Sálmos 68 - Dupade Uruode

Piradé udaque gajnesṍri u piradedie irajasṍripísi. David ipesudé Sálmo udaque.

¹ Yipésupú ga Dupade uté chague ga pisidique uté umajosórone udore aja quedéjnane. Uté guetesórone a ore dorási ga ore chayorásome uté iquei.

² Ajócãre ore ga ore chorase pioi úyujnaraque uje emi chubúchu aja quedéjnane ga jĩraque íjnoque; uje piyagade dajádiji jnumone iji piotique iquei, mu ore adi jé urásu to ujetiga sijnángone udore ore bijna iji Dupade uté iquei, ga togadeque erámi ome ore.

³ Mu jé basa ga uréone ore dorási ga ore nína re, ga ore chachietáji re iji Dupade iquei. A ore dorási ga ore chẽráchu ome aja dajesúode uje ore irasique re gu.

⁴ Ajñiecacho ome Dupade uté, ga acha uté i ueradi aja uacaradérigui achachagúgode ome uacacotaquéode ome uté. Ajosoi uté iji gaté uje chácariji gue abujadie aja dajesúode ome dei pirosobádi Pangarádejna uté. Ga anínaño uáguiji uté iquei.

⁵ Disijádode jnese ore dai jé u uté, ga abai toguedie udire irotangóri tupo Dupade uté rĩ, uje chácariji dayarite pirosobádejnai uté.

⁶ Dupade u uje chosõre ayorérique jeta chácari te ¡paque! ga chisíome uté jogasúrique ome uté gosi to. Ga uté upo rĩ uje chirame pujurúgayode udore ore ga chicha ore aja dáringane arécho. Mu ome ducusuréchoquíode udore ore ga ore cho daniri iji jnumi eyutiguérigo, uje que cuchárique déji.

⁷ Urénga, Dupade á, uje bacha ua aja barasade israélgoso ore iquei, ga baquesu erãpe eyutiguei ome báringai urugu.

⁸ Enga jnumi tãrara. Ga guei tṍraji gaté nanique iji Dupade iquei. Enga cucarãte cuchábi Sinaí uté cho cocho cochóguiji Dupade iquei, uje israélgosode ore Angureni Dupade u uté.

⁹ Urénga, Dupade á, ua u uje bojne gueyequejnanie ore gai; udore uje bo bajnenguíji ore ga ore cho carúji cuchade jmainie nanique, mu basiapome petotiguei ome udore ore rĩ.

¹⁰ Uje barodigode barása ore cho dayaridíji uté nanique. Urénga, ome bátegoningáne udore ore ga basíome ore imeserane cucha ome ore jnese iji uté, uje bosõre jmatágode udore ore, Dupade á.

¹¹ Dupade chatata dojña quigode, ga chequé dipesedie udire u uje ore chigójna udore gai.

¹² Ga ore chojninga ome dagoiguéode: –¡Peduguéjna casodica jé aja ore isoldate dipeséode jĩraque ore chayója dajesúrigo jnese, ore chayo ome dagajñua! Ga chequé degúbiedie udire u uje ore chajuguína ñane ore ajnoñane damajósoño ore ugúchade iji daguíjnane.–

¹³ Ujetiga oyo uacajñáriji áyasadie piedie ore ujade, ga uacajnui tu cucujnadatei uje cho dajnónguiji pláta uéguedie, jé basa ga cho daramáji óro nanganatáguedie udire.

¹⁴ Uje Dupa Ujopíerãque Cuchábi chisite peduguéjnane aja quedéjnane iji uté, enga cho ebe quedéjnanie nieve uje póroro ga base ga chaco cucarani uté gai uje i tu Salmón.

¹⁵ Urénga, cucarãte pitijabádode u Basán jogonórone cucarãcho udore; ga cucarãte yoríco udore iji ore uniri Basán uté, ga abuja asíco udore.

¹⁶ Cucaranone uaque á, uje yoríco ga abuja asíco uaque, ¿Cuchárique u gu a uje uacatoyóji Dupade ajegaidi jogapi uté cucarãte ome uacáringane ocáca? Jé ũré uje Pangarádejnai uté a cho dayaridíji jogadi uté gatuaque iji deréjna pitade jne.

¹⁷ Dupade gajnéone guebéquedatéo déji uje pocaningane gajnecho udore ga jiépisi ga ore batigai sué veinte mílnie, jé aja mil dipeséjnanie ore gai. Uje Pangarádejnai tṍraji cucarani Sinaí uté ome dáringai pirosobate nanique, enga adi jé u to uje chicáji daguíjna ajé pirosobádejnai uté iji Jerusalén uaté.

¹⁸ Urénga, bacáji gaté yui ga bajna basagode bajurúgayo udore aja gaté uje bo basaguíji ore. Ga erámi unirisórone ore jnese cho doré ome ua. Jé aja udore ore uje ore tagu baruode aja, ga a ore cho doré ome ua to, uje que ore pota marínga, ujetiga o bayaridíji ore ujade, Pangarádejná, Dupade á.

