Sálmos 61 - Dupade Uruode

Piradé udaque gajnesṍri u piradedie irajasṍripísi. Ga ore chujé degode cucha jocarãtácho uje ore chirate udaque. David ipesudé u.

¹ Urénga, Dupade á, angári yibijnacaraidie. Enga acha bangoninguini aja yicatecãraitigade yui.

² Iji jnup eruéode udore yibidi ua uje yáyipie que tiógara dáyuguhebátiga gajnéone cucha. Be ga orei yu iji cucarãte choquírique ójoraque uje querúpise uté ome yu.

³ Ua u gu Yãrésõri. Bajnua tu ore oragadé yoríco ome yu uje timingue ga que yumajosórone udore ore chijocase yu iji uaté.

⁴ Yajéode upúsu jeta jecucha yupúsi baguíjna cárpa pirosobádi uté gatuaque, ga yo yãrésõri iji bajnóngone udore ore uburúdi.

⁵ Urénga, Dupade á, e badute cuchade uje yingome ua diríca jeta yipésu udore ome ua. Enga e basíome bachagájade cucha omío ome yu uje bachagája udore ore jnese uje ore dosóñime bei ueradi uté.

⁶ A ua u jne ujetiga ajnerame peduguéjna cuchábi uté gajnéone díño, ga umarejna ucuecaringuei jne. Ga a uté guejnáringui siquerei jiépisi jne, ga jé chuságaja disi ejode ore ájnape disi ejode udore ore.

⁷ A jecucha uté déji dáringai peduguéjna cuchape iji Dupade iquei gatuaque jne. Be ga dimane bajnoraquédatéi, báringai ũré udore ore jeta ore nóna uté aja quedéjnane gatuaque ome úringai pañeraque.

⁸ Enga a jé u jne jeta jecucha yedo bei ueradéjnai uté iji yachachagúgode uje yicota ua ome yijñiecade jne. Ga a jecucha yimate yichagájade yurúo aja guesi iji dirode jnese jne.