Sálmos 6 - Dupade Uruode

Piradé udaque gajnesṍri u piradedie irajasṍripísi. Ga ore chujé degode cucha jocarãtácho uje ore chirate udaque. David uté ipesudé tu.

¹ Pangarádejná, jé ca o bájningame yu ome baru dosótigo. Ga ca o bajuñame yu ome báringárique tagu dejo.

² Pangarádejná, be ga osõre yu. Bamo arĩa uje que yutajnoquérique cusapo rĩ. Atirépo yijóningai yibai te rĩ. Bamo arĩa uje yisadodéringai u uje pésu cochóya iji yu.

³ Pangarádejná, bamo yáyipie úringa áyuguhebaté. Ga ¿cho rique jeta áta ua aja yu?

⁴ Pangarádejná, ajni yibai ga ãraque yucuecaringuei ome udore ore. Aqueta yu ome bajnoraquédatéi.

⁵ Uje que ayoré totique doi ga áyipieraque dépoji ua rĩ. ¿Ama ducóderaque ódesõri doi ga qué chicotapórase ua rĩ a?

⁶ Pangarádejná, bamo uje eyuque yu ome yagoyedie uje yibóji yejode. Iji dejade jnese ga jecucha yibo, ga yugutádode arupachéo ome yeducadode.

⁷ Uje yáyuguhebátigai pésu ga que yũrúaji yajiritique erãpe ome yagoyedie; eyuque yajirigode, ga gose yetesórone udore ore.

⁸ ¡Pejóporinguéone ipesusõre sijnángone uaque á, angaráño uacayaritique ome yu! Uje Pangarádejnai e tangári yu ome yutaidode udore cucha iji uje yutai ga yibója udore.

⁹ Pangarádejnai tangári yuru quigode udore ome re, ga chimesẽre yicatecãraitigade quigode udore.

¹⁰ Yumajosórone udore jnese a pinguíraja dipoi aja ore jne, jé aja jeta páyuguhebátigai yore udore ore gai. Ga a jĩraque ore chajníja daquigade jne ome dajegátigai ome raque.