¹⁹ Tiógarapísa dáringai pisígai Pangarádejnai, Yoquiquetasṍri Dupa uté, uje uté cho dajnéngu yocajnéone cucha dacacho uje na yógaja jnumone, ga chijnime udore iji yoquibai iji dirode jnese.

²⁰ Yocangureni Dupade uté u Dupa Piramesṍri. A pitoringai juseque gosi, mu gose Pangarádejnai Dupade uté, uje cuchade udore jnese déji uté jmainie.

²¹ Dupade a chujé damajosórone udore ore gatoidie iji jnumi jne, udore ore ójodie uje ore chejna rángaja cucha gajnaréngone úringáringo pigaicho.

²² Pangarádejnai uté chojninga: –A yĩriápo ore údi iji ore uniri Basán uté rĩ. A yĩriápo udore ore údi rĩ uje ore déji yote quedéjna ajedatei uté.

²³ Yigaidi u gu ujetiga achiejnáño uacamajosórone ore iyojnanie aja jnumone jne ome uacarídade, ga a uacachidode tamoco chipese ore iyode to ome daréode jne.–

²⁴ Urénga, pijoque ayorébuode ore jochai uje ore chicáji bei, Dupade á. Pipañaite ayorébuode uje ore tṍraji dajñarenie ujetiga ore nína re ome Yudupa, Yeduguéjna Cuchábi, iji baguíjna ajé pirosobádejnai uté.

²⁵ Ga ijñiecacade ore chácariji piquei, jé basa ga ore yugode cucha jocarãtácho oisórone chácariji ore quigade. Ga gapupitadie ore déji ore gari to ujetiga ore chujé degábidie panderéta aja dajesúode ¡yígui, yígui! iji uté.

²⁶ Uaque jnese, beyoi ga acacã́cho Dupade uté ome uacaru omone iji uacáguedatédie udire. Beyoi ga acacã́cho Pangarádejnai uté, uaque uje uacajnui u sibíjnai uje tṍraji jnani bajai Israel uté.

²⁷ Iji ore jochai uté ga ore cho bajágu benjamíngosode ore uague ajámamia suaté uje Jacob ujnacare ejópisi tu Benjamín uté nanique, ga ore eduguéjnai déji ore jochai uté iquei jnese. Ore quigaminórone u judágosode ore eduguéjna dipeséode, jé aja zabulóngosode ore eduguéjnane to, jé aja neftalígosode ore eduguéjnane ore to.

²⁸ Badupade u uje chutṍri petotiguei ome ua. Urénga, angongara betotiguejnai aja yoque, Dupade á, jeta jé chirate bapesudi cásodicáite ome yoque.

²⁹ Uje baguíjna cuchábi déji Jerusalén uaté ga eduguéjnane iji erámi údode a ore chijna dẽrate bisidégode aja ua iji uté jne.

³⁰ Ejna ua aja guesi ome udore ore uje ore cho cuchiso aségode uje ore déji dapoguiépidi uté dãsaijnamu ajei, jé aja udore uje ore cho tóro dipesé sijnátigo rĩ uje ore déji pidáyode ore gachidode aquirájna choqui pariguéjna ore ujade. Pijosique ore iji jnumi jnese, ga jé u ujetiga ore cho doré ome pláta guebéode udore jne. Uté chisite punirone udore ore aja quedéjnane uje ore jnátu pocaningárique yúrique.

³¹ Peduguéjna ibijógode a ore tṍraji daniri Egípto jne aja Jerusalén uaté; ga a jĩraque etiopíagosode ore chãrai dajmanáyone iji gaté ome Dupade uté.

³² Urénga, ajñiecacho aja Dupade, peduguéjna cuchábode irodigode puníño uaque jnese iji erámi á; aracho uacacotaqué gajnéringui uacaradei ome Pangarádejnai uté.

³³ Beyoi uacaradedie ome uté uje cho doruti cucha iji gaté, iji gaté eyúgojmai uté uje déji gatajnoquei gai. Urénga, uté chiroque dáringai dara aja guesi, ga uté pijnate ibisógode u udore.

³⁴ Beyoi ga asíñome picotaquéode ome Dupade uté ome úringai ujopíerãque cuchape. Uté úringai ingoningarãque déji Israel gai jnese, ga uté cutejmai etotigué chise ateta uaté iji gaté.

³⁵ Urénga, Dupade á, pirosobátedatéi tu ua iji baguíjna puyaguipísi uté ajei. Israélgosode ore angureni Dupa u uje chisíome darasade ore úringane ujopíerãque jé aja ore úringane etócho ome ore. ¡Urénga, jé tiógarapísa Pangarádejnai uté úringai picotaque!