Sálmos 60 - Dupade Uruode

Piradé udaque gajnesṍri u piradedie irajasṍripísi. David ipesudé u jetiga pacadique ore ome. Pésu uje David uté cho dajocaningame amóngosode jé aja síriagosode uñane. David iroi Joab chajni enga chujé edómgosode udore uje ore batigai chise 12.000 iji tuijnai uté uje i tu Echoi.

¹ Urénga, Dupade á, e bajíome yóguiji te jmete. Jé aja uje basite yógaja quedéjnane. Ájningaránguipíse ua ome yoque to. ¡Ga be ga ajniápo yoquibai rĩ!

² Uje bapésu jnumi uté itãrarachúringai, ga bajuque jnumi uté gai. Be ga apésu dajugupétigade udore jeta ore chisapo ñane rĩ, uje jnumi tãrara gu.

³ Bapésu ga barasade ore chejnáreque dajnéone petingaqué uajádejna udore. Ga basíome víno potique ome yoque ga chachia yoquedodie iji gaté.

⁴ Mu e bãrai boidi borapeque uté bandéra iji gaté ome udore ore uje ore dosóñime ua. Uje bangare gai, ga báringai Ũré pijogúsõri tu ome ore ga ore chapídome damajosórone ore ojodie udire.

⁵ Aqueta yógome bãrachu piquetato, ga achajnai yu. Uje bagaidi turásu gu ujetiga barása bedójnarione udore ore chise dáringáringo piraméo.

⁶ Dupade déji dayarite pirosobádejnai uté uje chojninga: –A yajuguína pijogadi Siquem uté ome uaque jne, ga a jé u jeta yinína yu. Jé aja jeta yajuguína tuijnai ome uaque to jne uje i tu Sucot.

⁷ Yajneque Galaad uté, jé aja Manasés uté; jé basa ga Efraín uté isoldate dipeséode u uje gãreque puniri yui. Ga Judá gajnua tu yoguéraque uje déji yijmanai ome yúringárique pangarate, uje Peduguéjna Cuchábi a tṍraji Judá uté jne gu.

⁸ Yacãra puniri Moab uté aja yesãrapié, uje imoi tu uje cucha bisideque gu. Jé basa ga yṍra yuchiédode aja puniri Edom uté gai, ga imoi tu ujeta yujnué ore gai jne. Jé basa ga a yibite filistéogosode ore gai ome yúringai Pujnuéngaisṍre jne.–

⁹ Uje Peduguéjnai David uté chojninga: –¿Gosi urásu jeta chijnoque yuja ore inama uaté uéchaminóri pidai? ¿Ga gosi chorase Edom gabi dajeque quigome yu?–

¹⁰ ¿Ama Dupade, jé ca ua u a uje chucuase yógaja ti yui? Ga Dupade á, que ajínapo yógaja yoquijocaningárique rĩ.

¹¹ Be ga átaja yógome yocumajosórone ore, uje que cuchárique tṍraji jnanione yocátajaquéode ome ñane gu.

¹² Mu pujnuéngaisṍre yoque jne, ga gose Dupade uté. ¡A uté chuchiéjna yocumajosórone ore aja jnumi ga chĩro ore aja ti!