Sálmos 59 - Dupade Uruode

Piradé udaque gajnesṍri u piradedie irajasṍripísi. David ipesudé u uje Peduguéjnai Saúl chiroque darógode jnanío aja David iguíjnai jeta ore chuquéjnai uté, uje pota chutígome gu.

¹ Urénga, Dupade á, ajnime yu iji yumajosórone udore ore jmainie. Ga ãraque yu ome udore ore uje ore chiringare re aja gaté ome yu.

² Arame yu ome ate gajnaréngone udore ore josipiedie. Enga ãraque yu ome ayoré yusṍreméone udore ore.

³ Urénga, adójnangapísa uje dimane ore iji danunguenie ome gadoi jeta ore chujé yu. Ayoré etóguejnane chimáta ñane ome yúringárique pachẽraque. Mu que yipesute gajnaréngone u, Pangarádejná, jé aja uje que yisijnaringuérique cuse ome ore to.

⁴ Que yiyoguérique cuse ome ore gotique, mu jĩraque dimane udore ore jeta ore chachẽre yu. ¡Be ga ayáguena yejoi ome báringai Yátajasṍre, ga cajire to cuchade udore uje chise yu!

⁵ Urénga, Pangarádejná, Dupa Pujnuéngaisṍri á, ua u israélgosode ore angureni Dupa. Jecute ãriji ga o bajuñame punirone udore ore jnese. Enga jé ca amo posongaquérique iji udore ore uje ore tẽra rome pate gajnaréngone úringáringo pipesucho.

⁶ Udore ore chajni aja pidai iji dejai, ga ore chacája ñane iji guidai údode ga ore cho tamoco urugúode uje ore poja dajesúode.

⁷ Adójnanga uje ore ebiei tṍraji ore pijnani, ga queségodogóde u uje déji ore pijnanane. Ga ore chojninga: –¿Ama uñeque chududirase yoque a?–

⁸ Mu ome ua, Pangarádejná, bangana udore ore gai. Ga bo bamitiguéome punirone udore ore jnese.

⁹ Urénga, Yetotiguei Guẽrasṍri á, yajiri tu bei ome yu. Dupade á, ua u uje bo poragadé yorícoraque ome yu, ome báringai Yãrésõre.

¹⁰ Uje Yudupade a tṍraji ome yu jne ome dajnoraquédatéi, ga bajagája yiquei. Ga Dupade a juéga ujetiga yipáñaji yetesórone udore ore jne ome yúringai pujnuéngaisṍre.

¹¹ Mu jé ca jĩraque ajépise udore ore jnese. Yitodo gu jeta yurasade chicadígui badode udore. Mu asite ore aja quedéjnane ome bajopié iyiejna, ga ajosi ore iji jnumi, Pangarádejná. Yocãrésõri tupúsu ua uje bacha ua aja gadode.

¹² Ome ore isijnaringuéone uje tṍraji ore pijnanone, jé aja udore ore uruode uje tocade iji ore pijnanane, be ga ajuéga jetiga pujurúgayo ore jé iji ore úringane dicotárechoquío. Ga ore chopo daba damangaqué gajnaréngone, jé aja ore urupatáringane uje ore chĩ́care.

¹³ Be ga ejna udore ore ome bájningamíe. Ejnapise ore jé aja ujetiga erã́ta erámi ome ore. Ga a erámi unirisórone jnese ore chiraja jne uje Dupade u Peduguéjna Cuchábi iji Jacob uniri udé jé aja erámi eruéode jnese.

¹⁴ Ga udore ore chajni aja pidai iji dejai, ga ore chacája ñane iji guidai údode ga ore cho tamoco urugúode uje ore poja dajesúode.

¹⁵ Ore cho tamoco godoque disorane uje ore chucué dabose cucha pibotique, mu ca ore nunaji enga ore po jórogaja dajesúode.

¹⁶ Mu uyu ga a yijñecare ga yicha báringai ujopíerãque cuchape aja yachachagúgode jne. Ga a yijñecare iji yejode ome yiradedie udire ujeta yatata bajnoraquédatéi iji direjnímei jne. U gu uje bo poragadé yorícoraque ome yu, ga Yãrésõri upo ua rĩ uje yugúsi yajnéone cucha dacacho jmainie.

¹⁷ Urénga, Yetotiguei Guẽrasṍri á, a yirate yicotaqué gajnéringui yiradei jne ome ua. Uje Dupade gajnui tu pujuyaquérique iji yibai, jé aja Yijnorasṍri Dupa.