ao, jé iji dire diyajmane udore iji yiquigáningo. Ua u uje bapésu basoca piquetangórone ore iji erámi unirisórone ore ujade.

¹³ Ua u uje bajuque yote quedéjna cuchábi iji ñane nanique ome cutejmai betotiguejna. Enga bamochẽre arócojna quedéjnane etabídode iji yote quedéjnane uté jochai.

¹⁴ Jé ua upo rĩ uje bajo arócojna quedéjna pirosobádi Leviatán uté gatoidie aja ñane ¡tácatác! ga basíome uté péode ome erãpetarei jogosórone ore jetiga ore cho dabotíji.

¹⁵ Ga ua u uje bajuque cucarané uaté ga bapésu jeta yodi pojnámiji uaté ga cho tié bayéraque aja dajesui; jé basa ga yote quedéjnane déji uje eteque cajnóri mu ua u uje bapésu udore ga dajuque udore jochai to ga que yotique dépoji rĩ.

¹⁶ Diri gajnesṍri tu ua, ga dejai gajnesṍri tupo ua rĩ. Ua upo rĩ uje bacha dírecaringuéi cuchábode, jé aja guedé uté aja ore charidode.

¹⁷ Ua u nanique uje bapésu erámi udé eruéode jogadode jnese; ga ua upo rĩ uje bapésu siqueré, esoi ore jnese.

¹⁸ Urénga, Pangarádejná, be ga ajnusina bamajosórone udore isocai uje ore cho damitiguéome ua, jé aja uje ayoré táyipiegode udore ore dojnóngaja bei ueradi uté.

¹⁹ Jé ca ẽra yocucuecaringuei ome cuchiso chagúode udore, uje yocajnúone u bachidode cucujnadaté pajnotaguipíso ome ua ga bo bedójnarione iji yoque. Jé ca acadígui barása áyuguhebátade udore ore ucuecaringuei iji deréjna pitade.

²⁰ Adójnangapísa baru iyiejájna cásodicáite. Uje ajidé judúguejnanie déji jnumi udé údode jnese ga irágu udire ome pijosipiedie úringanie pipesudei.

²¹ Jé ca ajuéga ujetiga ducañerájmane ore chajnésaru daquigade ome dáringane dipócho. Jmatágode ore, jé aja udore ore uje ore chácari te ¡paque! ga ore dorási ga ore chicotárase bei ueradi uté.

²² Urénga, ayague, Dupade á, ga be ga arota ua. Ajnusina ayoré táyipiegode udore ore uje que ore cho daja ome dadojnóngamátigade ome ua iji deréjnane údode.

²³ Jé ca acadígui bamajosórone udore ore pijnacaraidie, betesórone cutejmane ore ichora uje chõre re gatuaque uje ore chosi riji gaté ome ua.