Sálmos 73 - Dupade Uruode

Asaf gajné Sálmo udaque.

¹ Urénga, jé ũrepise uje paraque Dupade ome israélgosode, ome ore uje icha udore ore áyipiedie.

² Mu ome yu ga idógosi jeta yicṍra diríca, uje yirípiedie chorase caru iji jnumi.

³ U gu uje tãrarachugué yáyipie ome ayoré dicotárechoquíode udore ore, uje yimo ate gajnaréngone udore ore ugúchade úringane dipeséo.

⁴ Uje que udore ore chejnáreque pute dosótique ome re jé aja ore úringáringo toque yui, uje ayoré ijoréjna ore gatuaque, ga etócho ore.

⁵ Jé ore cãraque re ome dojode ayoré ore, uje que ore chimo pujuré pipesudéraque ome re; ga que ore chejnáreque re ome dequejnaréngone isatígo cucha udore uje jecucha chisa ore ujode ayoré ore.

⁶ Jecute udore ore cho dajnápeguiji dacotaquéode ome re, ga jé basa ga udore ore cho daguidé gajnujna iji dáringane ayoré josipíerãcho.

⁷ Ga udore, ayorédaté ore ga cutejmanie ore edójnai, uje que ore chajire re ome dapotigádode cucha dipeséo uje chise ore ga páyipie noñánguenie yore ore áyipiedie gai.

⁸ Udore ore cho damitiguéo, ga ore uruode quigode noñánguipíso; ga ome dáringane ijoyatácho ga ore chĩ́care pijosipiedie, pijmongaquéode udore ore, jeta ore pésu.

⁹ Ga ore chinguíra dabijnanone aja gatajnoquei uté ome dadojnóngamátigade ome uté, ga ore aréode udore chayo iji jnumi udé gai ome dáringane josipíerãcho.

¹⁰ Jecute ore urasade tajia ore yui, ga que ore chise ore uruode iyoguérique gotique.

¹¹ Ga ore chojninga: –¿Ama Dupade chorási ringome jetiga chiraja ya? ¿Jeoga Dupade Gatajnoquei Achamisõre irajatigárique cuse a?–

¹² Urénga, sijnángone udore ore adi jé u uté, uje érãtique ore chimo pujuréragome re iji deréjnane, ga jé ore chajnera dáringane ugúcharã́cho údi.

¹³ Jé ũrepise uje yujuse yáyipie guio jeta icha gatuaque bisideque, ga yuru yijmainie jeta ichai udire ome cucha gajnaréngone úringáringo pisacho, mu yisocade u jórogu udore, uje que cuchárique tṍraji gotique.

¹⁴ Jecucha ore chujé yúdode iji guedé batigade jnese, ga yo pujuyade iji durasedie gatuaque.

¹⁵ Ujetiga yojningárasa: –A qué yirate ore aja ore uru gajnaréngone jne.– Urénga, Dupade á, yẽrapáidode urásu barasade udore, diríe jogonóño.

¹⁶ Yidójnangapísa cuchade udore uje yipota jóroga jeta udore quigode choqui guesi ome yu, mu ibiraguipíso quigode gu, ga na yu aja jnumone.

¹⁷ Gusu uje yicáji Dupade uté iguíjna cuchábi ajé puyai uté, ga quene yiraja sijnángone udore ore quique obiréjnai uté.

¹⁸ Jé ũré uje bachajapite udore ore aja jnupe carujnai uté, ga ua u uje barãte udore ore aja ore úringáringo pinoningañacho.

¹⁹ Mu jĩraque pejnacho ore ¡jaripe! ga que ore chisa dejóringome pisadodéringadatéi uté uje chatéta ore.

²⁰ Uje gosi edodie cho jnaque ome darigode mu cachi purique. Ga adi jé u to ome ua jne, Pangarádejná, ujetiga ãriji jne, uje a etaque sijnángone ore, ga ore gajnúone u purique chojmarárique ome ua jne uje jĩraque íjnoque.

²¹ Uje yáyipie chejnáreque re, jé aja uje yusũrujnáji yáyipie uaté ajépisi,

²² Ga gose yitáyipietigade uté, uje que yiraja cuchárique. Uje yajnui tu cuchiso bisidétique iji baquei.

²³ Mu jecucha yugúsi bari gatuaque, uje e basa yijmana yãrachua.

²⁴ Ga yijñangóri tu ua aja yajesúode, uje bango báyuquetotiguéode quigode aja yu. Quigade jne, enga a ajna uyu aja bari iji bangoningájnai jogadi iji gaté.

²⁵ ¿Ama gosi dérasiji gaté ome yu ujetiga unejángome ua? Enga iji erámi udé ga que yipotigátique cucha uñeque cuse, gusúpusu ua.

²⁶ Yáyipie jé aja yúringai ayoré udé a ore chicáji jnumi ome dáringane basucho. Mu Dupade u yáyipie etotiguei guẽrasṍri uté, enga yajneque uté iji deréjna pitade jnese gatuaque.

²⁷ Udore ore uje idája ore iji ua ga a ore u jeta ore topísi jne. Bejna udore ore jnese uje que ũré ore ome ua.

²⁸ Mu ome yu ga ueratigai u ome yu ujetiga yijose Dupade uté yui. E yo Yãrésõri iji Pangarádejna Dupa Pujnuéngaisṍri uté; uje yigaidi u ujetiga yatata basocade udore ore jnese jne.