Sálmos 71 - Dupade Uruode

¹ Yicha yanguretigai aja ua ome yúringai pãreque, Pangarádejná. Jé ca ajuégapísa ujetiga pinguíraja dipoi aja yu gotique.

² Ome báringai Ũré ga arame yu, ga ajnime yu iji cucha dacadode jmainie. Acha bangoninguini aja gadoi, ga aqueta yu.

³ Be ga o cucarané pãretóraque ome yu, jeta jecucha yibágui uaté gatuaque. Ga be ga ẽ́care yúringárique piquetaque ome baroquéode quigode udore gu uje ua u cucarané uajade ome yu, ga ua upo ore oragadé yoríco yãreto te rĩ.

⁴ Urénga, Yangureni Dupá, be ga ajnime yu iji sijnángone udore ore jmainie, ga ejñu jnani ate noñángone, jnani josipíerane udore ore isagode iji yu.

⁵ U gu uje yangureta bei ome yu, Pangarádejnai Dupade á; uje jnacare gatode yu nanique mu jé yicha yanguretigai aja ua.

⁶ Uje quene yibase nanique mu e basa yu iji gaté ome báringai Yátajasṍre. Ua u uje bajnime yu iji ité ajei nanique. Ga a jecucha yicota ua gatuaque jne.

⁷ Jiei ore uje ore cho cucha pibojmai tiji yu; mu ua u Yãrésõri etoque uté.

⁸ A irágupúsu yibijnani uté jne ome bajnéone yicotaquéo, ga yedoi tu bangoningájnai iji deréjnai údode.

⁹ Jé ca ajócãre yu jeta e yise yúringai choquíjna casé jne. Ujeta yetotiguei garósipise jne marínga, ca ajíome yu iji te jmete.

¹⁰ Chamáñaje yetesórone udore ore cho daboti cucha iji yu; udore ore uje ore chuquéjnai yu, ga ore chimáta ñane ome yu ga ore pésu dáyipierigui ome yúringárique chuque yui.

¹¹ Ga ore chojninga: –Beyoi ga acajningachome uté uje angureni Dupa e iyaque uté ga beyoi ga asayo uté. Uje que iquetasónique ujo ayoré cuse gu.–

¹² Urénga, Dupade á, jé ca idája ua ome yu jne. Jĩraque abágui yu ome báringai Yátajasṍre, Yudupá.

¹³ Udore ore uje ore jnátu yucuecaringuei úringárique pejnaque, ga jé tiógararása ujetiga pinguíraja pajegátigai aja ore, ga pejnaque ore. Ga udore ore jnese uje ore ucuei tu pejóporinguérique ome yu, ga a ore dorási ga ore cho pepeque piguitíguiji dipoi uté, ga pijosique udore ore iji jnumi.

¹⁴ Mu ome yu, ga panguretigai a jé jogate yu gatuaque jne. Ga yicotaquéode ome ua a jé chajnera dádi, jé chajnera dádi jne gatuaque.

¹⁵ A yibijnani júdode u báringai ũré, basoca piquetangórone udore ome yu jne, iji deréjnane údode, uje que yiraja udore ore eruénique mu.

¹⁶ A yiji ga yatata Pangarádejnai Dupade uté ipesútedatéode jne. A yĩ́care ua ome báringai Ũrepise jne, ga yedoque dugai tu ua.

¹⁷ Urénga, Dupade á, uje qué jnacarape yu nanique ga jé bacadique yu nanique. Ga yejna yu aja yujúdode bátedatéo udore jé aja deréjnane udojo to.

¹⁸ Ujetiga yise yúringai choquíjnape, yúringai uchṹraque ore jne, mu jé ca ajíome yu iji te jmete, Dupade á, jé aja ujetiga yatata báringai Ujopíerãque Cuchape ome disi ejode ore, betotiguejnai ome ore ape disi ejórigo jnese uje cáma ore base.

¹⁹ Urénga, Dupade á, báringai ũré ome cuchade jnese chuságaja gatajnoquei uté iji te uje atéta uaté iji gaté; ua u uje bapésu cuchadatéode. ¿Ama gosi dérasi jeta cho ua, Dupade á?

²⁰ Uje bajuéga jeta yimo pujuré gajnéone udore cucha ome yu uje jiei ore, ga uajate udore quigode ome yu marínga, a atirépo yucuecaringuei yibai te rĩ. Idájapise yu iji guesode iji jnumi údi marínga, a jé aringarápo yu aja gaté jne rĩ iji uté.

²¹ A ajnerame yúringai ujnomeránguejna jne rĩ. Ga a yisápo yúringárique ayoré áyuguhebátaque eruénique jne rĩ ome báringai yaparúgaisṍre.

²² Urénga, a yujé yi árpa jne ga yicota ua ome basoca uréone, Yangureni Dupá; a yujé yi uje i tu saltério jne, ga a yirate yicotaqué gajnéringui yiradei ome ua jne, israélgosode udore ore Angurete Puyaguipísi á.

²³ Yibijnani uté a chejnapúsu daruode ome dajéchietaquéode jne ujetiga yicota ua ome yijñiecade, jé aja yajépisi, uje baqueta yu gu.

²⁴ Yarei uté a jé ca chacho chatata basoca arégode udore jne iji deréjnai údode gatuaque; u gu uje udore ore uje ore ucuegode u pejóporinguérique ome yu ga pajegátigai e guiyaque ore, ga pijosique udore ore iji jnumi.