Sálmos 72 - Dupade Uruode

Salomón gajné Sálmo udaque.

¹ Dupade á, be ga asíome bajiritíga uréone quigode ome peduguéjna cuchábi uté, jé aja basoca uréone ome peduguéjna cuchábi uté ujnacari ujetiga basája uté charidi jne.

² Enga jé u jne ujetiga uté chajire barasade udore ore adode aja quigode ome dáringai eduguéjna ũrepise, ga pésu pajiritíga ũrepísode quigode ome páyuguhebátigai ipatigayade udore ore.

³ Cucaranone a udore ore isíomei u pajesereringai ome pidáyode idaisórone udore ore jne, ga jé cho cucarãte orónaminie ore isíomei tijójnaringuéo uté, ga gose pajiritíga uréone uje tṍraji peduguéjna cuchape uté.

⁴ A uté doi ga pésu pajiritíga uréone aja quigode ome ducañerájmane ore uje ore déji pidaisórone udore ore ujade jne, enga a uté chiqueta jmatágode udore ore abode to. Peduguéjna uté a doi ga chajo ayoré josipíerãi uté aja ñane ¡tac! jne.

⁵ A ayoréode udore ore dosóñime ua jne, Pangarádejná, jé aja guedé, guedoside udore ore eruénique iji ore charidode iji gaté, ga jé chuságaja pape disi ejórigo udore ore jnese gatuaque.

⁶ Ga peduguéjna uté a doi jnumi jne ga cho guérique uje base garai gai uje quene ore chaquesu jnacarade iji uté, ga uté gajnui tupo gue jururudie uje chutape erámi.

⁷ Iji uté úringai peduguéjna gajnéone díño, ga ayoré áyipie arégode a ore piéjna erámi gatuaque ome dáringane ditijínacho jne; iji ore úringai areque uté ga a ore chimo cutejmai dajesereringa ome raque jé aja ujetiga guedoside ca chijñanápo erã́tique gai rĩ.

⁸ Ga uté gajnepídode erámio iji dáringai udore ore eduguéjna a chichaga raja yote quedéjna cuchábi uté ga jé chuságaja ujode yote quedéjnadatéo udore eruéode jnese jne. Ga jé tṍrapóji tiédaté uaté uje i tu Éufrates jé aja jnumi eruénique uéchai rĩ.

⁹ Ga erãpetarei jogosórone udore ore a ore chajo raja jnumi iji uté iquei jne; ga uté umajosórone udore ore a chipese jnumi urui jne ome daréode.

¹⁰ Ga társisgosode ore eduguéjna cuchábode, jé aja eduguéjnane uñane to uje ore idáyode déji yote quedéjnane ajã́ronie, a ore di dẽrapaite bisidégode údi ome uté, jeta ore cho doré ome uté. Ga peduguéjnane uñane a ore di deranone cucha údi aja peduguéjnai uté to uje ore unirone u Sabá, Séba ore.

¹¹ Peduguéjnane udore jnese a ore chibéro raja jnumi iji peduguéjnai uté iquei. Enga punirone iji erámone jnese a ore doi uté iroquéode jne.

¹² Uje a uté chiqueta ayoré jmatátique uje tibidi uté jne, jé aja ayoré áyuguhebátatique uté uje que chimo dátajasónique dojo ayoré ome re.

¹³ A uté chosõre ayoré jmatai uté jne, jé aja uté uje que urénga chimo cuchárique ome re. Enga chiqueta ayoré jmatágode udore ore ome ore úringáringo chuchorase.

¹⁴ Ga a chijnime ore ucuecaringuei iji jnani ijmongarácachoquíode jmainie, jé aja josipíerane udore ore josipiedie jmainie jne. Chamáñaje orerẽ́pise udore ore iyojnanie iji uté edominone.

¹⁵ Peduguéjnai uté a qué eca uté gatuaque jne. A pisíome óro ome peduguéjna uté jne, uje óro uaté tṍraji ore jogadi uté uje i tu Sabá. Ga a jé ca ore cho daja ujetiga ore catecã́ri Dupade ome uté gatuaque jne, enga a ore chacacãre uté ome daru omone iji deréjnane údode jne.

¹⁶ Uje ore acai trígo ajñu garósidie a sué iji jnumi iji cucaranone ójodie udire marínga, a udore ajidéroi jne, ga jé ore chijninguese re ga cho uguíjnamui uté uje i tu Líbano ujetiga emone chijocase poridie udire iji gaté. Ga pidai idaisórone udore ore ujnié gatedie cuse jne, ga a ore cho jnacarade uje suéji garáijnai uté ome dáringane dipeséo.

¹⁷ Enga peduguéjna cuchábi i uté a jé chuságaja deréjna pitade gatuaque. Ga uté i úringai ujnomerãque a ca chise deruénique jne ga cho guedé ome dáringai togójma. Ga punirone a ore chise dáringane pacacarãcho ome uté. Enga a ore chacacãre uté ome daru ueradode jnese jne.

¹⁸ ¡Urénga, pisígai Opejã Pangarádejnai Dupade uté, israélgosode udore ore angureni Dupa! Gusu uté uje pésu cucha pitijabátedatéode.

¹⁹ Jé tiógarapísa uté i ingoningarãi uté úringai picotaque iji deréjna pitade gatuac, tuaque. ¡Yipésupú ga irágupúsurásu erámi údode jnese ome uté ingoningájnai uté jõ! ¡Jé qui tu Amén!

²⁰ Isaí ape David uté icatecãraitigade ome Dupade eruei u udé.