Sálmos 64 - Dupade Uruode

Piradé udaque gajnesṍri u piradedie irajasṍripísi. David ipesudé Sálmo udaque.

¹ Urénga, Dupade, angarami yúringai dara ujeta yatata yibotaqué gajnéone cucha udojo. Be ga ajuse yucuecaringuei guio ome yumajosórone udore ijmongaquéode.

² Apógu yu ome ayoré sijnángone udore ore áyipie noñangue pipoguiédedie quigode udore uje ore chucué dasocai ome yu. Jé aja jeta acose yu ome ate noñángone udore ore pijnanéjnane uje ore cho júruru iji ore uáguedatédie.

³ Ga udore ore chata daréode ome dedotigade ga cho quesé asicode, ga ore na dojodie aja doji carubi jeta ore chayo doji údi, mu ore uru noñángone upúsu ore ojodie udire, ga cho venéno pequesarãtóraque ome dachoi uté.

⁴ Udore ore chichóngara dojodie uje ore déji danunguenie udire, ga ore ichoi u ayorei uté uje que ba gajnetique cucha cuse gotique. Jĩraque ore chicho uté, mu que pisadodéringarique déji ore ajénique.

⁵ Enga ore pésu dasijnaringuei uté unéningai ome ñane jnese jeta ore pésu. Ore pésu dáyipiedie ome ñane jeta ore chacose dajuya gajnéringui trámpa, uje ore chojninga: –¿Ama uñeque chimórase udire jne?–

⁶ Ore chayója ñane ome pijmapié noñánguepísedie úringáringui pucueguei, ga ore chise dajegaidé iji udire ga ore chojninga: –Quene yico pijmapiedie uña uje sué dojodie pijmapiei jnese ome úringa gajnarengue.– Ũrepise uje ore áyipiedie chiraja dajosipiedie quigode, ga jé chuságaja ore ajépisi.

⁷ Mu a Dupade u jeta chicho udore ore ome doidedie dojoi jne. Ga a ore tṍra rome dẽratodie udire uje Dupade a ajnongoque udore ore jne.

⁸ Ga uté a pésu ga udore ore yusórone jé u daréode jne uje cho quesé asicode ga udore jé equesarãque darésorone udore ore jne. Enga udore ore jnese uje chimo ore ga a ore chijocase datoidie iji ome dajñiequéode ome ore.

⁹ Enga jnanione jnese a ore todo jne. A ore tujua Dupade adode udore jne, ga ore chidójnangapísa uté ipesudode cucha udore quigode iji dáyipiedie.

¹⁰ Jnani uréone udore a ore nína re ome Pangarádejnai uté jne, ga a ore chucué dáringáringo pãrécho to jne ome uté. Enga a jnani áyipie arégode udore a chachietáji re jnese jne gu uté.